Ezekiele 17 - Mawu a Mulluku

Niphwanaphwaniho na mpungu ni mpesa

¹ Mawu a Apwiya yaawa wa miyaano wi,

² “We mwaana a muthu, waallotelle mwambi Aisraele ni waalleella niphwanaphwaniho nawi

³ mi Apwiya kinallota wi, ‘Vaakhalla mpungu muullupalli a muuphello muullupalli ni enthenga ddoorekama ddamalembamalemba. Yaawa o Lebanoni ephareelle enthambi ya otthoka wa muteekho wa mukunguza.

⁴ Yahinttaka etthokatthoka ya enthambeeyo eyaana o ellapo yamalonda yayihiya mu muzinda wa amalonda.

⁵ Vatulli viwa yaakusamo mmiddo mwiillaponimmo yawaalla va nipuro na ethaya yaphaama mukhwipi mwa maaddi manchichi. Yaawaalla moollikana ni mmo munaallelliwa muteekho wa nnjalle.

⁶ Vano ophuwalle waatthattuwa muteekho wa mpesa woovattha vatthivatthi. Enthambi ddiwa ddaweha oddullu nko waari mpungu koma misisi ddiwa ddahiitthipella. Muteekho wampesooyo waakhalla ni enthambi owaaka makukhu manchichi.’

⁷ “Koma vaakhallattho mpungu mmodda muullupalli wa muuphello muullupalli ni wa enthenga ddinchichi. Muteekho wa mpesooyo waakhoromaniha misisi ddiwa ddinaweha nko waari mpungooyo. Nave waawehiha enthambi ddiwa wa mpungooyo wi apaalle ttuuwuhellella maaddi manchichi okhwaranya ayo yaari mvo wamenlliiwa.

⁸ Koma muteekhooyo waari waalliwe khalle va ethaya yaphaama mvo vaari maaddi manchichi wi ophuwe enthambi ni wimma ezipaso nave wi okhalle wooreera.

⁹ “Wallote wi Apwiya Mulluku enakoha wi, ‘Ethiyo mpesa yoolla oneerewunnuwa phaama? Ethiyo mpungoolle khotulla misisi ni okhaddulla enthambi ddiwa wi makattha enyaalle? Khopaalla masiva manchichi apaalle athu anchichi wi otulliwe?

¹⁰ Ethiyo naari ewaallille vaamodda ttuuwunnuwa? Ethiyo khonyaalla yaawoopaka ephevo ya wookhuma nndduwa, onyaalleella vaavo ewaallilliiwa?’ ”

Ottaphullella wa mwambi

¹¹ Mawu a Apwiya yaawa wa miyaano wi,

¹² “Akohe athu oowukilaalla wi, ‘Munnadduwella ottaphullella wa mwamboolla?’ Waalleelle wi, ‘Mwene a o Babiloni aaya o Yerusalemu aamuphara mwene ni enduna ddaye ayaana o Babiloni.

¹³ Amukusa mwaana mmodda a mwenooyo ekeraatthiha echipangano nave aamullupelliha wi akhalle awiiwellella. Ahaaphara attekweene attheene a mwiillaponimmo

¹⁴ wi omwene wa ellapweeyo ovevuwe, ohiwukilettho koma wi okhallevo voosungani echipangano eyo yakeraatthihalliiwa.

¹⁵ Koma mwenooyo aamuwukila mwene a o Babiloni aarumiha o Iguputo oohoollella wi yaaveke akavalo ni akhoto anchichi. Ethiyo mwene awi ddiiddo ttuupambana? Ethiyo aweera ddiiddo ttuuvulluwa? Ethiyo ttuutathilla echipangano nave yoopowe?’ ”

¹⁶ “Mi Apwiya Mulluku kinallupella vamiitthoni vaka wi, ‘Mwene yooyo anaakhwelle o Babiloni, mu ellapo ya mwene amuzozillooyo. Aavevulla ollupella waye nave aatathilla echipangano eyo akeraatthihalleeye ni mwene mmoddooyo.

¹⁷ Farao ni mullokwaaye wakhoto khawora omukavihera mwenooyo vawi akhoto a o Babiloni eneerowaapheella muzindooyo ni mikhuttu owaaka malliti wi ewoononge athu anchichi.

¹⁸ Vawi mwene a o Yuda aatathilla echipangano nave vawi khaathwarille nnddo allupenlleeye khavulluwa.’

¹⁹ “Mi Apwiya Mulluku kinallupella vamiitthoni vaka wi olliye oovellulla ollupella waye nko eerilleeye wa miyaano nave ootathilla echipangano eyo akeraatthihalleeye ni miyaano. Sika ddinaakhalle vamuruni vaye.

²⁰ Kineeromureya nthavi nave kineeromukola mu musamphaaka. Kineeromupharella o Babiloni nave kineeromullaka wenko ekaamba yawi khaakiroromenlle.

²¹ Akhotwaaye attheene amasiva eneerewiiphiwa okhotoni nave oovulluwa eneeropallalleyella o ezigawo ddittheddene. Vano muneerodduwella wi mi Apwiya koollota.”

Madaliso amuhoollo

²² “Mi Apwiya Mulluku kinallota wi, ‘Kineerophareella etthoka ya enthambi ya muteekho wamukunguza nave kineerowaalla. Kineerewinttakavo etthokatthoka nave kineeroyaalla vamwaangoni woorekamesesa.

²³ Kineerowaalla vamwaangoni woorekamesesa wa o Israele. Oneerophuwa ni wimma ezipaso. Sika oneerotthattuwa mukunguza waphaama. Epallame dda mitundu ddittheddene ddineerokhalla mu muuthuuchi ni enthambi dda muteekhooyo.

²⁴ Miteekho ddittheddene dda mwiillaponimmo ddineerodduwella wi tti miyaano kinakhuveyiha miteekho ddoorekama nave kinarekamiha miteekho ddookhuveya. Kinnuumiha miteekho ddikitthi nave kinnaphuwiha miteekho ddawumma. Mi Apwiya koollota ddenndda nave kineeroddeera.’ ”