Ezekiele 19 - Mawu a Mulluku

Nchipo nookhupanya

¹ Apwiya yaakilleella wi, “Vano we wiipe nchipo nookhupanya, wiipella enduna piilli dda o Yerusalemu. Ollote mawu wi,

² ‘Amaayo yaari wonanko mukango waamutthiyana variyari va anankhoro a mikango. Waanakona variyari va anankhoro a mikango waallellaka aniiwa.

³ Emullenlle mwaana mmodda aatthattuwa mukango. Waahuddera ophara, waamba waattakhuna athu.

⁴ Vano mitundu dda athu ddachenjezana dda mukangooyo, nllapo nimodda waamorella mullitini mwiwa, yaawuphara eyaana o ellapo ya Iguputo.’ ”

⁵ “Amennyaalle yoonille wi mwaana yamuroromelliiwa oophariwa, yaamullella mwaana mmodda mwa aniiwa, emutthattusa mukango wamasiva.

⁶ Waaneeteeta variyari va mikango ddimodda vawi waawaraalla, Waahuddera ophara, waamba waattakhuna athu.

⁷ Waakumulla mipanda ddiwa, ahoononga mizinda ddiwa. Attheene a mwiillaponimmo yahoova ekaamba ya onyakulla wa othuruma.

⁸ Vano mitundu dda athu a ellapo ddoowaapheella ddawa wi ddillipanena. Yaawuureya nthavi nave waamorella mu nlliti niwa.

⁹ Yaawuphara ewuvokhella muchisangalani, eyaana wa mwene a o Babiloni nave mwenooyo aawuvokhella mu endende wi onyakulla wiwa ohiwe wiiweyattho mu miyaango dda Israele.”

¹⁰ “Amaayo yaari wonanko muteekho wampesa wawaalliwa mukhwipi mwa maaddi. Wahimma phaama okhalla ni enthambi ddinchichi kaambiiwa vaakhalla maaddi manchichi.

¹¹ Waakhalla ni nthimwa noollipa noophwanella opangella ekopo ddoomwene, waarekama okhwaranya ddoomella ddimodda, waanooneya phaama ekaamba ya orekama wiwa ni waata wiwa wa enthambi.

¹² Koma waatulliwa moowalli okuhiwa, ahumma ni ephevo ya wookhuma nndduwa, ezipaso ddiwa ddaavakareya, nthimwa nahumma, muteekho muttheene osha ni munllo.

¹³ Vano wahaalliwa ochipululuni, mu ellapo yawumma yoohikhalla ni maaddi.

¹⁴ Munllo waakhara m'mutekhonimmo oshellelliha enthambi ni ezipaso ddiwa. Sika khonna nthimwa noopangella ekopo ya mwene.” Nenna tti nchipo nookhupanya nno niipiwa erive enthawi.