Ezekiele 32 - Mawu a Mulluku

Nchipo na maliro a mwene a o Iguputo

¹ Va nllapo nawaamba na mweeri waneekhumi ni piilli, muyakha wa waneekhumi ni piilli, mawu a Apwiya yaawa wa miyaano wi,

² “We mwaana a muthu, omwiipelle nchipo na maliro mwene Farao a o Iguputo. Omwiipelle nchipo nawi, ‘Weyaano onnaddeesa mukango variyari va mitundu dda athu koma tti wonanko ekonya ya m'maaddini. Onneeta m'muhinjeni mwawo, onnuunttuwanyera maaddi ni manyallwaawo nave oonnaripiha mihinje.

³ Mi Apwiya Mulluku kinallota wi kaatthukumaniha athu a mitundu ddinchichi, kineerewuuvokhella nthavi nave alliwa eneerewuuphara munthavini naka nuullupalli.

⁴ Kineerewuuvokhella omwaako ni wuutathillella vatthi. Kineeromorihella epallame va weyaano navettho enama ddawoopiha dda mu ellapo ettheene wi dduuttakhune.

⁵ Kineerewaaneya muhehaawo vamwaangoni nave mutembwaawo ddineeroddalla mutapo.

⁶ Kineeronaaniha ellapo ni nikhame nawo ophiyera omwaangoni nave mihinje ddineeroddalla ni nikhame nawo.

⁷ Kineerowoononga, kineerohuruwella oddullu nave kineeroripiha etheneeri. Kineerohuruwella nndduwa ni murapo nave mweeri khowa owala.

⁸ Kineerothiimiha ddoowala ddittheddene ddamuddullu nave kineerowiiha epiphi mwiillaponi mwawo. Mi Apwiya Mulluku koollota.’

⁹ “Kineerohoosa mirima dda athu a mitundu ddinchichi kuupharella wuukaporoni variyari va mitundu ddimodda o ellapo nnddo ohinaddidduwelleewe.

¹⁰ Kineerewaattikhiniha athu anchichi ni nnddo ddinaawuumorelle. Mamweniiwa eneerotthukumella voowuupuwellani kiwoonihalle nsupada naka. Va nllapo na omora wawo arive muthu aneerokhupanyella okumaaye.

¹¹ “Mi Apwiya Mulluku kinallota wi ekhoto ya mwene a o Babulo eneerewuuphiyera.

¹² Kineerokuha mulloko muttheene wakhoto ni masupada a akhoto awoopiha wunchichi okhwaranya mitundu ddimodda ddittheddene. Eneeromalliha wiitukhulla wa Iguputo nave mulloko muttheene wakhoto oneerewoonongeya.

¹³ Kineerewoononga eziweto ddiwa ddittheddene ddookhalla mukhwipi mwa maaddi a mwiillaponimmo. Khokhalla muthu apaalle eziweto nnddo ddinaawunnttuwanyereke.

¹⁴ Vatulli viwa kineereweelliha maaddi a wenko nave mihinje ddineerekeweeta wonanko makhura. Mi Apwiya Mulluku koollota.

¹⁵ Eneerodduwella wi mi tti Apwiya kamutthattusa ntepe Iguputo nave koononga ellapo ettheene kiwiiphalle athu ookhalla mwemmo.

¹⁶ “Mawaaka eneerokhalla nchipo namaliro nave atthiyana eelleto eneeroyiipa omwinllella Iguputo ni mullokwaaye wakhoto muttheene. Mi Apwiya Mulluku koollota.”

Ellapo ya ookhwa

¹⁷ Nllapo na 15 na mweeri wawaamba, muyakha wa khumi ni miilli wa okaporo, mawu a Apwiya yaawa wa miyaano wi,

¹⁸ “We mwaana a muthu winlle wunchichi ekaamba ya athu awaata a o Iguputo. Waavelleelle vamodda ni athu a mitundu ddimodda ddamasiva o ellapo ya ookhwa.

¹⁹ Waakohe wi ‘Ethiyo nyuwaano tti ooreera waakhwaranya amodda? Mukitthelle o mahame vamodda ni amodda attheene oohiphaddiwa.

²⁰ Aiguputo eneeromora variyari va awiiphiwa okhotoni. Nsupada tti noohullullahullulla. Alliwa eneerewiiphiwa vamodda ni athwiiwa awaata.’

²¹ Oohoollella amasiva vamodda ni awiiwanana eneerollota mu mahame wi, ‘Athu oohiphaddiwaalle, awiiphiwa ni nsupada aaphiya vatthimva. Khe alla ekone mvaalla?’

²² Asiriya ari wenko nave akhotwaaye eri mu mahame moomwaapheella. Attheenaayo yiiphiwe vakhotoni.

²³ Mahamiiwa eri m'mapuroni oowallamella mu ellapo ya ookhwa nave yahaapheelliwa mahamiiwa mamodda. Alliwa khalle yaanoopiha mu ellapo ya ookumi koma vano yaakhwa, yahiiphiwa vakhotoni.

²⁴ Wenko wookhalla Elamu ni akhotwaaye attheene ayo eri mu mahame oomwaapheella. Attheenaayo yahiiphiwa vakhotoni. Athwaayo yaakhwa ehinaphaddiwe. Alliwaayo yaanoopiha khalle mu ellapo ya ookumi. Vano ennawulliwa muru vamodda ni ayo eri mu mahame.

²⁵ Elamooyo aamupangella mapuro awi akonaatthivo vamodda ni mullokwaaye wakhoto omwaaphenlle. Attheenaayo tti oohiphaddiwa, awiiphiwa okhotoni, ayo khalle yoopiha mu ellapo ya ookumi vano enawulliwa muru vamodda ni ayo eri mu ellapo ya ookhwa vamodda ni athu awiiphiwa.

²⁶ Wenkottho wookhalla Mesheki ni Tubala akhotwiiwa attheene eri m'mahameni moowaapheella alliwa. Attheenaayo tti oohiphaddiwa, awiiphiwa okhotoni ayo khalle yoopiha mu ellapo ya ookumi.

²⁷ Kheyaavitthiwe moolemu wonanko akhoto amasiva akhalle ayo yakitthenlle o ellapo ya ookhwa ni ezida ddiwa ddene. Masupadiiwa yaahiyiwa omuruni wiwa nave ezishango ddiwa yaaddihuruwellana makhuviiwa. Khalle athu yaalla yaanoopiha ellapo ya ookumi.

²⁸ “Wettho Farao oneeronyenyeya nave oneerovitthiwa vamodda ni oohiphaddiwa ayo yiiphiwe vakhotoni.

²⁹ Wenko wookhalla Edomu vamodda ni mamwenaaye owaakattho enduna ddaye ddittheddene. Naari yaari amasiva komave yaavitthiwa mu mahame. Ekonaatthille vamodda ni oohiphaddiwa owaakattho attheene ayo yakitthenlle o ellapo ya ookhwa.

³⁰ Wenko wookhallattho enduna dda ompoto vamodda ni athu attheene a o Sidoni ayo yakitthenlle o ellapo ya ookhwa moowulliha muru owaakattho awiiphiwa naari yaari awoopiha ni amasiva. Aavitthiwa ehiphaddiwe vamodda ni awiiphiwa okhotoni. Ennawulliwawo muru vamodda ni attheene ayo yakitthenlle khalle o ellapo ya ookhwa.

³¹ “Farao ni milloko ddaye ddakhoto yoona ddittheddenenndda mirima ddiwa ddineerokhurumuwa voowuupuwellani waata wa athu ayo yiiphiwe vakhotoni. Mi Apwiya Mulluku koollota.

³² Ddawoona, aanoopiha mu ellapo ya ookumi komave olliye ni milloko ddaye ddakhoto eneerovitthiwa vamodda ni oohiphaddiwa owaaka attheene awiiphiwa vakhotoni. Mi Apwiya Mulluku.”