Ezekiele 25 - Mawu a Mulluku

Ollakiwa wa Aamoni

¹ Mawu a Apwiya yaawa wa miyaano wi,

² “We mwaana a muthu, rukunuwa owehe wa Aamoni, ollalleye mowaahumullulla.

³ Alleelle wi, ‘Nyu Aamoni, iwani mawu a Apwiya Mulluku awi mwaaromolla mawu oonyemulla moonille nipuro naka noopatuleya niripihiwaka, ethaya ya Israele yoonongiwe nave athu a o Yuda ephariwe okaporo.

⁴ Ekaamba ya yeella kineerewuuhiyani m'mattani mwa athu a woovollowa nndduwa. Eneerotthipella misasa ddiwa ni omaka enyumba ddiwa mwiillaponi mwanyu. Eneerewuuchellani ezipaso ddanyu ni wuuwiryellani mukakaanyu.

⁵ Kineeromutthattusa Raba wi akhalle nipuro noochihellavo ekamira* nave kineerotthattusa mizinda dda Aamoni wi ddikhalle makholla a enkhosa. Vano muneerodduwella wi mi tti Apwiya.’

⁶ Mi Apwiya Mulluku kinallota wi, ‘Mwahoopa m'mattani ni olluphallupha moohakallalla nave mwaanyemulla ellapo ya Israele ni murimaanyu muttheene.

⁷ Ekaamba ya yeella kineerewuullakani ni nnatta naka nave kineerewuuhiyani m'mattani mwa athu a mitundu ddimodda wi mukhalle yawaakha. Kineerewuuvenyihani variyari va athu a mitundu ddimodda nave kineerewuutthollosani va ellapo yavatthi. Kineerowoonongani nave muneerodduwella wi mi tti Apwiya.’ ”

Ollakiwa wa Mowabu

⁸ “Mi Apwiya Mulluku kinallota wi, ‘Ekaamba yawi Mowabu aallota wi Yuda ari wonanko athu a mitundu ddittheddene,

⁹ kineerokumulla embali emodda ya Mowabu, kineerewoononga mizinda ddaye ddoomalireni, mizinda ddooreera wunchichi dda Beteyeshimoti, Baala Meoni ni Kiriyataimu.

¹⁰ Kineerewaavelleella Amowabu ni Aamoni m'mattani mwa mitundu dda woovollowa nndduwa sika Aamoni eneerotiwalleya variyari va mitundu dda athu.

¹¹ Amowabu kineerewaallakattho. Vano eneerodduwella wi mi tti Apwiya.’ ”

Ollakiwa wa Edomu

¹² “Mi Apwiya Mulluku kinallota wi, ‘Ekaamba yawi Edomu aamuhokollosella ddoonanara mweekuku Yuda, aachimwa wunchichi.

¹³ Sika Edomu kineeromullaka ni nnatta naka nave kineeromoononga vamodda ni enama nnddo ddiri wenko. Ellapweeyo kineeroyitthattusa echipululu waambeella o Temani ophiya o Dedani nave athu anchichi eneerewiiphiwa vakhotoni.

¹⁴ Kineeromullaka Edomu ni nnatta na athwaaka Aisraele. Eneeromweerella moollikana ni mmo osha murima waka ni owallaaka onaapaallelliiwa. Sika aneerewoona ohokollosella ddoonanara waka. Mi Apwiya Mulluku koollota.’ ”

Ollakiwa wa Filisti

¹⁵ Mi Apwiya Mulluku kinallota wi, “Filisti aamuhokollosella ddoonanara mweekuku athwaaka ni murima wowaavevulla nave aapalla owoononga.

¹⁶ Ekaamba ya yeella Afilistaayo kineerewaallaka ni nnatta naka. Kineerewaatthollosa Akereti ni amodda attheene ookhalla mukhwipi mwa enyanja.

¹⁷ Kineerewaahokollosella ddoonanara mwawoopiha ni waallaka moowalli. Kaallaka ddiiddo eneerodduwella wi mi tti Apwiya.”