Ezekiele 23 - Mawu a Mulluku

Ohola ni Oholiba, atthiyana ooraruwa

¹ Mawu a Apwiya yaawa wa miyaano wi,

² “We mwaana a muthu, vaakhalla atthiyana eelli a erukullu emodda.

³ Yaanararuwa o Iguputo. Yaambeelle oraruwa eri anamwalli. Wenko athu yaanawaapapella vathirimani enaaphara mapelliiwa oohikokhora.

⁴ Muullupalli aari Ohola nave mung'onong'ono aari Oholiba Kahaatthella nave kahaayarella anamwani aallopwana ni aatthiyana. Ohola sika Samariya nave Oholiba sika Yerusalemu.

⁵ Ohola aanararuwave naari aari ni miyaano. Aanawanddeellella ezibwenzi ddaye dda o Asiriya.

⁶ Ddimodda ddaari akhoto oowara ddooreera ddoofiira, enduna dda muzigawo, ddoohoollella akhoto ni ddoowella va akavalo. Ddittheddenennddo ddaari asombwe ooreera.

⁷ Ohola aanararuwa ni attheenaayo, allopwana oovuwa a o Asiriya. Nave aaniiripiha ni mafanwiiwa.

⁸ Khaahiyalle makhallellwaaye ooraruwa ayo ahuddenreeye o Iguputo nko allopwana yararuwiiwana, enamuphara mapelle, enakonana ari namwalli,

⁹ Sika ekaambiiwa kamuhiyalleemi m'mattani mwa ezibwenzi ddaye, Aasiriya ayo aawanddeellelleeye.

¹⁰ Alliwa yaamurulla, yaamwaakha anaaye aallopwana ni aatthiyana nave yaamwiipha ni nsupada. Allakiwe ddiiddo aatthattuwa ello yoovevuwa variyari va atthiyana akhwaaye.

¹¹ “Vano Oholiba, mung'onong'onwaaye naari oonille ddenndda aallata nave aanararuwa okhwaranya mmo eerella muullupallaaye.

¹² Olliyettho aanaawanddeellella Aasiriya monga enduna dda muzigawo, oohoollella akhoto, akhoto oowara ddoofiira, oowella va akavalo, attheenaayo yaari asombwe ooreera.

¹³ Kahoona wi olliyettho ahiiripiha nave eelliinaayo yathwanre ettilla emodda.

^14-15 Koma Oholiba aararuwa wunchichi omukhwaranya muullupallaaye. Ahoona ezithuzi dda allopwana musirini dda Ababiloni ddoolembiwa ni otooto woofiira. Athwaayo yaamakella malaamba muyuununi mwiwa, ewara enduwira omuruni. Attheene yooneya wonanko oohoollella ekhoto nave yooneya wonanko Ababiloni, aneetthi a o Babiloni.

¹⁶ Awoonille, mutthiyanoolle ahaamba waapaalla. Sika ahaaruma athu a o Babiloni wi ewiithane.

¹⁷ Vano allopwana a Babilonaalle yaawa wa olliye eraruwana. Nave ni ddoopaalla ddiwannddo yaamuripiha ophiyera olliye aananariwana.

¹⁸ Mutthiyanooyo aanararuwa mooddoonihella nave aanooniha epwillimwinddaaye moohiwulliwa muru. Sika kaananariwana wonanko mmo keerelleemi ni muullupallaaye.

¹⁹ Nave aanararuwa moohihiyerera uupuwellaka ddooraruwa nnddo eereeye ari hule o Iguputo mvo aariiye namwalli.

²⁰ Aanapaalla ezibwenzi ddaye nnddo ddaari ni mukhoveni muullupalli wonanko mwa abulu ayo oviha wiwa waari wonanko wa akavalo.

²¹ Sika we Oholiba, waapaalla oraruwa wonanko weerelleewe o Iguputo ori namwalli nko yawaapapelliiwa vathirimani enuuphara mapellaawo oohikokhora.”

Ollakiwa wa Oholiba

²² Vano mi Apwiya Mulluku kinallota wi, “We Oholiba kineereweeriha ezibwenzi ddawo wananariweewenanndde wi dduuwukille. Kineeroddiithana ovenyera o embali ddittheddene.

²³ Kineerowiithana athu a o Babiloni, attheene a Babiloni, attheene ayo eri o Pekodi, a o Showa, a o Kowa vamodda ni Aasiriya attheene. Attheenaayo yaari allopwana ooreera monga enduna dda mu ezigawo, oohoollella akhoto, akhoto ni oowella va akavalo.

²⁴ Eneeroowa ovenyera ompoto va a kavalo akhoto ni magareta. Eneerowaapheella ewarille ddawiitetezella ni ezipewa ddakhoto. Kineerewuuhiya m'mattani mwiwa wi yuullake nave eneerewuullaka moollikana ni mmo enaapaallelliiwa.

²⁵ Kineerowakhullella wi eweerelleke ddeekuku kaambiiwa kohuunanariwella. Eneerewuuphadda ephuna ni maaru nave ayo enaahalle mwa weyaano eneerowiipha ni nsupada. Eneerowaakha anaawo aallopwana ni aatthiyana nave ayo enaahalle mwa weyaano eneeroosha ni munllo.

²⁶ Eneerewuurulla ddoowara ddawo ni owaakha ddawiireerihella ddawo ddoowallamella mutengo.

²⁷ Sika kineerewuuhiiha ddoonanara ddawo ni oraruwa wawo nko oneereewe ovenyera valle waariiwe o Iguputo. Nave khowa opaallattho apaalle wuupuwella dda o Iguputo.

²⁸ “Mi Apwiya Mulluku kinallota wi, ‘Kineerewuuhiya m'mattani mwa adanaawo alle onawiiteewe ni onanariwana.

²⁹ Alliwa eneerowiita, eneerowaakha ddittheddene waphwanyilleewe mooraruwa nave eneerewuuhiya ori epwillimwinddive ni oosiwa. Mwiilli oyo wararuwaneewe oneerokhalla woohiwara. Ddoonanara ddawo ni oraruwa wawo

³⁰ sika ddinaawuuwiihelle ddenndda ekaamba yawi woheera ddoonanara ni mitundu dda athu eelleto nave wohiiripiha ni mafanwiiwa.

³¹ Waattakiha ddaweera dda muullupallaawo nave kineerewuuvaha kapu a ollaka oophwanaphwana ni aaye.’

³² “Mi Apwiya Mulluku kinallota wi, ‘Oneeromuwiryella kapu oophwanaphwana ni a muullupallaawo, kapu oowallamella ni muullupalli. Athu eneerewuuttheya ni wuuvevulla kaambiiwa kapooyo tti ooddalla wunchichi.

³³ Oneerolezela nave m'murimani mwawo muneeroddalla ni ethakaraka. Yoolla tti kapu awoopiha nave awoononga, kapu a ollaka, a mwanamunno Samariya.

³⁴ Oneeromuwirya ophiyera omallihallemo, oneeromupwesa, makattuphiiwa eneerotthalla mapellaawo.’ Mi Apwiya Mulluku koollota.”

³⁵ “Sika ekaambiiwa mi Apwiya Mulluku kinalloteemi wi, ‘Vawi wookitiwalla nave wookireya etulli oneerollakiwa ekaamba ya ddoonanara ddawo ni oraruwa wawo.’ ”

Mulluku anaallaka Ohola ni Oholiba

³⁶ Apwiya yaakikoha wi, “We mwaana a muthu, ethiyo onnapaalla omweeruza Ohola ni Oholiba? Vano owiipe mullatu ekaamba ya ddoonanara nnddo yaddeerilliiwa.

³⁷ Yaararuwa nave yaawiipha athu. Yaararuwa voollapellani mafanwiiwa nave anaaka yakiyarelliiwa yahaavelleella wa mafano wonanko mukutho wa yoocha.

³⁸ Yaaripihattho nipuro naka naweella nave yaavevulla mallapwaaka a Sabata.

³⁹ Yaavelleellille aniiwa mukutho o mafanwiiwa, enthawi yeeyo yaavollowa mu enyumbaaka yaweella eyiripiha. Ngoonani, ddenndda sika yeerilliiwa mu enyumbaaka.”

⁴⁰ Navettho yaanaaruma amithenga wi yawiithane athu awoorekama. Athwaayo ewiille atthiyanaalla yaahapa yiireeriha miittho ni otooto, ewara ddamankhaanga.

⁴¹ Yaanakeraatthi vabedini ooreera nave vahoollo viwa vaanakhalla tebulo. Vatebulonimvo yaanahiyavo lubani* ni makhura ayo kaavaheemi.

⁴² Okhuwa wa mulloko wa athu wahiiweya. Waanjerera va athu shisha vaakhallattho amodda oolezela oovenyera ochipululuni. Yahaawariha atthiyanaayo makangaza onnattanattani ni ezipewa ddoomwene ddooreera omuruni wiwa.

⁴³ Vano miyaano kaallota wi, “Atthiyana yaalla oraruwa woohaakokholla koma athu enimararuwanave.

⁴⁴ Yaanaya wa alliwa wonanko mmo athu enayeelliiwa wa mutthiyana ooraruwa, sika wi tti mmo yayeelliiwa wa Ohola ni Oholiba yararuwakana.

⁴⁵ Koma nllapo nimodda athu oolungama eneerowiipa mullatu wooraruwa ni woowiipha akhwiiwa. Ddawoona, tti ooraruwa nave m'mattani mwiwa tti mwa nikhame.”

⁴⁶ Mi Apwiya Mulluku kinallota wi, “Mwiithane mulloko wa athu wi waahoose ni owaakha eyuumiiwa.

⁴⁷ Atthiyana eelliinaayo yaavokhe malluku nave yaakakathe ni masupadiiwa. Ewiiphettho aniiwa aallopwana ni aatthiyana ni woosa enyumba ddiwa.

⁴⁸ Sika kineeromalliha oraruwa mwiillaponi mwiwa waachenjeza wi ehiye weera ddoonanara wonanko alliwa.

⁴⁹ Eneerollakiwa ekaamba ya makhallellwiiwa ooraruwa nave eneerohoosiwa ekaamba ya nichimo noollapella mafano.” Vano eneerodduwella wi mi tti Apwiya Mulluku.