Ezekiele 2 - Mawu a Mulluku

¹ Vano yaallota wa miyaano wi, “We mwaana a muthu, imella nave kineerollota ni weyaano.”

² Alloteeye ni miyaano Munepa a Mulluku aavollowa mwa miyaano okiimesa nave kaamwiiwa Mulluku akillotihaka.

³ Aakilleella wi, “We mwaana a muthu, kinuuruma wa Aisraele, mutundu wa athu eekuku ayo ekiwukilalle. Alliwa ni makhollwiiwa aakhalla ekichimwellaka ophiyera ollello.

⁴ Athu yaalla tti awuumiha murima ni oohiiwellella. Kinuuruma wi wallote nnddo mi Apwiya Mulluku kinuulleelleemi.

⁵ Yiiwellella apaalle yakhoota (vawi tti athu oowukila) eneerodduwella wi namallotella oophiya variyari viwa.

⁶ We mwaana a muthu, ohoove apaalle otthukumellana nnddo enaallotekiiwa. Ohooveke naari miiwa apaalle kakande ddiwaapheelle naari wakhalla variyari va anamukalizi. Ohooveke mawiiwa nave ohikhupanyeke ni maweherwiiwa vawi athwaayo tti oowukila.

⁷ Waalleelle mawaaka, yiiwellella apaalle yakhoota vawi alliwa tti oowukila,

⁸ koma we mwaana a muthu, wiiwesese nnddo kinalloteemi. Ohinakhalla oowukila wonanko alliwa. Vano atthama wi oche eyo kinaawuuvaheemi.”

⁹ Vano voowehani kahoona nnatta noottaphurusa niphareelle nibukhu.

¹⁰ Aanittaphurusa akoonihella. Naalembiwa muwari ni otte mawu ookhupanya, awinlla ni ootulli.