Ezekiele 18 - Mawu a Mulluku

Arive muthu anaakhwelle machimwaaye

¹ Mawu a Apwiya yaawa wa miyaano wi,

² “Kaambiiwa tini nyu athu a o Israele munaddivelliweenyu wuulluulla mwambi wawi ‘Makhollo aacha mpesa ddoohiithwa koma anamwani sika eruruvanlle miino?’

³ Ddawoona, kinimallupella vamiitthoni vaka wi khamuwa muwullotattho mwambi yoolla o Israele.

⁴ Okumi muttheene tti waaka. Okumi wa nikhollo tti waaka, wa mwaana tti waakattho. Muthu oyo achimwalle sika anaakhwe.

⁵ “Vaariki muthu oolungama oyo anathwara malamulo ni weera ddaphaama,

⁶ ahinachana omiyaangoni ddoollapellamo, ahinallapella mafano a o Israele, ahinamuripiha mwaara amwaneena apaalle okona ni mutthiyana ari omweerini,

⁷ ahinamuhoosa arive muthu koma annamuhokollosella echikole amukongolihalleeye makobiri, khaniiya, annaachiha eettalla nave annaawariha oosiwa,

⁸ ahinakongiriha wi apindulevo ello apaalle waakhella yawoonjereravo, aniihiiha weera ddoonanara nave khanaweha ekhove vookamullani millatu dda athu,

⁹ aniiwellella malangizwaaka ni malamulwaaka moororomelleya yooyo tti oolungamesesa nave aneerokhalla ni okumi. Mi Apwiya Mulluku koollota.”

¹⁰ “Muthu awi ddiidda ttuumuyara mwaana awiiya, awiipha athu,

¹¹ aweera nnddo attiitthinnya ehineerekiiwavo, oochana omiyaangoni ddoollapellawo, omuripiha mwaara amwaneena,

¹² owaahoosa oohoowa ni oopaneya, awaakha, oohihokollosa echikole ya oyo amukongolihalleeye makobiri, oollapella mafano nave aweera ddoonanara,

¹³ ookongoliha wi apindulevo ello apaalle waakhella yawoonjereravo. Ethiyo muthu awi ddiidda ttuukhalla ni okumi? Iyaayi, khakhalla ni okumi. Ekaamba yawi aheera ddoonanara ddittheddenenndda, aneerokhwa nave nikhame naye nineerokhalla vamuru vaye.”

¹⁴ “Koma mwaamodda muthu oonanaroolle ttuumuyara mwaana oyo anaawoone machimo a attiitthinnya koma oohaattakiha, oohichana omiyaangoni ddoollapellawo,

¹⁵ oohillapella mafano a o Israele, oohimuripiha mwaara a mwaneena,

¹⁶ oohimuhoosa arive muthu, oohaakhella echikole nave oohiiya, koma owaachiha eettalla ni waawariha oosiwa,

¹⁷ ookhoota weera ddoonanara oohikongoliha wi apindulevo apaalle wi aakhelle yawoonjerera, oothwara malangizwaaka ni wiiwellella malamulwaaka. Muthu awi ddiidda khakhwella va ddoolakwa dda attiitthinnya, aneerokhalla ni okumi.

¹⁸ Koma vawi attiitthinnya yaachimwa vawaahoosani athu amodda ni omwiiyera mbaliiwa navettho oweerella ddoonanara akhwiiwa sika eneerokhwa ekaamba ya machimwiiwa.”

¹⁹ “Mwaamodda ttuukoha wi, ‘Kaambiiwa tini mwaana ahinaallakiweeye ekaamba ya ddoolakwa dda attiitthinnya?’ Mwaanooyo aneerokhalla ni okumi ekaamba yawi anneera ddoolungama nave ddoororomelleya nave anniiwellella phaama malamulwaaka mattheene sika aneerokhalla ni okumi.

²⁰ Muthu anaakhwe tti oyo achimwalle. Mwaana khakhwella machimo a attiitthinnya nave attiitthi khekhwella machimo a mwaniwa. Muthu oolungama aneerohata dda echilungamwaaye. Muthu oonanara aneerohata ddoonanara ddaye.”

²¹ Muthu oochimwa ahiya machimwaaye aniiwellella malamulwaaka mattheene nave aneera ddoolungama ni ddaphaama, aneerokhalla ni okumi, khakhwa.

²² Ddoonanara ddaye ddittheddene khadduupuwelliwa. Aneerokhalla ni okumi ekaamba ya ddaweera ddaye ddoolungama.

²³ Mi Apwiya Mulluku kinallota wi, “Ethiyo mi ttuuhakallallana okhwa wa muthu oonananara? Iyaayi, waaweerokhalla phaama wa miyaano wi muthu ahiye ddoonanara ddaye wi akhalle ni okumi.”

²⁴ “Koma muthu oolungama atthattuwa oonanara, aneera ddoonanara ddoohiyanahiyana nnddo athu oonanara eneeriiwa, ethiyo muthu awi ddiidda ttuukhalla ni okumi? Iyaayi, ddaphaama ddittheddene khaddiwa dduupuwelliwa. Vawi aweera ddoonanara nave oochimwa aneerokhwa.

²⁵ Koma nyuwaano munallota wi, Haa! Apwiya eneeriiwanndda khe ddoolungama.” Nyu Aisraele, ngiiwani vano. Ethiyo ddaweera ddaka sika ddihiri ddoolungama? Ohikhalla ddaweera ddanyu sika ddihiri ddoolungama?

²⁶ Muthu oolungama ahiya ddoolungama ddaye aneera ddoonanara, aneerokhwa ekaamba ya ddoonanara ddaye.

²⁷ Komattho muthu oonanara ahiya weera ddoonanara ddaye aneera ddoolungama ni ddoororomelleya, aneerovullusa okumaaye.

²⁸ Vawi aadduwella onanara wa machimwaaye, aahiya, aneerokhalla ni okumi nave khakhwa.

²⁹ Koma nyu Aisraele munallota wi ddaweera dda mi Apwiya khe ddoolungama. Tti nyu Aisraele muhineera ddaphaama woohikhalla miyaano.

³⁰ “Sika vano mi Apwiya Mulluku kinallota wi, arive muthu mwa nyuwaano Aisraele kineeromweeruza moollikana ni mitteko ddaye. Rukunuwani murima, hiyani ddoonanara ddanyu wi machimwaanyu ehiwoonongeni.

³¹ Tathillani ddoonanara ddanyu ddakhalle nnddo mwakichimwenlleenyuna. Mukhalle ni murima wanaanweene ni munepa wanaanweene. Nyu Aisraele munaakhwelle tini?

³² Nginahakallallana okhwa wa arive muthu. Sika vano rukunuwani murima wi mukhalle ni okumi. Mi Apwiya Mulluku koollota.”