Ezekiele 40 - Mawu a Mulluku

Masomphenya a enyumba ya Apwiya yanaanweene

¹ Vawaambawaamba va muyakha, nllapo na khumi na mweeri, muyakha wa 25 wa okaporwaahu, viviralle miyakha khumi ni misese Yerusalemu oonongiwe, nnatta na Apwiya naakiphara nikikusella o Yerusalemu.

² M'masomphenya, Apwiya yaakikusella o ellapo ya Israele ekihiya vamwaangoni woorekama mvo koonilleemi yoomakiwa wonanko muzinda omwera.

³ Ekiphiyihalle wenko kaamoona muthu oowala wonanko mukuwa. M'mattani mwaye mwaari mukwe wabafuta ni epango yoolingella nave ahiimella vamullakoni.

⁴ Muthooyo aakilleella wi, “We mwaana a muthu, wehesesa nave apella maaru phaama. Ohiyevo murima va ddittheddene kinaawoonihelleemi vawi yeella sika ekaambiiwa kuuwiihelleemi wuno. Vano waatthopoollelle Aisraele ddittheddene nnddo kinuulleelleemi nave onooneewe.”

Mullako wa wookhuma nndduwa

⁵ Vano ngoonani, vaakhalla esiri yaapheelle otte wa enyumba ya Apwiya. Muthu aakusa m'mattani mwaye epango yoolingella. Orekama wiwa waari mamita mararu. Aalinga wiitivalla wa esireeyo waari wonanko orekama wa epangweeyo, oya muddullu wiwa waarittho wonanko epangweeyo.

⁶ Aaya o mullako wooweha wookhuma nndduwa awella vamasitepeni alinga oramballalla wa vatthi va mullakooyo nave waari wonanko orekama wa epangweeyo.

⁷ Vaakhallattho ezipinda dda alonda. Orekama ni okhuveya wiwa waari woophwanaphwana ni orekama wa epangweeyo. Mpata wa variyari va ezipindannddo waari mamita meelli ni hafu. Nave vatthi va mullako wamuwari vaari voorekama wonanko epangweeyo.

⁸ Alingalle nthato nooya o mullako aphwanyille wi narekamme mamita masese.

⁹ Alingalle apoto a va mullako aphwanyille wi yaari awiitivalla nimita nimodda. Nikhote na nthato nooya omullakoni nawehana ni enyumba ya Apwiya.

¹⁰ Muwari mwa mullako wa wookhuma nndduwa mwaakhalla ezipinda dda alonda ddiraru erive embali. Ddiraru ddene ddaari ddoophwanaphwana nave apoto a variyari va ezipindannddo yaari awiitivalla moophwanaphwanattho.

¹¹ Vatulli viwa aalinga mullako muttheene nave waari wooramballalla mamita matthanu ni nimodda ni hafu nave alingalle voovollowella vaari vooramballalla mamita matthanu.

¹² Owiitthoni wa ezipinda dda alonda waakhalla esiri yooya muddullu ni yooramballalla hafu mita. Ezipinda ddirarunnddo ddaari dda mamita mararu embali ddittheddene.

¹³ Vano aalinga orekama wa mullako ovenyera o esiri ya otulli wa echipinda emodda ophiya o esiri ya echipinda emodda, ovenyera o nchiwi nimodda ophiya o nchiwi nimodda. Orekama wiwa waari mamita khumi ni meelli ni hafu.

¹⁴ Vatulli viwa aalinga nikhote namuwari nave naari noorekama mamita khumi. Nave voowaapheella nikhotenno vaakhalla nthato.

¹⁵ Ovenyera va mullako wa voovollowella ophiya o nikhote na mullako wamuwari vaari voorekama mamita 25.

¹⁶ Esiri dda ezipindannddo ni esiri dda variyari va ezipindannddo ddaakhalla ni mawindo. Nikhote namuwari naakhallattho ni mawindo muwari mwiwa. Va esiri ddittheddene yaajambulavo miteekho ddakanjeza.

Nthato na otte

¹⁷ Vano muthoolle aakivollochiha mu nthato na otte nave kahoona ezipinda ni musewu wamalluku waapheella nthato nittheene. Ezipinda ddittheddene vamodda ddaari 30 nave ddaweha musewooyo.

¹⁸ Misewu ddaavira mukhwipi mwa millakonnddo. Yoolla waari musewu wa muhito.

¹⁹ Vano aalinga muwari mwa nthato ovenyera o mullako wamuhito ophiyera mullako wa otte wa nthato namuwari. Orekama wiwa waari mamita 50.

Mullako wa ompoto

²⁰ Vatulli viwa aalinga mullako wa ompoto wooweella o nthato na otte. Aalinga orekama ni okhuveya wiwa.

²¹ Ezipinda dda alonda nnddo ddaari ddiraru erive embali apotwiiwa ni nikhote niwa na muwari ddaari ddoophwanaphwana ni mullako wawaamboolle. Orekama wiwa waari mamita 25 nave okhuveya wiwa waari mamita khumi ni meelli ni hafu.

²² Mawindwiiwa, nikhote niwa namuwari navettho kanjeza oojambuliwa vasirinoolle ddittheddene ddaari ddoophwanaphwana ni mullako wooweha wookhuma nndduwa. Mullako muullupalloolle waakhalla ni masitepe matthanu ni meelli nave nikhote niwa naari muwari.

²³ Mullako woophwanaphwana ni wa wookhuma nndduwoolle waaphiya o nthato namuwari noowehana ni mullako wa ompoto. Aalinga ovenyera o mullako mmodda ophiya o mullako mmodda nave orekama wiwa waari mamita 50.

Mullako wa omwera

²⁴ Vatulli viwa muthoolle aakikusella o mullako wa omwera nave kahoona mullako wooweha omwera. Aalinga apoto ni nikhote niwa namuwari nave ddaari ddoophwanaphwana ni ddimoddanndde.

²⁵ Ezipinda dda mullako yoolla ni nikhote niwa namuwari naakhalla ni mawindo wonanko a ezipinda ddimodda. Orekama wiwa waari mamita 25 nave okhuveya wiwa waari mamita khumi ni meelli ni hafu.

²⁶ Vaakhallattho masitepe matthanu ni meelli nave nikhote niwa naari muwari. Vasirini viwa vaajambuliwa ezithunzi dda muteekho wakanjeza erive embali.

²⁷ Nthato namuwari naakhalla ni mullako wooweha omwera. Aanilinga ovenyera vaava ophiyera mullako wa otte, orekama wiwa waari mamita 50.

Nthato na muwari, mullako wa omwera

²⁸ Muthoolle akivollochiha mu nthato namuwari oweella mullako wa omwera. Aalinga mullakooyo nave waari woophwanaphwana ni ddimoddanndde.

²⁹ Ezipinda ddiwa, apotwiiwa ni nikhote niwa namuwari ddaari ddoophwanaphwanattho ni ddimoddanndde. Ezipindannddo ddaakhalla ni mawindo virive veko ni mukhote mwene. Orekama wiwa waari mamita 25 nave okhuveya wiwa waari mamita khumi ni meelli ni hafu.

³⁰ Vano vaakhalla nikhote noowaapheella nno naari na mamita khumi ni meelli nave nookhuveya mamita meelli ni hafu.

³¹ Nikhote niwa namuwari naweha nthato na otte. Vasirini viwa vaajambuliwa echithunzi ya muteekho wakanjeza nave naakhalla ni masitepe matthanu ni mararu.

Nthato na muwari, mullako wa wookhuma nndduwa

³² Vano muthooyo aakikusella o nthato namuwari na wookhuma nndduwa. Aalinga mullakooyo nave waari woophwanaphwana ni ddimoddanndde.

³³ Ezipinda ddiwa, apotwiiwa ni nikhote niwa namuwari ddaari ddoophwanaphwana ni ddimoddanndde. Ezipindannddo ddaakhalla ni mawindo virive veko ni mukhote mwene. Orekama wiwa waari mamita 25 nave okhuveya wiwa waari mamita khumi ni meelli ni hafu.

³⁴ Nikhote niwa namuwari naweha nthato na otte. Vasirini viwa vaajambuliwa echithunzi ya muteekho wakanjeza nave naakhalla ni masitepe matthanu ni mararu.

Nthato na muwari, mullako wa ompoto

³⁵ Vano muthooyo aakikusella o mullako wa ompoto. Aalinga mullakooyo nave waari woophwanaphwana ni ddimoddanndde.

³⁶ Ezipinda ddiwa, apotwiiwa ni nikhote niwa namuwari ddaari ddoophwanaphwana ni ddimoddanndde. Ezipindannddo ddaakhalla ni mawindo virive veko ni mukhote mwene. Orekama wiwa waari mamita 25 nave okhuveya wiwa waari mamita khumi ni meelli ni hafu.

³⁷ Nikhote niwa namuwari naweha nthato na otte. Vasirini viwa vaajambuliwa echithunzi ya muteekho wakanjeza nave naakhalla ni masitepe matthanu ni mararu.

Ezipinda ddoovelleellellamo mukutho wa enama

³⁸ Vaakhalla echipinda ni nikhote niwa vakhuviru ni nikhote namuwari na mullako wa ompoto nko yahuwelliiwawo enama ya mukutho wooshellelliha.

³⁹ Mukhotemmo mwaakhalla matebulo meelli o erive embali. Yaaniiphellavo enama dda mukutho wooshellelliha, mukutho woopepesella machimo ni mukutho woolliva.

⁴⁰ O embali emodda ya nikhote na otte vamasitepeni oowellella va mullako wa ompoto waakhalla matebulo meelli nave embali emodda ya mullako waakhallattho matebulo meelli.

⁴¹ Attheene vamodda yaari matebulo matthanu ni mararu muwari ni otte wa mullakooyo. Vamatebulonimvo yaaniiphellavo enama dda mukutho.

⁴² Matebulo masese a mukutho wooshellelliha yaari a malluku oosema. Orekama ni okhuveya wa arive tebulo waari masentimita 75 nave oya muddullu wiwa waari masentimita 50. Vatebulonimvo yaanahiyavo ezipangizo ddawiiphellana enama ddamukutho wooshellelliha ni mikutho ddimodda.

⁴³ Vano enama ddamukuthonnddo yaanaddihiya vamatebulonimvo. Nave embeza ddookhuveya yaanaddimakellella waapheella muwari mutthemwene.

Ezipinda dda allupa mukutho

⁴⁴ Vano muthoolle aakikusella muwariwari mwa nthato nave muwari mwa nthatonno kahoonamo ezipinda piilli, emodda vakhuviru ni mullako wa ompoto moowehana ni omwera nave emodda vakhuviru ni mullako wa omwera moowehana ni ompoto.

⁴⁵ Vano aakilleella wi, “Echipinda yooweha omweerelle tti ya allupa mukutho oorumeyella enyumba ya Apwiya.

⁴⁶ Echipinda yooweha ompotweella tti ya allupa mukutho oorumeyella nikuwa. Allupa mukutho attheene, edduullu dda Zadoki tti yaayove mwa edduullu dda Levi ayo enaaphiyeke vakhuviru wi yaarumeyelleke Apwiya.”

Nthato namuwari ni enyumba ya Apwiya

⁴⁷ “Vano muthoolle aalinga nthatonne nave orekama wiwa ni okhuveya wiwa waari woophwanaphwana, mamita 50. Nikuwa naari owiitthoni wa enyumba ya Apwiya.

⁴⁸ Vatulli viwa aakikusella mu nikhote namuwari na mu enyumba ya Apwiya. Aalinga apoto a nikhotenno nave ddaari dda mamita meelli ni hafu erive embali nave okhuveya wa mullako waari mamita matthanu ni meelli. Wiitivalla wa esiri dda vakhwipi va mullako ddaari nimita nimodda ni hafu embali ddittheddene.

⁴⁹ Nikhote na muwari naari noorekama mamita khumi nave nookhuveya mamita matthanu ni nimodda. Vaakhalla masitepe khumi nave vakhwipi va esiri vaakhalla apoto eelli, mmodda erive embali.”