Ezekiele 30 - Mawu a Mulluku

Apwiya eneeromullaka Iguputo

¹ Mawu a Apwiya yaawa wa miyaano wi,

² “We mwaana a muthu, ollotelle nave ollalleye wi nnddo ddinallota Apwiya Mulluku tti ddawi nllapo nootulli noophiya!

³ Nllapo nohaatamella, nllapo na Apwiya niri vakhuviru. Nllapo namirapo, nllapo na ollakiwa wa mitundu dda athu.

⁴ O Iguputo oneerophiya ekhoto nave o Kushi oneerokhalla ddookatamiha. Athu anchichi eneerewiiphiwa o Iguputo, eyuumiiwa eneerewaakhiwa nave matthipellwiiwa eneerokumuwa.

⁵ Kushi, Puti, Ludi, Arabiya, Libiya ni athu a mu ellapo ddawaatamanana eneerewiiphiwa nimodda vakhotonimvo.

⁶ “Mi Apwiya Mulluku kinallota wi, ‘Attheene oomukavihera Iguputo eneerewiiphiwa nave wiitukhulla ni masiva waye eneeromalla. Athwaaye eneerewiiphiwa vakhotoni waambeella o Migidoli ophiya o Siyene. Mi Apwiya Mulluku koollota.

⁷ Ellapo ya Iguputo eneerotthattuwa ntepe okhwaranya matepe a ellapo ddittheddene. Mizinda ddaye ddineerotthaadduwa okhwaranya mizinda ddimodda ddootthaadduwa.

⁸ Kamushellelliha Iguputo ni owinttaka attheene oomukavihera eneerodduwella wi mi tti Apwiya.’

⁹ “Nllapo nenno naphiya amithenga eneeroya mwawaakuva ovenyera wa miyaano wi yawoopopihe athu a o Kushi alliwa ehidduwellaka. Nave eneerokhupanya nllapo nno Iguputo anaawonongeyeeye. Ddawoona, nllaponno nineerophiya.

¹⁰ “Mi Apwiya Mulluku kinallota wi, Kineeromuruma Nebukadinezara mwene a o Babiloni wi amallihe eyuuma ya Iguputo.

¹¹ Olliye ni athwaaye, mutundu weekuku wunchichi oneerowa wi woononge ellapweeyo, eneerohullulla masupadiiwa wi ewane ni Aiguputo nave ellapweeyo eneeroddalla ni mitembo.

¹² Kineerewummiha muhinje wa Nailo nave kineerokulliha ellapo ya Iguputo wa athu oonanara. Ellapweeyo kineeroyoononga vamodda ni ddittheddene ddiri mwemmo vooyihiyani m'mattani mwa alleto. Mi Apwiya koollota.

¹³ “Mi Apwiya Mulluku kinallota, Kineeromalliha mafano ni woononga milluku ddoohikhalla ni mutteko dda o Memfisi. Khowa okhallattho mwene a o Iguputo nave kineerowoopopiha attheene ookhalla mwiillaponimmo.

¹⁴ Muzinda wa Patirosi kineerowutthattusa echipululu, muzinda wa Zowani kineerowushellelliha ni muzinda wa Thebesi kineerowullaka.

¹⁵ Kineerowunanariwella Muzinda wa Peluziumu, mpanda woollipa wa Iguputo nave kineerewoononga mulloko wakhoto wa o Thebesi.

¹⁶ Kineeromushellelliha Iguputo muttheene nave Peluziumu aneerohoowa wunchichi. Mipanda dda o Thebesi ddineerokumulliwa nave esiri ddiwa ddineerokumulliwa.

¹⁷ Asombwe a o Oni ni a o Pibeseti eneerewiiphiwa vakhotoni nave atthiyana eneerophariwa okaporo.

¹⁸ O Tehafinehesi oneerokhalla epiphi kaamallihaka masiva a Iguputo. Vano wiitukhulla waye oneeromalla, mirapo ddineeromuhuruwella nave ookhalla m'mizi ddaye eneerophariwa okaporo.

¹⁹ Mmu sika kinaamullakelleemi Iguputo nave aneerodduwella wi mi tti Apwiya.”

Woonongeya wa masiva a mwene a o Iguputo

²⁰ Nllapo naneetthanu ni piilli na mweeri wawaamba, muyakha wa khumi ni emodda wa okaporo mawu a Apwiya yaawa wa miyaano wi,

²¹ “We mwaana a muthu, kohinttaka nnatta na Farao mwene a o Iguputo. Khaavo animakille wi nichire nave khenihuruwelle ni ekuwo onillipiha wi nipharettho nsupada.

²² Sika ekaambiiwa mi Apwiya Mulluku kinalloteemi wi we Farao mwene a o Iguputo mi tti mudanaawo. Kineerewinttaka mattaawo mattheene, noollipa ni nawinttakeyanno nave nsupada naye nineeromora.

²³ Kineerewaamwaramwara Aiguputo variyari va mitundu ddimodda ni waapallallesella o ellapo ddinchichi.

²⁴ Kineerollipiha matta a mwene a o Babulo nave kineerohiya m'mattani mwaye nsupada naka. Koma Farao kineeromwinttaka matta nave aneerewiipullella wonanko oophoriihiwa variyari va mwene a o Babulo.

²⁵ Kineerollipiha matta a mwene a o Babulo koma matta a mwene a o Iguputo eneerofooka. Sika athu eneerodduwella wi mi tti Apwiya Mulluku, kahiya nsupada naka m'mattani mwa mwene a o Babulo. Aneerophariha mutteko voowanani ni Iguputo.

²⁶ Kineerewaamwaramwara Aiguputo variyari va mitundu ddimodda ni waapallallesella o ellapo ddinchichi. Sika athu eneerodduwella wi mi tti Apwiya.”