Ezekiele 47 - Mawu a Mulluku

Muhinje woovenyera mu enyumba ya Apwiya

¹ “Vano muthoolle aakikusella o mullako wa enyumba ya Apwiya. Kaamoona neetuutu akhumaka vatthi va mullako wa enyumba ya Apwiya wookhuma nndduwa vawi enyumbeeyo yaweha wookhuma nndduwa. Waaneeta maaddi vatthi va esiri ya omwera ya enyumba ya Apwiya, omwera wa nikuwa.

² Aakikhumihella mullako wa ompoto, aakaapheelliha vaatte vaye ophiya o mullako wa otte wooweha wookhuma nndduwa. Vano kohoona maaddi ekhumaka omwera wa mullako.

³ Muthoolle aaya o embali ya wookhuma nndduwa ari ni mulingo m'mattani mwaye alinga mamita 500. Vano aakilleella wi kikitthella m'maaddinimmo. Maaddaayo yakikomelle m'manyalloni.

⁴ Aalingattho mamita 500, akikitthihellattho m'maaddini mulle nave maaddaayo yaakikomella muyuununi.

⁵ Aalingattho mamita 500 nave maaddi yaatthattuwa muhinje nave kaalephela ollapuwa vawi maaddaayo yaawella nave waari woowallamella wunchichi woopaalleya osambila voollapuwani.

⁶ Aakilleella wi, ‘We mwaana a muthu wooddoona ddenndda?’ Vano aakihokollosella museresere mwa muhinjooyo.

⁷ Niphiyallewo kahoona miteekho ddinchichi erive embali ya muhinjooyo.

⁸ Vano aakilleella wi, ‘Maaddi yaalla enaya o echigawo ya wookhuma nndduwa wa ellapo yoophiya o ntapo na Araba. Vookomihellani eneerewiithellella mu Enyanja Yookhwa mmo maaddiiwa eri amwiinyu nave maaddaayo eneeroddiva.

⁹ Nko onaaphiye muhinjooyo, erive yoophatusiwa eneerokhalla ni okumi nave ehomba ddineerewaata. Vawi maaddi yaalla enaya wenko wi yaddivihe maaddi makhwiiwa. Vano nko onaaphiye muhinjooyo, ddittheddene ddineerokhalla ni okumi.

¹⁰ Awiipha ehomba eneerokhalla m'madokoni mwiwa kaambiiwa waambeella o Engedi ophiya o Enegilaimu oneerokhalla mapuro aphaama oowaaneyavo mathaviiwa. M'muhinjenimmo muneerokhalla ehomba ddoohiyanahiyana monga dda mu Enyanja Yuullupalli.

¹¹ Koma m'maduvini ni m'mathiyani khamukhalla maaddi ooddiva, enaakhalle amwiinyu.

¹² Vakhwipi va muhinjooyo vaakhalla miteekho dda orive mutundu ddawimma ezipaso. Makatthiiwa khewa enyaalla nave ezipaso ddiwa khadduukunuwa. Ddineerewimma orive mweeri kaambiiwa maaddiiwa tti oovenyera o enyumba ya Apwiya. Athu eneerekoddicha nave makatthiiwa eneerekopharihiwa mutteko wonanko murete.’ ”

Malire a ellapo

¹³ Mi Apwiya Mulluku kinallota wi, “Alla malire munaawathwarekeenyu vawaakawellani ellapo Aisraele, malloko khumi ni meellaalle. Yosefe aakhelle ezigawo piilli.

¹⁴ Ellapweella muyikawene moophwanaphwana kaambiiwa kaallupella wi kineeroyivaha wa makhollwaanyu nave enaakhalle yoohallanaanyu.

¹⁵ “Malire a ompoto evenyere o Enyanja Yuullupalli othwara musewu wa o Hetiloni ophiya o mullako wa o Hamati, okhwaranyella o Zedadi,

¹⁶ Berata ni Sibraimu, mizinda nnddo ddiri variyari va malire a Damasiko ni Hamati, ophiya o Hazare Hatikoni vakhuviru ni malire a Haurani.

¹⁷ Sika malire a ompoto enaambeelle o enyanja ophiya o muzinda wa Hazara Enoni oyo opangille malire ni muzinda wa Damasiko ompoto nave ophiya o malire a Hamati ompoto. Yeella sika enaakhalle embali ya ompoto.”

¹⁸ Malire a wookhuma nndduwa eweelle omwera ovenyera o Hazarenani variyari va Haurani ni Damasiko, othwara muhinje wa Yordani variyari va Giliyadi ni ellapo ya Israele oweha o enyanja ya wookhuma nndduwa ophiya o Tamara. Yeella enaakhalle embali ya wookhuma nndduwa.

¹⁹ Malire a omwera eweelle o Tamara ophiya o nthiya na Meriboti Kadeshi. Ovenyera wenko ethware malire a o Iguputo ophiya o Enyanja Yuullupalli. Yeella sika embali ya omwera.

²⁰ “Malire a woovollowa nndduwa ekhalle o Enyanja Yuullupalli ophiya o mapuro oowehana ni mullako wa Hamati. Yeella sika embali ya woovollowa nndduwa.

²¹ “Sika mukawane ellapo yeella variyari vanyu voothwarani malloko a Aisraele.

²² Muyikawe wi ekhalle yoohallanaanyu. Ekhallettho ya alleto ayo eri variyari vanyu, yaayarelle anamwani variyari vanyu. Alletwaayo eneerokhalla ni nyuwaano wonanko aneetthi a mu Israele. Eneerovahiwa yoohallaniiwa vamodda ni nyuwaano.

²³ Arive mulleto avahiwe yoohallanaaye o nlloko nno anakhalleeye. Mi Apwiya Mulluku koollota.”