Ezekiele 44 - Mawu a Mulluku

Mutteko wa mullako wa wookhuma nndduwa

¹ Muthoolle aakihokollosella o mullako wootte wa nipuro naweella nooweha wookhuma nndduwa koma waari woowalleya.

² Vano Apwiya yaakilleella wi, “Mullakoolla okhalle woowalleya nave ohinawuhulla. Mmodda ahivollowellevo vawi mi Apwiya Mulluku a Israele kaavollowellavo. Sika ekaambiiwa onaawalleyelliiwa.

³ Mweneve sika anaawore okhalla vaavo ni ocha vamiitthoni va mi Apwiya. Aneerovollowa ni okhuma oweella mu nikhote namuwari mwa mullako yooyo.”

Malamulo oomwaakhullella muthu wi avollowe mu enyumba ya Apwiya

⁴ Vatulli viwa muthooyo aakiweelliha va mullako wa ompoto owiitthoni wa enyumba ya Apwiya. Wenko kaanoona ntitimiho na Apwiya niddanlle mu enyumbeeyo sika kahiivokhella vatthi moopopheya ekhove.

⁵ Vano Apwiya yaakilleella wi, “We mwaana a muthu opwathesese, owehesese nave wiiwesese ddittheddene kinaawuulleelleemi dda malamulo ni malangizo a enyumbaakeella. Omudduwelle oyo anaakhullelliwa ovollowamo ni oyo ahinaakhullelliwa ovollowamo.

⁶ Waalleelle athu a mutundu weekuku wa Israele mawaaka awi, ‘Nyu Aisraele, hiyani ddoonanara ddanyu ddittheddene.

⁷ Mwahaavollochiha mu nipuro naka naweella alleto oohiphaddiwa m'murimani ni m'mwiillini mwene. Athwaayo yaaripiha enyumbaaka nyuwaano mwakivaheenyu yoocha, makhura ni nikhame. Vaweerani ddoonanara ddenndda mwaatathilla.

⁸ Munipuroni mwawi nyuwaano mupwatheke ddeko ddaka ddoopatuleya, mwaatthoollille alletwaalla wi ewehereke.’

⁹ “Vano mi Apwiya Mulluku kinallota wi, ‘Mwa alleto ayo eri oohiphaddiwa m'murimani ni m'mwiillini ahikhallevo naari mmodda oovollowa mu nipuro naka naweella naari alleto ookhalla variyari va Aisraele.’ ”

Alevi enavenyihiwa va omukutho

¹⁰ “Vano Alevi ayo yakihiyalle woorekama wa enthawi eyo Aisraele yahollowilliiwa voollapellani mafano, eneerollakiwa ekaamba ya machimwiiwa.

¹¹ Eneeremoona okhalla oorumeyellaaka mu nipuro naka naweella. Eneerekowehera millako dda enyumba ya Apwiya ni ophara mitteko ddimodda wenko. Eneerekewiipha enama dda mikutho ddooshellelliha ni mikutho ddimodda dda athu. Sika eneerekowiimellella athwaayo ni waarumeyella.

¹² Alliwa yaanaarumeyella athu voollapellani mafano nave yaanaahollosa Aisraele vaweerani ddiiddo. Ekaamba ya yeella mi Apwiya Mulluku kinimallupella wi yaalla enaphwanella ollakiwa ekaamba ya machimwiiwa.

¹³ Khenaakhullelliwa ophiya vakhuviru ni miyaano wi ekirumreyelle monga allupa mukutho. Khewa yaatamella ddeko ddaka ddoopatuleya ni ddoovelleella ddoopatuleyesesa. Eneerowullihiwa muru ekaamba ya ddoonanara ddiwa.

¹⁴ Koma kineerewaahiya wi ewehereke enyumbaaka ni orumeyella mitteko ddittheddene dding'onong'ono.”

Allupa mukutho

¹⁵ Koma allupa mukutho a nlloko na Alevi a nibanja na Zadoki, ayo yaroromelleye va mitteko ddoopwatha nipuro naweella enthawi eyo Aisraele yahollowilliiwa ni okihiya miyaano yaayove eneekewaatamella wa miyaano wi ekirumeyelleke. Eneeroowa wa miyaano wi eheraatthi mukutho wa makhura ni wa nikhame. Mi Apwiya Mulluku koollota.

¹⁶ Yaayove sika enaavolloweke o nipuro naka naweella ni omwaatamella tebulwaaka wi ekirumeyelleke. Alliwa sika enaapwatheke ddeko ddaka.

¹⁷ Yaavollowaka mu mullako wamuwari, emuwareke bafuta. Ehiwareke ddoowara dda obweya wa enkhosa voorumeyellani va millako dda nthato namuwari ni muwari mwa enyumbaaka.

¹⁸ Ewareke enduwira ddabafuta omuruni wiwa ni kabudula. Ehiwareke erive ello yowaamoriha nikhurumella.

¹⁹ Vookhumellani wa athu a nthato na otte, erulleke ddoowara nnddo yawanriiwa voorumeyellani muwari ni oddihiya mu ezipinda ddoopatuleya. Nave eware ddoowara ddimodda woova wi enaavallihe weella wiwa athu amoddaayo ni ddoowara ddiwannddo.

²⁰ Allupa mukuthwaayo ehichemeke apaalle osunga meehi oorekama wunchichi koma ephaddereke.

²¹ Mullupa mukutho ahimuwiryeke vinyo ahalla vang'ono ovollowa mu nthato namuwari.

²² Ehinamutthellaka naamukhwelle shisha apaalle oohiyiwa. Emutthelleke namwalli oohimudduwella mullopwana a nlloko na Israele apaalle naamukhwelle a mullupa mukutho mukhwaaye.

²³ Allupa mukutho yaahuddiheke athu ohiyaniha variyari va ddeko ddoopatuleya ni ddeko shisha navettho variyari va ddaweella ni ddooripihiwa ovelleelliwa mukutho.

²⁴ Vakhalla millatu allupa mukutho yeeruzeke nave ekamulleke millatunnddo voopharihani mutteko malamulwaaka. Ethwareke malamulwaaka ni malangizwaaka mattheene a ehakallallo. Yapwathekettho mallapwaaka a Sabata wi ekhalle aweella.

²⁵ Mullupa mukutho ahiiripihe voomuttannyani muthu ookhwa opatula wi ekhwille tti attiitthinnya, amennya, mwanaye aamullopwana apaalle aamutthiyana, mwanamunne apaalle murokoriye oohitthelliwa.

²⁶ Akhalla wi ooripihiwa nave oheellihiwa, atiyere mallapo matthanu ni meelli wi akhalle aweellesesa.

²⁷ Vano va nllapo nawi avollowe mu nthato namuwari wi arumeyelle mu nipuro naweella, avelleelle mukutho woopepesella machimo. Mi Apwiya Mulluku koollota.

²⁸ “Allupa mukutho ehikhalle ni erive yoohallana apaalle eyuuma, yoohallaniiwa ni eyuumiiwa tti miyaano.

²⁹ Alliwa echeke ddoovelleella dda yoocha, dda mukutho woopepesella machimo ni dda mukutho woolliva. Nave ddittheddene ddoovelleelliwa wa miyaano mu Israele ddikhalle ddayiwa.

³⁰ Ddittheddene ddaphaama ddawaamba wiithwa ni va ddoovelleella ddimodda ddikhalleke dda allupa mukutho. Mwaavaheke othwaanyu wawaambeella osilla. Mweera ddiiddo mpa mwanyu muneerokhalla madaliso.

³¹ Allupa mukutho ehiyiche epallame apaalle enama, yookhwa weekhiiwa apaalle yoottakhuniwa ni enama.”