Ezekiele 26 - Mawu a Mulluku

Ollakiwa wa Tiro

¹ Va nllapo nawaamba na mweeri wa muyakha wa khumi ni mmodda wa okaporo, mawu a Apwiya yaawa wa miyaano wi,

² “We mwaana a muthu, athu a o Tiro yaamunyemulla Yerusalemu wi, ‘Ha! Olle waari mullako woovollowella mitundu dda athu ohoonongeya. Millako ddaye ddoonihulleyella vano nineerokhalla ni eyuuma vawi ootthattuwa ntepe.’

³ “Sika ekaambiiwa mi Apwiya kinalloteemi wi, ‘We Tiro mi tti mudanaawo, kineerewuuwiihella athu amitundu ddinchichi wi ellipane ni weyaano wonanko mmo munavidduwella mafunde vanyanjani.

⁴ Athwaayo eneerewoononga mipanda dda Tiro ni okumulla mattatthiiwa. Kineerowollavo ethayaaye ettheene ni omutthattusa nlluku.

⁵ Aneerokhalla nipuro nawaaneyavo mathavi variyari va enyanja. Mi Apwiya Mulluku koollota. Aneerotthattuwa yawaakha ya athu a mitundu ddimodda.

⁶ Athu a mizi ddoowaapheella eneerewiiphiwa vakhotoni. Sika eneerodduwella wi mi tti Apwiya.’

⁷ “Mi Apwiya Mulluku kinallota wi, ‘We Tiro, kineerewuuwiihella Nebukadinezara mwene a o Babiloni, mwene a mamwene ovenyera ompoto. Aneeroowa ni mulloko muullupalli wakhoto, akavalo, magareta ni oowella va akavalo.

⁸ Athu a mizi ddawo ddoowaapheella eneerewiiphiwa vakhotoni. Eneerowaapheella ni misasa ddakhoto navettho ni malliti akhoto. Eneerotukhullella muddullu ezishango ollipana ni weyaano.

⁹ Eneerokumulla mipanda ddawo ni matchini nave eneerokuha mattatthaawo ni akottokwiiwa.

¹⁰ Akavalwaaye awaata eneerewuuvuhella ni nthupi niwa. Mipanda ddawo ddineeroweengereya ni mukhito wa akavalo navettho ni onyakulla wa magudumu a magareta voovollowani va millako ddawo dda muzinda wookumulliwa.

¹¹ Akavalwaawo eneerokhitellella misewu ddawo ddittheddene ni manyallwiiwa. Eneerowiipha athwaawo ni nsupada. Apotwaawo oollipa eneeromora.

¹² Eneerowaakha eyuumaawo ni malondaawo. Eneerokumulla mipanda ddawo ni enyumba ddawo ddooreera. Mallukwaawo, miteekho ddawo ni erive ello eneeroddivokha mu enyanja.

¹³ Kineerohiiha onyakulla wa machipwaawo nave winlla wa magitala khowa wiiweyattho.

¹⁴ Kineerewuutthattusa nlluku. Oneerotthattuwa nipuro nawaaneyavo mathavi nave khowa omakiwattho. Mi Apwiya Mulluku koollota.’

¹⁵ “Mi Apwiya kinuulleella we muzinda wa Tiro tti wi, ‘Mukhwipi mwa enyanja ni ezilumba ddineerotikheya vawiiwani omora wawo nave voowoonani oophoreya yiipullellaka ni athu yiiphiwaka variyari vawo.

¹⁶ Vano mamwene mattheene a o enyanja eneerokittha m'mipandoni ddiwa ddoomwene. Mikanjo ddiwa eneeroddihiya vakhwipi nave eneerorulla ddoowara ddiwa ddoopeta. Eneerokeraatthi vatthi etthukumellaka ekaamba yawoova nave ekaamba ya nnddo enaaddooniiwa enaakhulle owanoni kakalla’

¹⁷ Nave eneerekewiipa nchipo namaliro wi, ‘We muzinda woovuwa, wohoonongeya ddiidda, waari amasiva va enyanja, we ni athwaawo. We ni athwaawo mwaanawoopiha athu mukhwipi mwa enyanja.

¹⁸ Vano ellapo dda mukhwipi mwa enyanja ddinnatthukumella ekaamba ya omora wawo. Alliwattho ookhalla mu ezilumba ennoova ekaamba ya omalla wawo.’ ”

¹⁹ “Mi Apwiya Mulluku kinallota wi, ‘Kineerewuutthattusa ntepe wonanko muzinda woohikhalla athu. Kineerewuukhuneella ni maaddi a mu enyanja yoowallamella, maaddi amasiva eneerewuumirya.

²⁰ Kineerewuukuhella vatthi wi okhalle vamodda ni athu akhalle ayo yakitthenlle omahame. Kineerewuukitthihella ollitininko vamodda ni athu yakhwille khalle wonanko ntepe natthaamiwe khallekhalle. Sika khowa okhalla ni athu mu ellapo ya ookumi.

²¹ Kineerowoononga mwawoopiha nave khowa okhallawottho. Naari athu ewaashaashe, khowa ophwanyeya. Mi Apwiya Mulluku koollota.’ ”