Ezekiele 4 - Mawu a Mulluku

Ezekiele anallotella dda ekhoto ya o Yerusalemu

¹ Mulluku aallota wi, “We mwaana a muthu, kusa nivalli onihiye vamiitthoni vawo nave olembevo mooneyello a muzinda wa Yerusalemu.

² Owaapheelle muzindooyo ni ddeko ddakhoto monga nttattha, esiri, misasa ni ddookumullella.

³ Okuse mukoko, owiimese wonanko esiri variyari va weyaano ni muzindooyo. Owuwehesese muzindooyo nave otthipelle misasa ddakhoto ddawaapheella. Yeella enaakhalle echizindikiro wa Aisraele.”

⁴ “Vano okonaatthelle wuunyotthoni wawo nave machimo a Aisraele kineerewaahiya va weyaano. Oneerewiireya machimwiiwa mallapo mattheene ayo onaakonaatthelleewe embali yeeyo.

⁵ Kohuuhiyera mallapo 390 ophwanaphwaniha ni miyakha dda machimo a Aisraele. Mmu tti mmo oniireyelleewe machimo a Aisraele.

⁶ Wamalliha ddenndda orukunuwe okonaatthelle onnattanattani. Kohuuhiyera mallapo 40 ophwanaphwaniha ni miyakha dda machimo a Ayuda.

⁷ Owehesese misasa ddakhoto ddawaapheella Yerusalemu. Okwinye muwono wa mukanjwaawo, otukhullelle muddullu nave ollotelle moomuhumullulla Yerusalemu.

⁸ Vano kineerewuumaka ni mikwe wawi khoworaka orukunuwa ophiyera omallihalle mallapo awaapheella Yerusalemu.”

⁹ “Vano omukuse tirigu, barele, mbwanda, namurovo, mavilla ni khakwe. Ddittheddenenndda oddihiye mu embale emodda nave omwaapeye buledi. Ocheke wa mallapo 390 okonaatthelle embali emodda.

¹⁰ Onaacheke magaramu 230 a buledi omodda vanllaponi.

¹¹ Onaawiryeke makapu meelli amaaddi omodda vanllaponi.

¹² Onaamucheke buledooyo wonanko makeke a barele. Mashi awumma aathu sika enaakhalle ekhuni ddawaapeyella nave onaaphariheke mutteko vaweella.”

¹³ Vano Apwiya yaallota wi, “Buledi yoolla tti oophwanaphwaniha ni yoocha yooripihiwa eyo enaacheke Aisraele o ellapo ddeelleto nnddo kinaawiikarihelleemiwo.”

¹⁴ Koma miyaano kaallota wi, “Nyu Apwiya Mulluku, miyaanothi nginiiripiheke ddiidda. Ovenyera enamwanaaka ophiyera ollello, nginachekevo enama yookhwa weekhiiwa apaalle yoottakhuniwa ni enama ddamuhakani, enama yooripihiwa khenaphiyeke vayanoni vaka.”

¹⁵ Vano alliwa yaallota wi, “Ee, koowaakhullella wi ophariheke mutteko mashi eeng'ombe munipuroni mwa mashi aathu voomwaapeyani buledi.”

¹⁶ Vano yaallota wi, “We mwaana a muthu, athu a o Yerusalemu kineerewaayevihellavo buledi a nllapo ni nllapo. Athwaayo bulediiwa anaakhalleke oolinga nave enaamucheke ekhupanyaka. Maaddiiwattho enaakhalleke oolinga nave enaawiryeke mwawoova.

¹⁷ Sika yoocha ni maaddi ddinaamallelleke vang'ono vang'ono. Eneerekowehana mookhupanya nave eneerewoonda ekaamba ya machimwiiwa.”