Ezekiele 22 - Mawu a Mulluku

Machimo a Yerusalemu

¹ Mawu a Apwiya yaawa wa miyaano wi,

² “We mwaana a muthu, ethiyo onnapaalla wi omweeruze Yerusalemu, muzinda wooddalla ni oowiipha athu? Waahumullulle ekaamba ya ddaweera ddiwa ddittheddene ddoonanara.

³ Waalleelle wi mi Apwiya Mulluku kinallota wi, ‘Otulli we muzinda woowaakhumiha nikhame athwaaye anchichi nave wawiiripiha ni mafanwaaye. Sika ekaambiiwa enthawaawo ephiyalliiwa.

⁴ Woochimwa kaambiiwa wookhumiha nikhame. Wohiiripiha ni mafano ayo waapangilleewe. Vano wooyeviha mallapwaawo nave miyakha ddawo ddoomalla. Sika ekaambiiwa kaakhullelleemi mitundu dda athu dduuvevulle nave wi ellapo ddittheddene dduuttheye.

⁵ Ellapo ddawaatamella ni ddoorekamella ddineerekewuunyemulla, we eepilli yoonanara ni ooddivelliwa owana.’

⁶ “Ngoona mmo enduna ddawo ddinawiiphelliiwa athu voopharihani mutteko masiviiwa.

⁷ Athwaawo ennavevulla attiitthiiwa ni ameewa, enaakatamiha alleto ookhalla variyari viwa, ennaahoosa akhwaadduni ni anaamukhwelle.

⁸ Woovevulla ddeko ddaka ddoopatuleya nave wooripiha mallapwaaka a Sabata.

⁹ Mwa weyaano mookhalla anawunawu wi ewiiphellevo akhwiiwa, amodda oocha ddoovelleelliwa mikutho o mafano ni athu amodda aweera ddoonanara.

¹⁰ Mwa weyaano mookhalla amodda ookona ni awara a attiitthiiwa, amoddattho owaawatihera atthiyana okonana eri omweerini,

¹¹ amodda ennararuwa ni awara a akhwiiwa, amodda ennakonana ni avokohiiwa, amoddattho ennakonana ni arokoriwa, anamwani a attiitthiiwa.

¹² Mwa weyaano mookhalla amodda awaakhella ddamukaphwani wi ewiiphe athu akhwiiwa, amodda ennaakhella ddawoonjerera wi epindule ni nnddo enakongolihiiwa. Attheenaayo aakitiwalla miyaano. Mi Apwiya Mulluku koollota.

¹³ “Sika ekaambiiwa miyaano kinoopeemi m'mattani wooniha ottikhina ni opindula nko ophwanyilleewe moolleka navettho ekaamba ya wiiphana nko oneereya variyari vanyu.

¹⁴ Ethiyo murimaawo ttuukhallave woollipa nave mattaawo ttuukhallave amasiva kamalliha wuullaka? Mi Apwiya Mulluku koollota nave kineereweera.

¹⁵ Kineerewaapallallesa athwaawo variyari va mitundu ddimodda dda athu ni waamwarella o ellapo dda woorekama. Mmu sika kinaamallihelleemi oripihiwa wawo.

¹⁶ Kineerewuuvevulla vamiitthoni va athwaayo. Vano oneerodduwella wi mi tti Apwiya.”

Munllo waweekella wa Mulluku

¹⁷ Mawu a Apwiya yaawa wa miyaano wi,

¹⁸ “We mwaana a muthu, Aisraele attheene aatthattuwa oohikhalla ni mutteko m'mwiitthoni mwaka. Enaphwanaphwana ni mukuwa, echitini, mukoko ni muthove nnddo ddiri ddoohikhalla ni mutteko voomweekani siliva.

¹⁹ Sika ekaambiiwa mi Apwiya Mulluku kinalloteemi wi vawi mootthattuwa ddeko ddoohikhalla ni mutteko kineerewuutthukumanihani o Yerusalemu.

²⁰ Monga mmo athu enatthukumanihelliiwa siliva, mkuwa, mukoko muthove ni echitini, ekhariha munllo wi oddeeke, tti mmo kinaawutthukumanihelleemini kishille murima ni owalli. Kineerewuuhiyani muwari mwa muzinda nave kineeroweekani mwemmo wonanko munllo.

²¹ Ddawoona, kineerewuutthukumanihani m'muzindani mwemmo nave kineerokhariha munllo wa osha murima waka ophiyera mweekeyille.

²² Muneereweekeya wonanko mmo siliva aneekeyelleeye vamunlloni. Sika muneerodduwella wi mi tti Apwiya ayo yuushenlleni murima.”

Machimo a oohoollella a o Israele

²³ Mawu a Apwiya yaawa wa miyaano wi,

²⁴ “We mwaana a muthu, omulleelle Yerusalemu wi olliye tti ellapo yooripihiwa navettho yoohirupiwa murimu ekaamba ya osha murima waka.

²⁵ Oohoollellaaye tti wonanko mikango ddoothuruma voopharani enama. Aawiipha athu, ahaakha eyuuma ni ddeko ddoowallamella mutengo ni waatthattusa atthiyana anchichi anaamukhwelle m'muzindanimmo.

²⁶ Allupa mukuthwaaye aatathilla malamulwaaka nave aaripiha ddeko ddaka ddoopatuleya. Khenahiyaniha variyari va ddeko ddoopatuleya ni ddeko shisha. Khenaahuddiha athwaaka ohiyana wa ddeko ddaweella ni ddooripihiwa. Khenapwatha mallapwaaka a Sabata. Sika attheenaayo aakiripiha.

²⁷ Oohoollellaaye tti wonanko akhatwe ookhaddulla enama, ennakhumiha nikhame ni woononga okumi wa athu wi ephwanye mphuro woonanara.

²⁸ Nave anamallotellaaye ennavittha ddenndda wonanko mmo eneerella athu voomarani otooto waweella, ennaddihuruwella ni nnddo enaddooniiwa voollohani ddawoottha ni makhangiiwa oolleka. Ennallota wi, ‘Apwiya enallota nndda’ Koma mi Apwiya Mulluku kihillotille ddennddo.

²⁹ Athu a mwiillaponimmo ennaahoosa akhwiiwa navettho enniiya. Ennaahoosa athu oopaneya ni oohoowa. Ennaakatamiha alleto voohiweerellani ddeko moolungama.

³⁰ Kaamwaashaasha muthu variyari viwa wi amake mpanda, wi iimelle mvo vakumuwalle, wi ateteze ellapo ni okipepesa wi kihiyoononge koma ngaamuphwanyille.

³¹ Sika ekaambiiwa kaananariwelleemi wunchichi. Kineerowoononga ni osha waka wookhara wonanko munllo. Vano kineerewaallaka mowaahokollosella ddoonanara. Mi Apwiya Mulluku koollota.”