Ezekiele 21 - Mawu a Mulluku

Nsupada na Apwiya

¹ Mawu a Apwiya yaawa wa miyaano wi,

² “We mwaana a muthu, rukunuwa owehe o Yerusalemu, ollalleye ddoohumullulla mapurwaaye oopatuleya nave ollotelle ddoohumullulla ellapo ya Israele.

³ Oyilleelle ellapo ya Israele wi Apwiya enallota wi, ‘Kineerollipana ni weyaano. Sika kineerohullulla nsupada naka munigoneloni mwiwa wi kiwiiphe athwaawo, oolungama vamodda ni oonanara.

⁴ Kineerohullulla nsupada naka munigoneloni mwiwa wi kiwiiphe athwaawo, oolungama ni oonanara, waambeella omwera ophiyera ompoto.

⁵ Vano athu eneerodduwella wi mi Apwiya koohullulla nsupada naka nave nginihokollosellattho munigoneloni.’

⁶ “Vano we mwaana a muthu, ipullella vamiitthoni viwa, ipullella wunchichi ni murima woovoreya.

⁷ Yuukoha eyo oniipullelleewe, waalleelle wi, ‘Kiniipullella ekaamba ya miyaha kiiwalleeminndda.’ Ddeereya ddennddo mirima ddiwa ddineerekotthukumella nave mattiiwa mattheene eneerofooka, eneerotathilla murima, m'makutthani mwiwa muneerekotthukumella. Ddinimawa nave ddineereweereya. Mi Apwiya Mulluku koollota.”

⁸ Mawu a Apwiya yaawa wa miyaano wi,

⁹ “We mwaana a muthu, ollotelle nave ollote wi Apwiya enallota wi, ‘Nsupada! Nsupada! Nohaandusiwa, noopukutiwa.

¹⁰ Nohaandusiwa wi niiphe, noopukutiwa wi nasherime wonanko ettari. Ninaahakallalle mwawiidde athwaaka evevullaka ekopwaaka yoollakella?

¹¹ Nsupada noovelleelliwa wi nipukutiwe ni wi nitukhulliwe. Nohaandusiwa ni opukutiwa wi nivelleelliwe m'mattani mwa muthu oyo aniipha.

¹² Winlle nave okhuwe vawi ddittheddenenndda ddineerewaamorella athwaaka, ddineerewaamorellattho oohoollella a Aisraele, eneerewiiphiwa ni nsupada vamodda ni athwaaka. Ekaamba ya yeella odduukuthe vathirimani moomoriwa ethakaraka.

¹³ Ddinaakukureye mwawiidde wi ddihooneye vawi aavevulla naari ekopwaaka yoollakella?’ Mi Apwiya Mulluku koollota.

¹⁴ “Koma we mwaana a muthu, llotella nave opa m'mattani, nsupada nimore wiilli apaalle oraru. Nsupada noowoonongesesa athu, noowaandusiwa phaama.

¹⁵ Athwaaka eneerotathilla murima ni omora. Kohaakhozera nsupada noonyezimilla. Nineerosherima wonanko ettari nave koonirumiha o mizinda wi niwiiphe.

¹⁶ We nsupada wiipheke o nnattanatta ni wuunyotthoni, orive weko onaatthoonye etthokaawo.

¹⁷ Mi kineerewoopa m'mattani ni oriiryiha osha murima waka. Mi Apwiya koollota.”

Nsupada na mwene a o Babulo

¹⁸ Mawu a Apwiya yaawa wa miyaano wi,

¹⁹ “We mwaana a muthu, olembe ezizindikiro va misewu miilli nnddo mwene a o Babulo anaaweelleeyemo aawaaka ni nsupada. Miillinnddo ddinaakhalle ddoovenyera o ellapo emodda. Otthipelle echikwangwani va makhullukano a misewu ddooya omuzindani.

²⁰ Olembe ezizindikiro va misewu nnddo nsupada ninaaweelliiwawo vooyaani o Raba a o Amoni navettho Yerusalemu, muzinda wampanda, a o Yuda.

²¹ Mwene a o Babiloni ohiimella ottilla vamakhullukano a misewu. Annoombesa makhanga ni mipaamba wi adduwelle ettilla yooweellamo. Anaveka ezeru wa terafimu ddaye nave anoombesa ni ohapa eenama.

²² Vano mu nnattanatta naye mookhalla mpaamba wa nikhanga woolembiwa Yerusalemu. Wenko mwene anallalleya dda owiipha athu navettho okhuwa wakhoto. Aneeropanga mutthipo wawunttakella machiwi, woophittella mikhuttu ddakhoto ni omaka nttattha.

²³ Koma wa athu a o Yerusalemu ddinooneya wonanko ollotella ddawoottha ekaamba yawi yahiiwanana ni mwenooyo. Koma aneerowuupusa dda machimwiiwa wi eneerophariwa okaporo.

²⁴ Sika ekaambiiwa mi Apwiya kinalloteemi wi, ‘Mookuupusa ddoolakwa ddanyu nave okiwukila wanyu wohooneyella vaweella. Munnooniha machimwaanyu va ddaweera ddanyu ddittheddene. Sika ekaambiiwa munaaphariweenyu okaporo.’ ”

²⁵ “Vano we owaalamulella Aisraele, we ooripihiwa ni oonanara, noophiya nllapo nawo, ollakiwa wawo woomallihella.”

²⁶ “Mi Apwiya Mulluku kinallota wi, ‘Rulla enduwiraawo, rulla echipewaawo yoomwene. Ddittheddene ddoosintha! Ookittha waawellihe nave oowella waakitthihe.

²⁷ Woonongeya! Woonongeya! Muzinda oneerewoonongeya koma kheddeereya ophiyera oowaakhella aphiyalle.’ Vano kineerovelleella wa olliye.”

Nsupada ni Aamoni

²⁸ “Vano we mwaana a muthu, llotella wi voollotani dda Aamoni ni okivevulla wiwa, mi Apwiya Mulluku kinallota wi, ‘Nsupada, Nsupada! Noohullulliwa wi noononge, noopukutiwa wi niiphe wi nisherime wonanko ettari.’

²⁹ “Nnddo enaddooniiwa m'masomphenya tti ddawoottha navettho makhanga enoombesiiwa tti oolleka. Muneerokhalla nimodda ni athu oonanara ayo nllapo niwa niphiyalle, ollakiwa wiwa woomallihella.

³⁰ “Ohokolloselle nsupada munigoneloni, kineeroweeruzani onipuroni nko mwayarelliweenyuwo, o ellapo ya makhollwaanyu.

³¹ Kineerewuunanariwellani nave owallaaka oneerokhara va nyuwaano. Kineerewuuhiyani m'mattani mwa athu eekuku, oodduwella woononga.

³² Muneerokhalla wonanko ekhuni viikho. Amodda eneerewuukhumihani nikhame mwiillaponi mwanyu mwemmo. Khaavo oyo anaawuupuwellenittho. Mi Apwiya Mulluku koollota.”