Ezekiele 48 - Mawu a Mulluku

Okawiwa wa ellapo wa malloko

¹ Alla sika yaari manddina a mallako, nlloko na Dani naambeelle o malire a ompoto ovenyera o enyanja oweella o Hetiloni ophiyera mullako wa Hamati ovirellella o Hazarenani, muzinda oyo ori ompoto wa malire a Damasiko owehana ni Hamati nave ovenyera wookhuma nndduwa ophiyera woovollowa nndduwa, echigawo emodda.

² Echigawo ya Ashere epange malire ni Adani ovenyera wookhuma nndduwa ophiyera woovollowa nndduwa.

³ Echigawo ya Nafutali epange malire ni Ashere ovenyera wookhuma nndduwa ophiyera woovollowa nndduwa.

⁴ Echigawo ya Manase epange malire ni Nafutali ovenyera wookhuma nndduwa ophiyera woovollowa nndduwa.

⁵ Echigawo ya Efuremu epange malire ni Manase ovenyera wookhuma nndduwa ophiyera woovollowa nndduwa.

⁶ Echigawo ya Rubeni epange malire ni Efuremu ovenyera wookhuma nndduwa ophiyera woovollowa nndduwa.

⁷ Echigawo ya Yuda epange malire ni Rubeni ovenyera wookhuma nndduwa ophiyera woovollowa nndduwa.

Nipuro noopatuleya variyari va ellapo

⁸ “Echigawo yoopatuleya epange malire ni Yuda ovenyera wookhuma nndduwa ophiyera woovollowa nndduwa. Okhuveya wa echigaweeyo okhalle makilomita khumi ni meelli ni hafu. Orekama wiwa okhalle wonanko ezigawo ddimodda ovenyera wookhuma nndduwa ophiyera woovollowa nndduwa. Nave nipuro na enyumba ya Apwiya nikhalle variyari viwa.

⁹ Echigawo eyo munaayipatuleenyu wi ekhalle ya Apwiya ekhalle yoorekama makilomita khumi ni meelli nave yookhuveya makilomita khumi.

¹⁰ Echigawo yeella ekawiwe mwawi ddiidda, echigawo ya allupa mukutho ekhalle ya makilomita khumi ni meelli ni hafu ompoto. Woovollowa nndduwa okhalle makilomita khumi. Wookhuma nndduwa okhalle makilomita matthanu. Omwera okhalle makilomita khumi ni meelli ni hafu. Nipuro na enyumba ya Mulluku nikhalle variyaririyari.

¹¹ Yeella ekhalle echigawo ya allupa mukutho oopatuleya, anamwani a Zadoki ayo yiiwellelle malamulwaaka voohaathwarani Aisraele mvo yahollowiiwa wonanko mmo yeerella Alevi.

¹² Variyari va ezigawo ddittheddene echigawo yeella ekhalle yoopatuleya ya allupa mukutho nave ekhalle yaweella wunchichi. Epange malire ni ellapo ya Alevi.

¹³ Vano echigawo ya Alevi yaatamane ni echigawo ya allupa mukutho. Orekama wiwa okhalle makilomita khumi ni meelli ni hafu. Okhuveya wiwa okhalle makilomita matthanu. Echigawo ettheeneella orekama wiwa okhalle makilomita matthanu ni meelli ni hafu nave okhuveya wiwa makilomita matthanu.

¹⁴ Ehikullihe apaalle waakakhaniha erive embali ya echigawo yeella. Tti echigawo yoopatuleya nave ehaavahe amodda vawi tti nipuro naweella.”

¹⁵ Echigawo yoohalla okhuveya wiwa okhalle makilomita meelli ni hafu nave orekama wiwa okhalle makilomita khumi ni meelli ni hafu. Ekhalle echigawo yoomakawo muzinda navettho ya nipuro noochihellavo eziweto. Muzinda okhalle variyaririyari.

¹⁶ Ompoto wiwa orekame mamita 2,250, omwera wiwa orekame mamita 2,250, woovollowa nndduwa wiwa orekame mamita 2,250, woovollowa nndduwa wiwa orekame mamita 2,250.

¹⁷ Nipuro noochihella enama nikhalle nawi ddiidda, ompoto wiwa orekame mamita 125. Omwera wiwa orekame mamita 125. Wookhuma nndduwa wiwa orekame mamita 125. Woovollowa nndduwa wiwa orekame mamita 125.

¹⁸ Echigawo yoohalla vakhuviru ni echigawo yoopatuleya, erekame makilomita matthanu, wookhuma nndduwa, makilomita matthanu, woovollowa nndduwa. Ddoohata ddiwa ddikhalle yoocha ya athu oophara mutteko mu muzinda.

¹⁹ Athu oophara mutteko mu muzinda, oovenyera mu nirive nlloko na Aisraele ellimeke echigaweeyo.

²⁰ Vano echigawo yamututha yoopatuleyeeyo ekhalle ya makilomita khumi ni meelli ni hafu erive embali sika wi echigawo yoopatuleyeeyo vamodda ni embali ya muzindooyo.

²¹ “Vano echigawo yoohalla va embali ddittheddene piilli dda echigawo yoopatuleya ni ya embali ya muzinda ekhalle ya mwene. Ddinaakhalle ddiidda, waambeella m'malireni a echigawo yoopatuleya okomella m'malireni a wookhuma nndduwa embali emodda nave waambeellattho m'malireni a echigawo yoopatuleya okomella m'malireni a woovollowa nndduwa oweella o ezigawo dda malloko, ekhalle ya mwene. Echigawo yoopatuleya ni nipuro naweella na enyumba ya Apwiya ddikhalle variyaririyari.

²² Echigawo ya Alevi ni echigawo ya muzinda ddikhalle variyari va echigawo ya mwene. Echigawo yeella ekhalle variyaririyari va ellapo ya Yuda ni ya Benjamini.”

Ezigawo dda malloko mamodda

²³ “Malloko mamodda ekawelliwe mwawi ddiidda, echigawo ya Benjamini evenyere wookhuma nndduwa ophiyera woovollowa nndduwa.

²⁴ Echigawo ya Simeoni epange malire ni Benjamini ovenyera wookhuma nndduwa ophiyera woovollowa nndduwa.

²⁵ Echigawo ya Isakara epange malire ni Simeoni ovenyera wookhuma nndduwa ophiyera woovollowa nndduwa.

²⁶ Echigawo ya Zebuloni epange malire ni Isakara ovenyera wookhuma nndduwa ophiyera woovollowa nndduwa.

²⁷ Echigawo ya Gadi epange malire ni Zebuloni ovenyera wookhuma nndduwa ophiyera woovollowa nndduwa.

²⁸ Malire a Gadi o embali yoomwera evenyere omwera waambeella o Tamara ophiya o nthiya na Meriboti Kadeshi nave oovenyera o muhinje wa Iguputo ophiya o Enyanja Yuullupalli.

²⁹ Ellapo ettheeneeyo sika munaawavaheenyu malloko a Israele wi ekhalle yoohallaniiwa. Ezigawo ddenndda ddinaakhalle ddayiwa. Mi Apwiya Mulluku koollota.”

Millako dda Yerusalemu

³⁰ “Nndda sika millako ddookhumella dda muzinda nave ddiromolliweke ni manddina a malloko a Aisraele. Ompoto nko orekama wiwa ori mamita 2,250,

³¹ okhalle millako dduullupalli miraru, mmodda wa Rubeni, mmodda wa Yuda ni mmodda wa Levi.

³² Wookhuma nndduwa nko orekama wiwa ori mamita 2,250, okhalle millako dduullupalli miraru, mmodda wa Yosefe, mmodda wa Benjamini ni mmodda wa Dani.

³³ Omwera nko orekama wiwa ori mamita 2,250, okhalle millako dduullupalli miraru, mmodda wa Simeoni, mmodda wa Isakara ni mmodda wa Zebuloni.

³⁴ Woovollowa nndduwa nko orekama wiwa ori mamita 2,250, okhalle millako dduullupalli miraru, mmodda wa Gadi, mmodda wa Ashere ni mmodda wa Nafutali.

³⁵ Sika waapheella muzinda muttheenooyo onaakhalle mamita 9,000 nave nnddina na muzindooyo wa enthawi yoohimalla ninaakhalle Apwiya eri vaava.”