Ezekiele 34 - Mawu a Mulluku

Abusa a Aisraele

¹ Mawu a Apwiya yaawa wa miyaano wi,

² “We mwaana a muthu, llalleya mawu awaavaanyiha abusa a Aisraele. Llotella nave llota waalleelle wi, ‘Nnddo enallota Apwiya Mulluku tti ddawi, otulli wa nyu abusa a Aisraele, nyu muniipwatha nyookha. Ethiyo keesa abusa enaphwanella opwatha enkhosa?

³ Munnawirya mukaka, munnawara dda obweya nave munniipha enama ddooneneva koma woohiddipwatha enkhosa.

⁴ Khamuddillipihalle enkhosa ddoofooka, khamuddichirihalle ddoovoriiwa, khamuddimakille makhwatiiwa ddoophoreya, khamuddihokollosille ddoohollowa nave khamuddaashaashille ddoorimella. Koma mwaanaddichiha mweekuku.

⁵ Sika ddaanapallalleya vawi khavaari mbusa. Vano ddaatthattuwa yoocha ya enama ddamuhakani ddittheddene.

⁶ Enkhosa ddaka ddaapallalleya ddineeteeta omiyaangoni ni o asimiyaango oorekama. Ddaapallalleyella mwiillaponi ddittheddene oohikhallavo mmodda ooddithwara apaalle oddaashaasha.’

⁷ “Vano nyu abusa, apellani maaru nnddo enallota Apwiya.

⁸ Kinimallupella vamiitthoni vaka, enkhosa ddaka ddaattakhuniwa, ddaatthattuwa yoocha ya enama ddamuhakani kaambiiwa ddaarama mbusa. Abusaaka kheyaaddithwanre enkhosa ddaka, yapwatha ddayiwave.

⁹ Sika nyu abusa, kaapelleni maaru mi Apwiya.

¹⁰ Mi Apwiya Mulluku kinallota wi nyu abusa tti adanaaka. Kineerowaakhani enkhosa ddaka, khamuwa muddichihattho. Kineerewuuhiihani mutteko woobusa wi muhiwe mupwathattho dda nyookha. Kineerovullusa enkhosa ddaka muwano mwanyu nave khamuwa muddittakhunattho.”

Mbusa aphaama

¹¹ Mi Apwiya Mulluku kinallota wi, “Vano enkhosa ddakannddo kineeroddaashaasha mwaneenaaka nave kineeroddipwatha.

¹² Mmo mbusa anaashaashelleeye enkhosa ddaye ddapallalleyella wuuteete, miyaanottho kineereweera emoddamoddave yeeyo. Kineeroddivullusa orive weko nko ddapallalleyelliiwawo va enthawi ya epiphi ni ya ethapo.

¹³ Kineeroddikhumiha variyari va mitundu dda athu, kineerodditthukumaniha ovenyera o ellapo ddimodda nave kineeroddihokollosella o ellapwiiwa. Kineerekoddichiha o miyaango dda o Israele vakhuviru ni mihinje ddiwa ni mapuro mattheene aphaama nko onakhalla athu.

¹⁴ Kineerekoddichihella o mapuro aphaama nave ddineerekocha munyepu wooneneviha o miyaango ddoorekama dda o Israele. Wenko ddineerewiithuuwa o mapuro a munyepu waphaama. Ddineerophwanya mapuro aphaama o miyaango dda o Israele.

¹⁵ Miyaano mwaneenaka kineerokhalla mbusa a enkhosa ddaka. Nave kineeroddivullusa. Mi Apwiya Mulluku koollota.

¹⁶ Kineeroddaashaasha ddaweeteeta kineeroddihokollosa ddoohollowa, kineeroddimaka makhwatiiwa ddoophoreya, kineeroddillipiha ddoofooka koma kineeroddoononga ddooneneva ni ddamasiva. Kineeroddichiha enkhosa ddaka mwa echilungamo.”

¹⁷ “Vano voollotani dda nyuwaano, enkhosa ddaka, mi Apwiya Mulluku kinuulleellani wi kineereweeruza variyari va enkhosa ni enkhosa ekhwiiwa, variyari va nankhoro a enkhosa ni a epuri.

¹⁸ Ethiyo nyuwaano khamunakwakhwanihiwa ni ocha va nipuro naphaama? Vano kaambiiwa tini munanyingallelleenyu nnddo muhinacheenyu? Ethiyo nyuwaano khamunakwakhwanihiwa ni owirya maaddi aphaama? Vano kaambiiwa tini mununttuwanyereenyu maaddi ayo muhinaawiryeenyu.

¹⁹ Ethiyo munapaalla wi enkhosa ddaka ddicheke manasi ayo mwaanyingallelleenyu nave ddiwiryeke maaddi ayo muwunnttuwanyereenyu?

²⁰ “Vano mi Apwiya Mulluku kinuulleellani wi miyaano mwaneenaaka kineereweeruza variyari va enkhosa ddooneneva ni ddimodda ddawoonda.

²¹ Munnaddittuulla ni oddikakhella okhwipi Ddoofooka, munnaddikhuddulla ni manyakaanyu nave muddimwaramwarella wuuteete.

²² Koma kineeroddivullusa enkhosa ddaka nave ngaakhullella wi ddittakhuniwe. Kineereweeruza variyari va enkhosa ni enkhosa ekhwiiwa.

²³ Kineerewakeraatthihella mbusa mmodda, oorumeyellaaka Davide. Olliye sika anaaddipwathe nave aneerokhalla mbusiiwa.

²⁴ Vano mi Apwiya kineerokhalla Mullukwiiwa nave oorumeyellaaka Davide aneerokhalla mweniiwa. Mi Apwiya koollota.”

²⁵ Kineerokeraatthihana echipangano yamurendelle. Kineeroddivenyihamo mwiillaponimmo enama ddittheddene ddamuhakani wi enkhosa ddaka ddikhallekemo mwamurendelle naari muchipululuni apaalle muhakani.

²⁶ Kineerewaakeraatthiha athwaaka vakhuviru ni mwaangwaaka nave kineerewaadalisa vawaamorihellani murimu va enthawi yaphaama.

²⁷ Miteekho ddineerewimma nave ethaya eneerokhumiha ddoohata. Vano athu eneerokhalla mwamurendelle mwiillaponi mwiwa. Eneerodduwella wi mi tti Apwiya kinttaka magoliiwa ni waavullusa wa ayo yaaphanre okaporo.

²⁸ Athu a mitundu ddimodda khewa ewaakhattho ddeko ddiwa nave enama ddamuhakani khaddiwa ddaattakhuna. Eneerokhalla mwamurendelle oohikhallavo oowoopiha.

²⁹ Kineeroruuwiha ddoollima ddiwa sika khewa ekhwa ni ettalla mwiillaponimmo nave athu a ellapo ddimodda khewa yaavevulla.

³⁰ Vano eneerodduwella wi mi Apwiya Mullukwiiwa kiri ni alliwa nave wi Aisraele tti athwaaka. Mi Apwiya Mulluku koollota.

³¹ Nyuwaano tti enkhosa ddaka, nnddo kinaddichiheemi nave miyaano tti Mullukwaanyu. Mi Apwiya Mulluku koollota.