Ezekiele 42 - Mawu a Mulluku

Echipinda ya allupa mukutho

¹ Vatulli viwa muthoolle aakikusella o nthato na otte embali ya ompoto akivollochiha mu enyumba emodda yoowehana ni enyumba ya Apwiya ni enyumba emodda ya ompoto.

² Enyumba ya ompotweella yaari yoorekama mamita 50 nave yookhuveya mamita 25.

³ Moowehana ni nikhote na nthato namuwari na mamita khumi navettho moowehana ni nikhote na nthato na otte vaakhalla makhote mararu ootthinnddaanyerana.

⁴ Owiitthoni wa ezipindannddo waakhalla mpata wa muwari wookhuveya mamita matthanu nave oorekama mamita 50. Millako ddiwa ddaweha ompoto.

⁵ Ezipinda ddamuddullu ddaari ddooyeva okhwaranya ddamuhito ni ddavariyari ekaamba yawi nikhote niwa na variyari ahaakha mapuro manchichi.

⁶ Ddittheddene ddaari dda ezipinda ddiraru ddootthinddaanyerana nave kheddaarina yooseerana wonanko ddamathatonndde sika ezipinda ddamuddullu ddaari ddooyeva okhwaranya ddavariyari ni ddamuhito.

⁷ Esiri yootte yaari yoorekama mamita 25 moothwarana ni ezipinda ddamuhoollo mwiwa vakhwipi va nthato na otte.

⁸ Ezipinda dda mukhwipi mwa nthato na otte ddaari dda mamita 25. Koma dda mukhwipi mwa enyumba ya Apwiya ddaari ddoorekama mamita 50.

⁹ Vatthi va ezipinda ddenndda vaakhalla mullako embali ya wookhuma nndduwa ovenyera o nthato na otte nko mullako wa nthato waambeelliiwa.

¹⁰ O embali yoomwera owehana ni nthato na enyumbeeyo waakhalla ezipinda ddimodda navettho owiitthoni wiwa waakhalla mpata.

¹¹ Okhuveya, orekama ni mooneyello mattheene a ezipinda ddenndda ddaari ddoophwanaphwana ni ddooweha ompotonndde. Esiri ddiwa nave machiwiiwa yaarittho oophwanaphwana.

¹² Nave ohito wa ezipinda dda omwera waakhalla mullako embali ya wookhuma nndduwa nko yavollowelliiwawo. Waakhallattho esiri yoohiyaniha ezipinda.

¹³ “Vano muthoolle aakilleella wi, ‘Ezipinda ddoompoto ni ddoomwera ddoowehana ni nikhote tti ddaweella. Allupa mukutho ookhalla vakhuviru ni Apwiya ennachellamo ddoovelleella ddoopatuleyesesa. Mwemmo eneerekohellamo ddoovelleella ddenndda vamodda ni ddoovelleella dda yoocha, mikutho ddoopepesella machimo ni mikutho ddoolliva nipuronno tti naweella.

¹⁴ Allupa mukutho yavollowa m'mapuroni aweella ehikhumemo oya o nthato na otte koma ehiyekemo ddoowara nndde enawariiwa yaarumeyellaka vawi tti ddoopatuleya. Enaphwanella eware ddoowara ddimodda ehinaphiye o mapuro a athu.’ ”

Wunnuwa wa enyumba ya Apwiya

¹⁵ Amallihalle olinga enyumba ya Apwiya, naakhuma ni muthoolle va mullako wooweha wookhuma nndduwa nave aalinga nthato nittheene.

¹⁶ Aalinga embali ya wookhuma nndduwa ni epango yoolingelleelle nave yaari yoorekama mamita 250.

¹⁷ Vano aarukunuwa alinga embali ya ompoto ni epangweelle nave yaari yoorekama mamita 250.

¹⁸ Aarukunuwattho alinga embali yoomwera ni epangweelle nave yaari yoorekama mamita 250.

¹⁹ Aarukunuwattho alinga embali ya woovollowa nndduwa ni epangweelle nave yaari yoorekama mamita 250.

²⁰ Sika aalinga embali ddittheddene ddisese. Vaakhalla esiri ddawaapheella nthato nittheene. Orekama ni okhuveya wiwa waari mamita 250. Esireeyo yaari yoohiyaniha ddeko ddoopatuleya ni ddeko shisha.