Ezekiele 39 - Mawu a Mulluku

Ogonjihiwa wa Gogi

¹ “We mwaana a muthu, llotella ddoomuvaanyiha Gogi. Omulleelle wi mi Apwiya Mulluku kinallota wi, ‘Ngoona, kiri mudanaawo, we Gogi, mwene muullupalli a o Mesheki ni a o Tubala.

² Kineerewuurukunusa ni owiikariha, wuukusa ovenyera o ellapo ya woorekama ompoto nave kineerewuuruma wi wallipane ni athu ookhalla o miyaango dda Israele.

³ Kineerewinttaka muuraawo wawuunyotthoni ni wuutathilliha mipaamba ddawo dda o nnattanatta nawo.

⁴ Oneerewiikuha o miyaango dda o Israele, weyaano, akhotwaawo ni attheene enuukavihera. Kineerewuutthattusa yoocha ya neekhwaambe ni ya enama ddamuhakani

⁵ Oneerokhwella ohakani vawi killotille tti miyaano. Mi Apwiya Mulluku koollota.

⁶ Kineeromoriha munllo va ellapo ya Magogi ni va attheene ayo enakhalla mwamurendelle mukhwipi mwa enyanja. Sika eneerodduwella wi mi tti Apwiya.’

⁷ “Kineerodduwanyeyiha nnddina naka naweella variyari va athwaaka Aisraele nave ngaakhullella wi nnddina naka niripihiwettho. Athu a mitundu ddimodda eneerodduwella wi mi tti Apwiya, aweella a o Israele.

⁸ Mi Apwiya Mulluku kinallota wi ddinimawa nave ddineereweereya moollikana ni mmo killotelleemi.

⁹ “Ookhalla mu mizinda dda Israele eneerokhuma nave eneerotthukumaniha ezida ddakhoto ddoohiyiwa monga ezishango, miira, mipaamba ni ekoonda oddihella munllo wonanko ekhuni miyakha mitthanu ni miilli.

¹⁰ Kheyaashaka ekhuni ohakani apaalle otthalla ekhuni muutthakoni. Munllwiiwa enaakharihelleke ezida ddennddo. Eneerowaakha ayo yawaakha nave eneerowiiyera ayo yawiiyera. Mi Apwiya Mulluku koollota.”

Ovitthiwa wa Gogi

¹¹ “Nllapo nenno Gogi kineeromuvaha mahame wi avitthiwemo mu ellapo ya Israele, mu ntapo na Athu Avoolendoni, wookhuma nndduwa wa Enyanja Yookhwa. Ettilla yooweella mu ntapo na Athu Avoolendoni eneerowalleya kaambiiwa Gogi ni akhotwaaye eneerovitthiwa wenko nave ntaponno nineeroromolliwa ntapo na Mulloko Wakhoto wa Gogi.

¹² Aisraele eneerovittha mitembo wa miyeri mitthanu ni miilli wi eyeellihe ellapweeyo.

¹³ Athu attheene a mwiillaponimmo eneeroddivitthana nave mutteko yooyo eneerovuwana nllapo nno kinaawooniheemi ntitimiho naka. Mi Apwiya Mulluku koollota.

¹⁴ Miyeri mitthanu ni miilli ddamalla eneerewaatthoolla athu wi yeeteete mu ellapo ettheene wi yaashaashe mitembo nnddo ddihanlle ni oddivuhella, sika eneereweelliha ellapweeyo.

¹⁵ Yaaweetaka mwiillaponimmo nave yoona nikhuva na muthu, eneerekohiyavo echizindikiro vakhwipi viwa ophiyera nikhuvanno nivitthiwe mu ntapo na Mulloko Wakhoto wa Gogi.

¹⁶ Wenkottho oneerokhalla muzinda wooromolliwa Hamona, ottaphullella mulloko wakhoto. Vano ellapweeyo eneerokhalla yaweellihiwa.

¹⁷ “We mwaana a muthu, mi Apwiya Mulluku kinallota wi, ‘Oddiithane epallame ni enama ddamuhakani, oddilleelle mawaaka awi tthukumanani muwe wuno. Ithanihanani ovenyera embali ddittheddene. Muwe o machellello a mukutho muullupalli ayo kinuukhozelleemini o miyaango dda Israele. Wenko muneerottakhunawo enama ni owirya nikhame.

¹⁸ Muneerottakhuna enama ya akhoto amasiva nave muneerowirya nikhame na enduna dda va ellapo yavatthi. Attheenaayo eneerewiiphiwa wonanko nankhoro a enkhosa, asaanaankhosa, epuri navettho wonanko anankhoro a eng'ombe ddooneneva dda o Bashani.

¹⁹ O machellello a mukutho ayo kinuukhozelleemini muneerocha ddoonuna ophiyera ovona. Muneerowirya nikhame ophiyera olezela.

²⁰ Ddawoona o tebulwaaka muneerovona vawaattakhunani akavalo ni oowellavwiiwa, akhoto amasiva ni akhoto oohiyanahiyana’ Mi Apwiya Mulluku koollota.”

Aisraele eneerohokolloselliwa vaphaama

²¹ “Kineerewooniha ntitimiho naka variyari va mitundu ddittheddene. Vano eneerewoona mmo kinaawaallakelleemi ni nnatta naka nno kinaawaatthinddanyereemina.

²² Waambeella nllapo nenno oya muhoollo Aisraele eneerodduwella wi mi tti Apwiya Mullukwiiwa.

²³ Athu a mu ellapo ddimodda eneerodduwella wi Aisraele yaaphariwa okaporo ekaamba ya machimwiiwa nave ekaamba ya ohiroromelleya. Kahaareya etulli nave kahaavelleella m'mattani mwa adaniiwa. Vano attheenaayo yaakhwa vakhotoni.

²⁴ Kaaweerella ddenndda ekaamba ya oripihiwa wiwa ni machimwiiwa nave kahaareya etulli.

²⁵ “Vano mi Apwiya Mulluku kinallota wi, ‘Vano a nlloko na Yakobo kineerewaahokollosella vaphaama. Aisraele attheene kineeroweerella echifundo. Kineeroniteteza nnddina naka naweella.

²⁶ Athwaayo eneerokeraattheya mwamurendelle mwiillaponi mwiwa, oohikhallavo owaakatamiha. Eneerotiwalla ddoowulliha muru ddiwa nnddo ddaamorenlle ekaamba ya ohikiroromella.’

²⁷ Kineerewaahokollosella owaniwa waavenyiha variyari va mitundu ddimodda ni waatthukumaniha ovenyera o ellapo dda adaniiwaayo. Vano kineerewooniha vamiitthoni va mitundu ddinchichi wi mi tti aweella.

²⁸ “Sika eneerodduwella wi mi tti Apwiya Mullukwiiwa, vawi kahaarumiha wuukaporoni variyari va mitundu ddimodda nave kineerewaahokollosella attheene o ellapwiiwa woohimuhiya naari mmodda.

²⁹ Ngiwa kaareya etulli vawi kineerohella munepaaka wa Aisraele. Mi Apwiya Mulluku koollota.”