Ezekiele 36 - Mawu a Mulluku

Mulluku anamudalisa Israele

¹ Apwiya yaallota wi, “We mwaana a muthu, ollotelle miyaango dda o Israele, oddilleelle wi, ‘Nyu miyaango dda o Israele apellani maaru mawu a Apwiya Mulluku.’

² Apwiya Mulluku enallota wi adanaanyu yaallota wi, ‘Vano miyaango ddakhallenndde ddootthattuwa ddaahu.’

³ Sika vano ollalleye ni waalleella wi mi Apwiya Mulluku kinallota wi, ‘Adanaanyu yuutthattusalleewani echipululu ni wuunyingallellani o embali ddittheddene ophiyera nyuwaano mwaakhalla m'mattani mwa mitundu ddimodda ddittheddene, athu yaanuullotani ni wuunyemullani.

⁴ Sika ekaambiiwa nyuwaano, miyaango dda o Israele, iwani nnddo mi Apwiya Mulluku kinalloteemi wa miyaango ni asimiyaango, mitthipidda ni matapo, matepe ni mizinda ddoohiyiwa nnddo ddikhanlle ddaakhiwaka ni ovevulliwa ni athu a mitundu ddoowaapheella.

⁵ Mi Apwiya Mulluku kookhalla killotaka kishille murima owiipa mullatu athu a mitundu ddimodda ddittheddene monga Edomu. Alliwa moohakallalla wunchichi navettho moovevulla yahaakha ellapo ettheene eyitthattusa yayiwa, ekusa ni mapuro oochihella enameene.’

⁶ “Sika llotella wa ellapo ya Israele nave olleelle miyaango ni asimiyaango, mitthipidda ni matapo wi mi Apwiya Mulluku kinallota kishille murima wunchichi kaambiiwa mwaavillella ovevulliwa woovenyera o mitundu ddimodda.

⁷ Sika koollupella vamiitthoni vaka wi alliwattho athu a mitundu ddoowaapheella eneerovevulliwa.

⁸ Koma nyuwaano miyaango dda o Israele, muneerophuwattho enthambi nave athwaaka Aisraele muneerowimmihella ezipaso vawi eri vakhuviru ohokollweella owaniwa.

⁹ Miyaano kiri ni nyuwaano, kineerewuuhokollweellani nave muneerollimiwattho ni waalliwa.

¹⁰ Kineerewuuruuwihellani athu mu ellapo ettheene ya Israele. M'mizindani muneeromakamottho erive ello yoonongiwe.

¹¹ Kineerewaaruuwiha athwaanyu owaaka eziweto ddanyu. Aneerewaata nave eneerewaayara anamwani anchichi. Kineeroweerihani wi mukeraattheye wonanko khalle nave kineeroweerellani ddaphaama okhwaranya khalle. Sika muneerodduwella wi mi tti Apwiya.

¹² Kineeroweeriha athwaaka, Aisraele wi yeete va nyuwaano. Alliwa eneerokeraattheyamo nave muneerokhalla yoohallaniiwa. Khamuwa muwaakhattho aniiwa.”

¹³ Mi Apwiya Mulluku kinallota wi, “Athu amodda ennallota wi weyaano tti ellapo yowaattakhuna athwaaye nave yoowaakha anamwani a mutundwaaye.

¹⁴ Khowa waattakhunattho athu apaalle owaakha anamwani a mutundwaawo. Mi Apwiya Mulluku koollota.

¹⁵ Ngaakhullellattho wi wiiwe ovevulla wa athu a mitundu ddimodda apaalle khowa ovillella onyemulla wiwa nave khowa waakwakwatuwiha athu a mu ellapwaawo. Mi Apwiya Mulluku koollota.”

Okumi wanaanweene wa Israele

¹⁶ Mawu a Apwiya yaawa wa miyaano wi,

¹⁷ “We mwaana a muthu, Aisraele yakhalliiwa mwiillaponi mwiwa yaayiripiha ni makhallellwiiwa navettho ddaweera ddiwa. Kahoona wi makhallellwiiwa yaari oonanara va mallapello wonanko mutthiyana ari omweerini.

¹⁸ Kahaashella murima ekaamba ya nikhame na athu nno alliwa yamorihalliiwa mwiillaponimmo nave ekaamba ya mafano ayo alliwa yaripihalliiwana ellapweeyo.

¹⁹ Kahaamwara variyari va mitundu ddimodda nave kahaapallallesella o ellapo ddoohiyanahiyana. Kaaweeruza moollikana ni makhallellwiiwa ni ddaweera ddiwa.

²⁰ Yaphiya variyari va mitundu ddimodda orive weko yayiiwawo yaaripiha nnddina naka naweella. Ddaari ddiiddo kaambiiwa athu voollotani dda alliwaayo yallota wi, ‘Alla tti athu a Apwiya koma yaavenyihiwa o ellapwiiwa.’

²¹ Sika miyaano kaanakhupanya ekaamba ya nnddina naka naweella nno Aisraele yaniripihalliiwa variyari va mitundu ddimodda nko yayiiwa.

²² “Sika alleelle Aisraelaayo wi mi Apwiya Mulluku kinallota wi nnddo kinaaweereemi ngeera ekaamba ya nyuwaano, Aisraele koma ekaamba ya nnddina naka naweella nno mwaniripihalleenyu variyari va mitundu ddimodda nko mwayiilleenyuwo.

²³ Kineeronooniha nnddina naka nuullupalli wi tti naweella, nno nakhanlle nivevulliwaka variyari va mitundu ddimodda. Vano mitundu ddimodda ddadduwella wi kohooniha weella wa nnddina naka mwa nyuwaano eneerodduwella wi mi tti Apwiya. Mi Apwiya Mulluku koollota.

²⁴ Kineerewuukhumihani variyari va mitundu ddimodda, kineerewuutthukumanihani ovenyera o erive ellapo nave kineerewuuhokollosellani mu ellapwaanyu.

²⁵ Kineerewuumiddani maaddi aphaama wi mweelle o ddittheddene ddawuuripihani. Navettho kineeroweellihani voovenyihani mafanwaanyu mattheene.

²⁶ Kineerewaavaha murima wanaanweene ni munepa musha. Kineerovenyiha murima wawumma wonanko nlluku nave kineerewaavaha muwari mwiwa murima wawoollowa wonanko muhehe.

²⁷ Kineerohiya munepaaka mwa nyuwaano nave kineeroweerihani wi muthwareke malangizwaaka ni osunga malamulwaaka.

²⁸ Muneerokhalla mu ellapo eyo kaavahilleemi makhollwaanyu. Muneerokhalla athwaaka nave miyaano kineerokhalla Mullukwaanyu.

²⁹ Kineerewuuvullusani o ddittheddene ddawuuripihani. Kineerewuuruuwihellani tirigwaanyu nave ngiwa kuumorihellani ettalla.

³⁰ Kineerewimmiha miteekho ezipaso ddinchichi nave ethaya eneerokhumiha ddoohata ddinchichi sika wi khamuwa muvevuwattho ekaamba ya ettalla variyari va mitundu ddimodda

³¹ Vano muneerewuupuwella makhallellwaanyu ni mitteko ddanyu ddoonanara. Muneerowulliwa muru ekaamba ya machimwaanyu ni ddoonanara nnddo mwaddeerilleenyu.

³² Dduwellani wi kineereweera ddenndda woohikhalla ekaamba ya nyuwaano. Mi Apwiya Mulluku koollota. Sika Aisraele attheenenyu wulliwani muru nave morihani ekhove ekaamba ya makhallellwaanyu oonanara.

³³ “Mi Apwiya Mulluku kinallota wi, ‘Kaavenyihaka machimwaanyu kineerewaahiyamo athu m'muzindanimmo nave muneeromaka enyumba m'matepeni

³⁴ Athu eneerekoyillimattho ethaya elle yatthattuwalle ntthalla nave arive muthu oovira muttilla ayoona wonanko echipululu vano aneerekoyoona wi yoollimiwa.’

³⁵ Eneerekollota wi ‘Ethaya elle yatthattuwalle ntthalleelle vano yootthattuwa emata wonanko ya Edeni. Vano munnakhalla athu m'mizindani nndde khalle ddaari matepe oohiyiwa ni awoonongeya. Navettho mizindannddo vano ddookhalla ni mipanda ddoollipa.

³⁶ Athu a mitundu ddimodda ayo yahanlle vakhuviru ni nyuwaano eneerodduwella wi mi Apwiya sika kamakillettho mizinda ddawoonongeya ni waallattho ddeko ddanaanweene mu ethaya yoohiyiweeyo. Mi Apwiya koollota ddenndda nave kineereweera.’

³⁷ “Mi Apwiya Mulluku kinallota wi, ‘Kineerowaakhullellattho Aisraele wi ekiveke nnddo enapaalliiwa wi kiweerelle. Kineerewaaruuwiha athwiiwa wonanko enkhosa.

³⁸ Eneerewaata wonanko enkhosa dda o Yerusalemu nnddo yaaddivelleelliiwa mikutho va enthawi ya ehakallallo. Sika matepe a mizinda ddiwa eneeroddalla ni milloko dda athu nave alliwa eneerodduwella wi mi tti Apwiya.’ ”