Ezekiele 27 - Mawu a Mulluku

Nchipo namaliro a Tiro

¹ Mawu a Apwiya yaawa wa miyaano wi,

² “We mwaana a muthu, ipa nchipo namaliro a Tiro.

³ Omulleelle Tiro muzinda wookhalla vadoko va enyanja, oyo oneera malonda ni athu a mitundu dda o ellapo ddinchichi dda mukhwipi mwa enyanja wi mi Apwiya Mulluku kinallota wi, ‘We Tiro wookhalla ollotaka wi tti ooreera wunchichi.

⁴ Maliraawo eri muwariwari mwa enyanja, athu eeruso yuumakille wonanko esitima yooreeresesa.

⁵ Yahuupanga ni matabwa apaini dda o mwaango wa Seniri. Yaakusa mukunguza wa o Lebanoni wi epangelle mulongotaawo.

⁶ Yaapanga mpondaawo ni muteekho wa muthundu wa o Bashani. Yaapanga enthandalaawo ni matabwa apaini dda o ezilumba dda Kitimu, variyari va matabwaawo vaakhalla ddoosema dda manyaka a ethepo.

⁷ Yahuuthunyella ni ekuwo yabafuta yoopetiwa phaama yoovenyera o Iguputo sika yaari wonanko embendalaawo. Ekuwo ddoosirana enyumba ddawo ddaari ddoobiliwira ni ddooreera ddoofiira ddoovenyera o ezilumba dda Elisha.

⁸ Athu a o Sidoni ni a o Arivadi sika yuupalasa. We Tiro, athwaawo eeruso ayo yaari mwa weyaano sika yaweetiha.

⁹ Mwa weyaano mookhalla attekweene ni athu eeruso a o Gebala ayo yapotokosa moophovowa mwawo. Aweetiha esitima anchichi yaanaweetella ovenyera o ellapo ddittheddene wi yeere malonda ni weyaano.’

¹⁰ “Athu a o Persiya, a o Ludi ni a o Puti yaavollowa mu mullokwaawo wakhoto. Yaanatthomeya ezishango ddiwa ni ezipewa ddiwa va weyaano sika yaanuuvuwiha.

¹¹ Akhoto a o Arivadi ni a o Heleki yaanawehera mipanda ddawo virive veko. Athu a o Gamadi yaanawella mattatthaawo enatthomeya ezishango ddiwa vamipandani vawo virive veko. Yaayo sika yuureeriha wunchichi.

¹² “Ellapo ya Tarishishi yaaneera malonda ni weyaano ekaamba ya katundwaawo oohiyanahiyana nave waanaakulla siliva, mukoko, echitini ni muthove moowaakakhana ni katundwaawo.

¹³ Athu a o Yavani, a o Tuba ni a o Mesheki yaaneera malonda ni weyaano. Waanaakulla akaporo ni eziwiya dda mukuwa moowaakakhana ni katundwaawo.

¹⁴ Athu a o Betetogarima waanaakulla akavalo, akavalwiiwa akhoto ni abulu moowaakakhana ni katundwaawo.

¹⁵ Athu a o Dedani yaaneera malonda ni weyaano navettho a mukhwipi mwa enyanja waanaakulla manyaka a ethepo ni eviko moowaakakhana ni katundwaawo.

¹⁶ Athu a o Siriya yaanawaana ddeko ddinchichi dda malonda moowaakakhana ni katundwaawo munchichi. Waanaakulla malluku a emeradi, ekuwo ddooreera ddoofiira, ddoopeta, ddabafuta, korale ni malluku a rubi moowaakakhana ni katundwaawo.

¹⁷ Yuda ni Israele yaanakulla malondaawo. Waanaakulla tirigu, ezipaso dda olivi, namukuyu awaamba, enwi, makhura a olivi ni makhura awunkhella moowaakakhana ni katundwaawo.

¹⁸ Athu a o Damasiko yaanakulla wa weyaano ekaamba ya waata wa malondaawo ni katundwaawo oohiyanahiyana. Waanamukulla vinyo a o Heliboni ni obweya woovenyera o Zahara.

¹⁹ Waanamukullattho vinyo a o Uzala navettho mikoko, kesha ni epango yawunkhella waakakhaniha ni malondaawo.

²⁰ Waanaakulla athu a o Dedani ekuwo ddoohiya va esaduro dda akavalo.

²¹ Arabiya ni mamwene mattheene a o Kedara yaaneera malonda moowaakakhana ni asaanaankhosa, anankhoro a enkhosa ni epuri.

²² Amalonda a o Sheba ni a o Rama yaanakullattho wa weyaano. Waanaakulla ddawunkhella wunchichi, malluku oowallamella mutengo ni golide moowaakakhana ni katundwaawo.

²³ Athu a o Harani, Kane, Edeni, Ashuri ni Kilimade navettho amalonda a o Sheba yaaneera malonda ni weyaano.

²⁴ Athu a wenko yaanaakakhaniha ni weyaano ddoowara ddaphaama wunchichi, ekuwo ddoofiira, ekuwo ddoopeta, makalipeti amankhaanga, ddittheddenennddo eddimakille ni mikwe ddoollipa.

²⁵ Esitima dda o Tarishishi ddaanatukhulla malondaawo. Vano we waari wonanko esitima yam'maaddini, yooddalla ni katundu oollemella.

²⁶ Ooweetihaawo yaanuuhoollella o enyanja yoowallamella nko ephevo ya woovollowa nndduwa yuumiryalliiwa muwari mwa enyanja.

²⁷ Eyuumaawo, katundwaawo ni malondaawo, ooweetihaawo ni awookollelleene, athu eeruso yamatabwa a esitima ddawo, ookulliha malondaawo, akhotwaawo attheene ayo yaari muwarimmo, mulloko wakhoto muttheene variyari vawo, attheenaayo yaamiryiwa vanyanjani nllapo nno woonongeyilleewe.

²⁸ Ekaamba ya okhuwa wa ooweetihaayo, omutundani wootikheya.

²⁹ Attheene ayo eneetiha esitima aakhuma, aweetiha attheene ni awookollelleene ahiimella omutundani.

³⁰ Attheenaayo ennawinllella wunchichi owinllella, yiihellaka nthupi omuruni, edduupurusaka muntuurani.

³¹ Yaaniichema mpala ekaamba ya weyaano, yaanawara eziguduli eninlla ni murima woovoreya.

³² Ennawiipella nchipo nawinlla wi, ‘Ttaani oonongiwekevo wonanko Tiro, variyari va enyanja?

³³ Malondaawo yallapuwiiwa enyanja yaanahakallalliha mitundu ddinchichi dda athu va ddoorama ddiwa. Mamwene a va ellapo yavatthi yaatukhuwana eyuumaawo.

³⁴ Koma vano wohunttakeyella mu enyanja vatthivatthi va enyanja, We, katundwaawo ni allupa muttekwaawo attheene moomallella nimodda mu enyanja.’

³⁵ “Arive muthu anakhalla mukhwipi mwa enyanja ohoopopiheya ni nnddo ddinaweereyella. Mamwenaawo ennoova, ekhove ddiwa ddinnooniha wi ennoova.

³⁶ Athu amalonda a ellapo ddimodda ennoopa musoonyo. Woomalla mwawoopiha, khowa okhallavottho wa enthawi yoohimalla.”