Ezekiele 24 - Mawu a Mulluku

Epalli yamurawa

¹ Va nllapo naneekhumi na mweeri wa khumi, nllapo naneetthanu ni sese na okaporo, mawu a Apwiya yaawa wa miyaano wi,

² “We mwaana a muthu, ollello vaava lemba nnddina na nllapo nallello vawi tti nllapo nno mwene a o Babiloni aaphenlleeye muzinda wa Yerusalemu.

³ Alleelle mwambi athu eekukwaalla wi mi Apwiya Mulluku kinallota wi, eyani epalli nave muhellemo maaddi.

⁴ Mwiipallinimmo muhellemo enthuli dda enama, enthuli ddaphaama wunchichi dda mweto wamutulli ni dda wamuhoollo. Muddallihemo makhuva aphaama.

⁵ Va mulloko wa enkhosa mutthoollevo enkhosa yaphaama wunchichi nave muhellevo ekhuni ddinchichi vatthi va epalleeyo. Maaddaayo evidduwe nave muhellemo enameelle vamodda ni makhuveene.”

⁶ Vano mi Apwiya kinallota wi, “Otulli okhalle ni we muzinda wanikhame, epalli yamurawa munchichi, wawummellella ni woohitthulluwa. Mukhumihemo enthuli emodda emodda moohitthoolla.

⁷ Nikhame nno akhumihalleeye m'muzindanimmo nookhallallavove ekaamba yawi atathillelle vanllukuni oohikhalla muthaani wi nthupi nihivuhellelle.

⁸ Kahaahiya vanllukuni vaweella wi ehivuhellelleye kaambiiwa kapaalla wi koonihe osha murima waka ni waahokollosella ddoonanara.”

⁹ Vano mi Apwiya Mulluku kinallota wi, “Otulli okhalle ni we muzinda wanikhame! Kineerewuukella ekhuni ddinchichi.

¹⁰ Ukella ekhuni ddimodda, khariha munllo, apeya enama, oyaapeye phaama omimine ephwaddi nave oshellellihe makhuva.

¹¹ Vano ohiye vamankhallanimvo epalli moohikhalla ello ophiyera efiiralle, ddoonanara ddiwa ddittheddene ddittotthowille nave murawa ovenyillemo

¹² naari ori wookatamiha weelliha vawi murawa khonavenyihiwa ni munllo.

¹³ Murawa yoolla tti minkhella dda oraruwa wawo, kahuuhuwa koma khawaaweellille. Vano khaweella ophiyera osha murima waka okwakhwanihiwe va weyaano.

¹⁴ Mi Apwiya koollota ddenndda. Ddinimawa nave kineeroddeera. Ngihokollweella mutulli. Nguuhiya nave nguukhululukella. Kineerewuullaka voothwarani makhallellwaawo ni ddaweera ddawo. Mi Apwiya Mulluku koollota.”

Okhwa wa mwaara Ezekiele

¹⁵ Mawu a Apwiya yaawa wa miyaano wi,

¹⁶ “We mwaana a muthu, moorurumusa kineerowaakha mwaariyo oyo anuuya m'mwiitthoni mwawo wunchichi. Koma ohinakhupanya, ohinlle apaalle omoriha miitthori.

¹⁷ Wiipullelle koma yamuwariwari, ohinoopa ekutho. Oware enduwiraawo ni esapato ddawo. Ohikhuneelle owiitthoni apaalle ocha yoocha ya anaamukhwelle.”

¹⁸ Sika kaallota ni athu otthaana nave misikuwa mwaaraka aakhwa. Osaka wene kaheera moollikana ni mmo yakilamulelliiwa.

¹⁹ Athu yaakikoha wi, “Kaambiiwa tini ohinanittaphullelleewe oneereewenndda? Ethiyo eneerella tini ddenndda?”

²⁰ Kaawaakhulla wi, “Mawu a Apwiya yaawa wa miyaano wi,

²¹ ‘Alleelle Aisraele mawaaka awi, kineeronanariha enyumbaaka eyo mukhanlleenyu muyikotellaka wunchichi. Ennuuyaani m'mwiitthoni mwanyu wunchichi nave munnayikonda ni murimaanyu muttheene. Aniinyu aallopwana ni aatthiyana ayo mwaahiyalleenyu mutulli, eneerewiiphiwa ni nsupada.

²² Koma nyuwaano muneereweera wonanko keerelleemi. Khamukhuneella owiitthoni apaalle ocha yoocha ya anaamukhwelle.

²³ Muneerowara enduwira, muneerowarattho esapato. Khamoopa ekutho apaalle omoriha miitthori. Koma muneerokatamiheya ekaamba ya machimwaanyu nave muneerekewiipullellellana muthu ni mukhwaaye.

²⁴ Vano miyaano kineerokhalla echizindikiro wa nyuwaano nave muneereweera wonanko mmo keerelle miyaano. Ddenndda ddeereya muneerodduwella wi alliwa tti Apwiya Mulluku.’ ”

²⁵ Vatulli viwa Apwiya yaakilleella wi, “We mwaana a muthu, nllapo nimodda athu yaalla kineerewaakumullella mpanda yakotelliiwa oreera wiwa, oyo waaya m'mwiitthoni yaawoonaka nave yawuhiyiiwa vamurimani. Kineerewaavenyiherattho aniiwa aallopwana ni aatthiyana.

²⁶ Oovulluwa nllapo nenno aneeroowa wi uulleelle ddennddo.

²⁷ Nllapo nenno oneeroworattho ollota, sika oneerollotana oovulluwooyo, khokhallattho muthu oohillota. Vano oneerokhalla echizindikiro wa alliwa nave eneerodduwella wi mi tti Apwiya.”