Ezekiele 43 - Mawu a Mulluku

Ohokollowa wa ntitimiho mu enyumba ya Apwiya

¹ Vatulli viwa muthoolle aakikusella o mullako wooweha wookhuma nndduwa.

² Wenko kahoonawo ntitimiho na Mulluku a Israele nivenyeraka wookhuma nndduwa. Niiweya wonanko orindimuwa wa maaddi nave ellapo yavatthi yaanyezimella ni ntitimiho naye.

³ Kaddoonilleemi m'masomphenya ddaari wonanko nndde kaddoonilleemi Apwiya ewaaka wi yoononge muzinda. Ddaarittho wonanko nndde kaddoonilleemi o muhinje wa Kebara. Vano kahiivokhella vatthi moopopheya ekhove.

⁴ Ntitimiho na Apwiya naavollowa mu enyumba ya Apwiya oweella mullako wooweha wookhuma nndduwa.

⁵ Munepa a Mulluku aakitukhulla akivollochiha mu nipuro namuwari. Vano ngoonani, ntitimiho na Apwiya naaddalla mu enyumbeeyo.

⁶ Muthoolle iimenlle vakhwipi ni miyaano, kaamwiiwa mmodda akiithanaka ovenyera mu enyumba ya Apwiya.

⁷ Aakilleella wi, “We mwaana a muthu, nipuro nenna tti na mpandwaaka woomwene mvo kinanyingallihaamivo manyallwaaka. Wuno sika kinaakhalleemi ni athwaaka Aisraele wa enthawi yoohimalla. Alliwa naari mamweniiwa khewa eripihattho nnddina naka naweella vooraruwani apaalle voovitthani mitembo dda mamweniiwa o mapuro oollapellawo.

⁸ Yaanamaka nikhote niwa vakhuviru ni vaaka navettho eferemu ddiwa vakhuviru ni ddaaka. Esiri sika yanihiyaniha variyari va alliwa ni miyaano. Sika yaaripiha nnddina naka naweella ni ddoonanara ddiwa nnddo yaddeeriiwa. Vano kaawoononga kishille murima.

⁹ Vano ehiye oraruwa wiwa, voollapellani milluku ddimodda nave evenyihevo mitembo ddamamwene ddiwa ddihikaatamelle. Nave kineerokhalla ni alliwa wa enthawi yoohimalla.

¹⁰ “We mwaana a muthu, waalleelle Aisraele dda enyumba ya Apwiya, mooneyellwiiwa ni mamakellwiiwa wi ewulliwe muru ni machimwiiwa.

¹¹ Yawulliwa muru ni ddittheddene yeeriiwa, waatthopoollelle dda enyumba ya Apwiya ni mooneyellwiiwa, dda millako ddiwa ddoovollowella ni ddookhumella nave mooneyellwiiwa mattheene ni okhoziwa wiwa otthewene. Waatthopoollelle malamulo ni malangizwiiwa nave waalembe alliwa yoonaka wi ewuupuwelleke ni waasunga.

¹² Nenna sika lamulo na mu enyumba ya Apwiya eyo enaamakiwe vaddullu va mwaango. Vatthevene vawaapheella vineerokhalla vaweellesesa. Nenna sika lamulo na mu enyumba ya Apwiya.”

Nikuwa

¹³ “Nngu sika olingiwa wa nikuwa moollikana ni mmo yalingelliwe enyumba ya Apwiya. Vatthi viwa vikhalle engalande yoowallamella masentimita 50, yookhuveya masentimita 50. Owanoni wa engalandeeyo okhalle wawaapheella masentimita 25.

¹⁴ Wunnuwa wa nikuwanno okhalle wawi ovenyera vatthi ophiyera nttattha ning'onong'ono vikhalle nimita nimodda, okhuveya wiwa okhalle hafu a nimita. Ovenyera va nttattha ning'onong'ono ophiyera va nttattha nuullupalli viye muddullu mamita meelli nave okhuveya wiwa okhalle masentimita 50.

¹⁵ Mapuro ooviddeellavo munllo vanikuwani ekhalle a mamita meelli. Vaddullu viwa vikhume manyaka masese oorekama hafu mita.

¹⁶ Mapuro ooviddeellavo munllwaayo ekhalle oorekama nave ookhuveya mamita matthanu ni nimodda. Sika enaakhalle oophwanaphwana embali ddittheddene.

¹⁷ Nttattha na variyari ninaarekame mamita matthanu ni meelli embali ddittheddene ddisese. Nave nikhote noowaapheella ninaakhalle masentimita 25. Engalande ya vatthi va nikuwanno enaakhalle ya masentimita 50 nave masitepe a vanikuwanimvo enaaweheke wookhuma nndduwa.”

Ozoziwa wa nikuwa

¹⁸ Apwiya Mulluku yaakilleella wi, “We mwaana a muthu, nikuwanno namakiwa malamulwiiwa voovelleellani mukutho wooshellelliha nave voomiddani nikhame tti awi,

¹⁹ allupa mukutho a nlloko na Levi, a mu nibanja na Zadoki, tti yaayove enaakaatamelleke wi ekirumeyelleke. Mi Apwiya Mulluku koollota. Waavahe nankhoro a musaanaang'ombe wi eheraatthi mukutho woopepesella machimo.

²⁰ Wayiipha okusewo nikhame omarena manyaka masese a va nikuwani embali ddisese dda nttattha waapheella mukhwipi mutthemwene. Sika oneeronipatula ni nikuwanno ni oneelliha.

²¹ Vano omukuse nankhoro a eng'ombe oyo avelleelliwe monga mukutho woopepesella machimo. Omoose vanipuroni viwa mu nthato na enyumba ya Apwiya, otte wa nipuro naweella.

²² “Waasaka omuvelleelle nankhoro a epuri oohirakalla wi nayeenettho akhalle mukutho woopepesella machimo. Ni nankhoro a epurooyo weellihelle nikuwanno wonanko weerelleewe ni nankhoro a eng'omboolle.

²³ Waneellihesesa nikuwanno omuvelleelle nankhoro a eng'ombe oohirakalla owaaka nankhoro a enkhosa oohirakalla.

²⁴ Oddivelleelle vamiitthoni va Apwiya nave allupa mukutho eddihelle mwiinyu ni oddiheraatthi wi ddikhalle mukutho wooshellelliha wa Apwiya.

²⁵ Nirive nllapo wa mallapo matthanu ni meelli omuvelleelleke nankhoro a epuri, a eng'ombe ni a enkhosa wi ddikhalle mukutho woopepesella machimo. Ddittheddene ddikhalle ddoohirakalla.

²⁶ Mallapo matthanu ni meellaayo yeereke mutetho woopepesella machimo ni weelliha nikuwa wi yaapatulelle Apwiya.

²⁷ Mallapo yaayo yamalla waambeella nllapo naneetthanu ni raru oya muhoollo, allupa mukutho eheraatthiki vanikuwaninno mikutho ddanyu ddooshellelliha nave dda eyaattano. Vano kineerowaakhellani. Mi Apwiya Mulluku koollota.”