Ezekiele 6 - Mawu a Mulluku

Apwiya enahumullulla dda ollapella mafano

¹ Mawu a Apwiya yaawa wa miyaano wi,

² “We mwaana a muthu owehe omiyaangoni dda o Israele nave ollotelle wi,

³ ‘Nyu miyaango dda o Israele, iwani mawu a mi Apwiya Mulluku. Kinuulleellani nyuwaano miyaango ni asimiyaango, mihinje ni matapo wi kineerorumiha ekhoto nave kineerewoononga mapurwaanyu oollapellamo mafano.

⁴ Makuwaanyu ni makuwaanyu awoosellavo lubani* eneerewoonongiwa. Kineerowiipha athwaanyu vakhuviru ni makuwaanyu.

⁵ Vano kineeroddihiya mitembo dda Aisraele vahoollo va mafanwaanyu. Kineeromwara makhuvaanyu moowaapheella makuwaanyu mattheene.

⁶ Orive weko munaakhallekeenyuwo, mizinda ddanyu ddineerotthattuwa matepe. Mapurwaanyu oollapellamo mattheene eneerewoonongiwa sika wi makuwaanyu ni mafanwaanyu eneeropwesiwa. Makuwaanyu awoosellamo lubani eneerokumulliwa nave ddittheddene mwapangilleenyu ddineeromalla.

⁷ Athu eneerewiiphiwa variyari vanyu wawi muneerodduwella wi mi tti Apwiya.’ ”

⁸ Koma amodda mwa nyuwaano kineerewaahiya ni okumi. Eneerovulluwa o ekhoto nave kineerewaapallallesella o ellapo ddimodda variyari va mitundu ddimodda.

⁹ Vano oovulluwa mwa nyuwaano eneerokuupuwella variyari va athu a mitundu ddimoddaayo nko enaapharelliiwawo okaporo. Kineerewaamoriha ethakaraka nave kineerewaawulliha muru ekaamba ya ohiroromelleya wiwa nave owukila wiwa wulle ekaamba yoohiya murimiiwa va mafano. Ddineerewaananara aneeniiwa vawoonanani ddoonanara ddittheddene nnddo yeerilliiwa vamodda ni ddaweera ddiwa ddoonanara.

¹⁰ Vano eneerodduwella wi mi tti Apwiya nave ngaawoopopihelle nivuddo voollotani wi kineerewaallaka.

¹¹ “Mi Apwiya Mulluku kinallota wi, ‘Opa m'mattani mwawo nave onyingallihe nnyallo nawo vatthi mwamasiva.’ Vano ollote wi, ‘Otulli!’ Ekaamba ya ddoonanara ddittheddene nnddo nibanja na Israele yeerilliiwa eneerokhwa ni ettalla, ekhoto owaaka mullilli.

¹² Ayo eri woorekamella eneerokhwa ni mullilli. Ayo eri vakhuviru eneerokhwa ni ekhoto. Nave oohalla eneerokhwa ni ettalla. Mmu sika kinaawoonihelleemi osha murima waka.

¹³ Vano muneerodduwella wi mi tti Apwiya vawoonani awiiphiwa eri variyari va mafano, waapheella makuwiiwa, vaddullu va asimiyaango ni miyaango ddittheddene, vatthi va muteekho wa makukhu makitthi ni wa orive muthundu wa makattha manchichi ni o nirive nipuro nko yavelleelliiwa mukutho wawunkhella wa mafanwiiwa mattheene.

¹⁴ Sika kineerowoononga ni muwonwaaka nave ellapwiiwa ettheene kineeroyitthattusa otthako ni ntepe, ovenyera o chipululu ophiya o muzinda wa Ribula. Vano eneerodduwella wi mi tti Apwiya.”