Ezekiele 41 - Mawu a Mulluku

¹ Vatulli viwa muthoolle aakikusella o echipinda yoopatuleya ya enyumba ya Apwiya, alinga eferemu, okhuveya wiwa waari mamita mararu erive embali.

² Okhuveya wa mullako waari mamita matthanu. Esiri dda mukhwipi ddaari ddookhuveya mamita meelli ni hafu erive embali. Aalinga orekama wiwa wa echipindeeyo nave waari mamita 20, okhuveya wiwa mamita khumi.

³ Vano aavollowa muwariwari alinga eferemu ya va mullako. Yaari ya nimita nimodda nave mullakooyo waari wa mamita mararu. Esiri dda mukhwipi mwa mullakooyo ddaari dda mamita mararu ni hafu erive embali.

⁴ Vatulli viwa aayilinga echipindeeyo aphwanya wi orekama ni okhuveya wiwa waari mamita khumi. Vano aakilleella wi, “Yeella sika echipinda yoopatuleyesesa.”

Ezipinda ddawaatamana ni esiri ya enyumba ya Apwiya

⁵ Vano muthoolle aalinga esiri ya enyumba ya Apwiya nave yaari ya mamita mararu. Vaakhalla ezipinda ddimodda ddoowaapheella enyumbeeyo nave erive echipinda yaari yookhuveya mamita meelli.

⁶ Ezipindannddo ddaari ddootthinddaanyerana, erive echigawo yaari ni ezipinda 30. Va esiri dda enyumba ya Apwiya vaakhalla ddooseerana ezipindannddo wi ddihihameelle esiri ya enyumba ya Apwiya.

⁷ Ezipinda ddootthinddanyeranannddo ddaanavirellella wunnuwa ovenyera va echipinda emodda ophiyera va emodda voothwarani wunnuwa wa ddooseerana ezipindannddo. Vakhwipi va enyumba ya Apwiya vaakhalla masitepe oowellella vaddullu ovenyera va echigawo yavatthi oweella yavariyari ophiya yavaddullu.

⁸ Vano kahoona nikhote noowaapheella enyumba ya Apwiya nno napangille matthipellello a ezipindannddo nave naari na mamita mararu.

⁹ Esiri ya otte wa ezipindannddo yaari yawiitivalla mamita meelli ni hafu. Variyari va nikhotenno

¹⁰ ni ezipinda dda enyumba ya Apwiya vaakhalla nthato na mamita khumi moowaapheella enyumba ettheeneeyo.

¹¹ Ezipinda ddamukhwipinnddo ddaari ddoohulleyella o nikhotenno. Nchiwi nimodda naweha ompoto, nimodda naweha omwera. Wunnuwa wa nikhote noohimakiwa ello naari noowaapheella mamita meelli ni hafu.

Enyumba ya woovollowa nndduwa

¹² Woovollowa nndduwa moowehana ni nthato na enyumba ya Apwiya waakhallattho enyumba emodda yookhuveya mamita 35. Esiriiwa yaari yawiitivalla mamita meelli ni hafu nave yoorekama mamita 45.

Olingiwa wa enyumba ya Apwiya

¹³ Vano muthoolle aalinga enyumbeeyo nave orekama wiwa waari mamita 50. Nthato na enyumbeeyo ni esiri ddiwa ddene ddaari dda mamita 50 vamodda.

¹⁴ Owiitthoni wa enyumba ya Apwiya wookhuma nndduwa wa nthato waari wookhuveya mamita 50.

Dda mu enyumba ya Apwiya

¹⁵ Vano aalinga enyumba yoowehana ni nthato woovollowa nndduwa wa enyumba ya Apwiya ni ettilla dda muwari erive embali. Ddittheddene ddaari dda mamita 50. Nipuro noovollowella, nipuro naweellesesa ni nikhote namuwari nooweha otte,

¹⁶ mawindo ni maferemwiiwa ddaari ddoopangiwa ni matabwa. Vaddullu moowehana ni nikhote, enyumba ya Apwiya yaahuruwelliwa ni matabwa waambeella vatthi ophiyera mumawindoni navettho mawindwaayo yaahuruwelleya.

¹⁷ Vaddullu va mullako woovollowella o echipinda yamuwari

¹⁸ yaajambulavo ezithunzi dda akerubi* ni dda muteekho wakanjeza. Kerubi mmodda aari variyari va miteekho ddakanjeza miilli. Arive kerubi aari ni ekhove piilli,

¹⁹ emodda ya muthu yoomuweha kanjeza a embali emodda nave emodda yaari ya mukango yoomuweha kanjeza mmoddooyo. Ddaari ddiiddo waapheella enyumba ettheene.

²⁰ Sika ovenyera vatthi ophiyera vaddullu va machiwi vaajambuliwa ezithunzi dda akerubi ni ddamiteekho ddakanjeza.

²¹ Orekama ni okhuveya wa eferemu dda echipinda yaweellesesa waari woophwanaphwana. Owiitthoni wa nipuro noopatuleyesesa waakhalla ello yawooneya wonanko

Nikuwa namatabwa

²² nikuwa namatabwa. Nayiille muddullu nimita nimodda ni hafu, orekama ni okhuveya wiwa waari nimita nimodda. Eferemwiiwa, vatthi viwa ni esiri ddiwa ddaari ddoopangiwa ni muteekho. Muthoolle aakilleella wi, “Tebulo yoolla sika anakhalla vamiitthoni va Apwiya.”

Machiwi a mu enyumba ya Apwiya

²³ Echipinda yaweella yaari ni machiwi meelli nave echipinda yaweellesesa naarittho ni machiwi meelli.

²⁴ Va nirive nchiwi vaakhalla ezigawo piilli ddookawaneya.

²⁵ Vanchiwinimvo yaajambulavo ezithunzi ddaakerubi ni ddakanjeza wonanko vasirini valle. Otte wiwa waari wonanko vaddullu va nikhote namuwari vootthomeelliwa ni matabwa.

²⁶ Embali ddittheddene dda nikhote namuwarinno vaakhalla mawindo nave esiri ddiwa ddittheddene yaajambulavo ezithunzi ddakanjeza.