Ezekiele 5 - Mawu a Mulluku

Ezekiele anachema meehaaye

¹ We mwaana a muthu, kusa nsupada nawo nawiisha wonanko nchemo, ocheme meehaawo ni ereru ddawo. Vano oddilinge nave oddikawe vararu.

² Mallapwaawo awaapheella muzinda yamalla, okuse embali emodda mwa ddiraru ohelle munllo variyari va muzinda. Embali yaneepiilli oyiphaddephadde ni nsupada weetaka mwawaapheella muzinda muttheene. Embali yaneeraru oyimware wiiphevoni nave kineeroyithwara ni nsupada.

³ Okusewo meehi vang'ono ominikelle mu mukanjwaawo.

⁴ Meehi yaalla ovahullevo mamodda waavokhelle viikho owoose. Munllo wa meehaayo oneerokhara ophiyera owoosa Aisraele attheene.

⁵ Apwiya Mulluku enallota wi, “Olla tti Yerusalemu. Koomuhiya variyari va mitundu nave aapheelliwe ni ellapo ddimodda.

⁶ Koma Aisraele a o Yerusalemu yaawukila malamulwaaka waakhwaranya athu a mitundu ddimodda. Kheyaawiiwellelle waakhwaranya athu a ellapo ddawaapheella. Yaakhoota malamulwaaka nave kheyaasungalle malangizwaaka.

⁷ “Sika vano mi Apwiya Mulluku kinallota wi, ‘Epewaanyu tti yuullupalli waakhwaranya athu a mitundu ddimodda ddoowaapheellani. Khamuthwanre malamulwaaka nave khamusungalle malangizwaaka koma muthwanre malamulo a athu a mitundu ddimodda ddoowaapheellani.

⁸ Ella sika ekaambiiwa mi Apwiya Mulluku kinuuvaanyiheemini. Kineerewuullakani athu a mitundu ddimodda yoonaka.

⁹ Kineeroweerellani nnddo kihineerekeemi ovenyera khalle nave ngiwa keera muhoollo ekaamba ya ddaweera ddanyu ddinchichi ddoonanara.

¹⁰ Sika makhollo eneerewaattakhuna aniiwa variyari vanyu nave anamwani eneerewaattakhuna makhollwiiwa.’ ”

¹¹ “Ddawoona, mi Apwiya Mulluku Ookumi kinimallupella vamiitthoni vaka wi kineerowoonongani vawi mwaaripiha enyumbaaka ni ddeko ddanyu ddinchichi ddoonanara. Vano ngiweerellani echifundo, nguumorellani ethakaraka naari vang'ono.

¹² Emodda mwa ezigawo ddiraru dda athwaanyu eneerokhwa ni mullilli apaalle ni ettalla. Echigawo emodda eneerewiiphiwa ni nsupada nawaapheella muzinda muttheene. Nave echigawo emodda kineeroyipallallesella ephevo o embali ddisesenndde voowiikarihani ni nsupada naka noohullulluwa.”

¹³ “Muneerodduwella mmo osha murima waka onaaweerelliiwa nave kineerewaasimwella ophiyera murimaaka okhurumuwalle. Sika eneerodduwella wi mi Apwiya koollota mweehache vawuullakani mwawi ddiidda.”

¹⁴ “We Yerusalemu, kineerewuutthattusa ntepe. Oneerokhalla oovevuwa m'mwiitthoni mwa athu a mitundu ddoowaapheella ni wa oovira.

¹⁵ Oneerokhalla ello yoovevuwa nave eneerekewuunyemulla. Oneerokhalla wonanko ochenjeza nave ello yawoopiha wa athu a mitundu ddoowaapheella kaawuullakaka mwamasiva, kaakamullaka mullatwaawo moonanariwa ni moowalli. Mi Apwiya Mulluku koollota.

¹⁶ Kineerewuuhoma ni ettalla yoohoma wonanko mipaamba ddawoopiha wi ewoononge. Kineeromorihella va weyaano vooyevihani yoochaawo ya nllapo ni nllapo.

¹⁷ Kineerorumiha ettalla ni enama ddamuhakani ddawoopiha nnddo ddinaawaakhe anaawo. Kineerewuukuha ni mullilli nave vineerokhalla wiiphana va athwaawo. Kineerewuurumihella ekhoto yawoopiha. Mi Apwiya Mulluku koollota.”