Ezekiele 3 - Mawu a Mulluku

¹ Vano Mulluku aakilleella wi, “We mwaana a muthu, oche ella kinawinnyeemi. Oniche nna nave wallote ni Aisraele.”

² Sika kahaatthama nave aakinnya nibukhu wi kiniche.

³ Vano aakilleella wi, “We mwaana a muthu Oche ello yoovillikiweella ovone.” Sika kaacha nave yaanang'aneya wonanko enwi.

⁴ Vano aakilleella wi, “We mwaana a muthu, khawe wa Aisraele waalleelle mawaaka.

⁵ Nguurumalle wa athu eellotello yeelleto apaalle yookatamiha koma kuurumalle wa Aisraele.

⁶ Nguurumalle wa mitundu ddinchichi dda ellotello yeelleto apaalle yookatamiha ayo ohinaawiiwekeewe yaallotaka. Ddawoona, kuurumalleke wa mitundu ddennddo ddeerowiiwellella.

⁷ Koma Aisraele khewa ewiiwella kaambiiwa khenapaalla okiiwella. Attheenaayo tti a awuumiha murima ni oohiiwellella.

⁸ Vano kineeroweeriha wi okhalle awumma murima vawaavaanyihani.

⁹ Kineerewuullipiha okhwaranya nirive nlluku nuullupalli wi okhalle oollipa. Ohooveke nave ohikhupanyeke ni maweherwiiwa vawi athwaayo tti oowukila.”

¹⁰ Mulluku aavirellella ollota wi, “We mwaana muthu, apella maaru ddittheddene kinuulleelleemi nave oddisungeke m'murimani mwawo.

¹¹ Vano oye wa Aisraele akhwaawo ayo eri wuukaporoni wallotena. Yiiwellella apaalle yakhoota waalleelle wi, Apwiya Mulluku enallota nndda.

¹² Vano Munepa a Mulluku waakitukhulla nave otulli waka kahiiwa mawu amasiva wonanko echivomerezi yuullupalli, oollota wi, ‘Niriiheye ntitimiho na Apwiya nko enakhalliiwa.’ ”

¹³ Onyakulla kiiweeminko waari ottannyanna wa muuphello a ddoophatusiwanndde ni wa magudumu a mukhwipi mwiwaalle, onyakullanko waari wonanko echivomerezi yuullupalli.

¹⁴ Munepa a Mulluku aakitukhullella muddullu akiwelliha, sika ddaakivooriiha ni okishiha murima. Nnatta namasiva na Apwiya naari va miyaano.

¹⁵ Sika kaaphiya o Telabibu vakhuviru ni muhinje wa Kebara nko waari akaporo. Kaakhalla mallapo matthanu ni meelli kiri variyari viwa moollakallakeya.

Mulluku anamutthoolla Ezekiele wi akhalle oowehera

¹⁶ Emanlle mallapo matthanu ni meellaayo mawu a Apwiya yaawa wa miyaano awi,

¹⁷ “We mwaana a muthu, kohuutthoolla wi okhalle owehera a Aisraele. Wiiwa mawaaka waachenjezeke.

¹⁸ Kamulleella muthu oonanara wi ‘We muthu oonanara oneerokhwa.’ Nave we waahimuchenjeza wi arukunuwe murima ohiya onanara wayenko nave avirellelle okhalla ni okumi, muthooyo aneerokhwa ari oochimwa koma weyaano kineerowiipa mullatu ekaamba ya okhwa waye.

¹⁹ Koma muthu oonanara wamuchenjeza wi ahiye ddoonanara olliye anavirellella weera ddoonanarannddo aneerokhwa ari oochimwa. Koma weyaano oneerovullusa okumaawo.

²⁰ Muthu oolungama aamba weera ddoohilungama nave miyaano kamuhiya mu ddawoopiha yooyo aneerokhwa. Weyaano waahimuchenjeza aneerokhwa ekaamba ya machimwaaye nave echilungamwaaye ngiwa kuupuwella koma weyaano kineerowiipa mullatu ekaamba ya okhwa waye.

²¹ Koma wamuchenjeza wi ahichimwe nave olliye ahiya ochimwanko, moohikayikella aneerovullusa okumaaye ekaamba yawiiwellella ochenjeza wawo. Nave weyaano oneerovullusattho okumaawo.”

Ezekiele khaworaka ollota

²² Nnatta na Apwiya naari va miyaano nave alliwa yaakilleella wi, “Timulla oye otapo. Kineerollota ni weyaano wenko.

²³ Sika kaatimulla kiya otapo. Wenko kahoona ntitimiho na Apwiya wonanko mmo koonelleemi omuhinjeni wa Kebara. Kahiivokhella ni opopheya ekhove vatthi.”

²⁴ Koma Munepa a Apwiya waavollowa mwa miyaano nave aakiimesa. Apwiya yaakilleella wi, “Khawe owaninyu wiiwallelle mpa.

²⁵ Vano wenko, we mwaana a muthu, eneerewuumaka ni mikwe wawi khaweetaka variyari va athu.

²⁶ Kineeropanddeellelliha muwano wi ohilloteke nave ohaachenjeze vawi athwaayo tti oowukila.

²⁷ Koma kaawaambaka ollota ni weyaano kineerewuuvaha masiva oollotella. Nave oneerewaalleella wi, ‘Nnddo enallota Apwiya Mulluku tti nndda.’ Oopaalla wiiwa iiwe ookhoota akhoote vawi athwaayo tti oowukila.”