Ezekiele 16 - Mawu a Mulluku

Ohiroromelleya wa Yerusalemu

¹ Mawu a Apwiya yaawa wa miyaano wi,

² “We mwaana a muthu, moonihelle Yerusalemu makhallellwaaye oonanara.

³ Omulleelle Yerusalemu wi mi Apwiya Mulluku kinallota wi, ‘Kanani tti ellapo yamakhollwaawo nave wayarelliwe wenko. Attiittho yaari Muamori nave amaayo yaari Muhiti.

⁴ Nave oyariwe kheyaawuphaddille ntukhwa, kheyaawuuhapihalle wi weelle. Kheyaawuhenlle mwiinyu moollikana ni mmo ddinakhallelliiwa nave kheyaawuuhuruwenlle mukuwoni.

⁵ Khaavo naari mmodda uupwathille apaalle wuumorella ethakaraka wi ttuuweerella ddenndda. Koma yahuuvokhella vaatte vawi waanaananara va nllapo nno wayariweewe.’

⁶ Vano kiwiille kaawoona wuupuruwaka munikhameni. Kahuullotiha ori munikhameni mwemmo kuulleella wi, ‘Khalla ni okumi

⁷ nave wunnuwe wonanko mmiddo wa m'matani.’ Wahunnuwa nave waarekama, waambeella woona mweeri. Mapelle yahaamba omella, meehaawo yahaamba wunnuwa. Komathi waari epwillimwinndive ni oosiwa.”

⁸ “Kiviraka, kahoona wi enthawaawo yootthelliwa yaakwakhwana. Vano kahuukhuneella ni mukanjwaaka ni wiipitthiha epwillimwinddaawo. Kaallupella ni okeraatthiya echipangano nave waatthattuwa aaka, Mi Apwiya Mulluku koollota.”

⁹ “Kahuuhapiha kuuhuwa nikhame nawo ni wuuhella makhura.

¹⁰ Kahuuwariha ddoowara ddoopeta ni esapato ddanttapara. Kahuuvaha ekuwo yabafuta kuuwariha ddoowara ddoowallamella mutengo.

¹¹ Kahuureeriha ni ddooreerihella, kuuwariha ebangili m'muwononi mwawo ni mikhova munikohini mwawo.

¹² Kahuuwariha echipini vaphunani vawo, endolo m'maaruni mwawo ni enduwira yoomwene yooreera omuruni wawo.

¹³ Waawara ddooreerihella ddagolide ni ddasiliva. Ddoowara ddawo ddaari ddabafuta, ddoowallamella mutengo ni ekuwo ddoopeta. Waanacha othu waphaama, enwi ni makhura a olivi. Wahunnuwa mooreera nave waatthattuwa wonanko mwaaramwene.

¹⁴ Epilli ya oreera wawo yaaphiya va ellapo yavatthi ettheene ekaamba yawi nriiho nno kuuwarihalleemi nahuureeriha wunchichi. Mi Apwiya Mulluku koollota.”

¹⁵ “Koma wahiitukhullana oreera ni ovuwa wawo nave wahaamba oraruwa onakona ni arive muthu oovira.

¹⁶ Waakusa ddoowara ddawo ddimodda oreerihana mapurwaawo oollapellamo onararuwawo. Ddenndda kheddineereyeke nave khaddiwa ddeereya.

¹⁷ Waakusattho ddooreerihella ddaka ddagolide ni ddasiliva nnddo kuuvahilleemi opangella mafano eellopwana onararuwana.

¹⁸ Mafanwaayo wahaawariha ddoowara ddawo ddooreera onavelleella makhuraaka ni lubanaaka wa alliwa.

¹⁹ Waakusa ddoocha kuuvahilleemi, othu waphaama, makhura ni enwi nnddo kuuchihelleemi oddivelleella wa alliwa wonanko mukutho wa nthuko naphaama. Mi Apwiya Mulluku koollota.”

²⁰ “Wahaakusa anaawo aallopwana ni aatthiyana ayo kuuyarenlleemi waavelleella o mafano wonanko mukutho. Ethiyo oraruwa wawonko khawuukwakhwanne

²¹ onawiipheewe anaaka wi waavelleelle o mafanwaawo?

²² Ekaamba ya oraruwa wawo woonanara wootiwalla mallapo eenamwanaawo, waariiwe eepwillimwinddi, oosiwa nave wuupuruwaawe munikhameni mwawo.”

Okumi wa Yerusalemu tti wooraruwa

²³ Apwiya Mulluku enallota wi, “Otulli, otulli wa weyaano ekaamba yawi wohoonjerera va ddoonanara ddawo ddittheddene

²⁴ waahiimakella mapuro ooraruwella virive veko.

²⁵ Waamaka va orive musewu. Vano waananariha oreera wawo vawiivelleellani wa arive muthu oovira. Wookhalla oraruwaka mooheerengeya.

²⁶ Waararuwa ni Aiguputo ooraruwa, awaatamana ni weyaano nave waakishiha murima ekaamba ya waata wa oraruwa wawo.

²⁷ Kahuullaka ni nnatta naka nave kahuuyevihella ellapwaawo. Kahuuhiya m'mattani mwa adanaawo, Afilisti ayo yawulliwa muru ni makhallellwaawo oonanara.

²⁸ Ekaamba ya minkhella ddawo waararuwattho ni Asiriya komattho khewaakholliwe.

²⁹ Vano waavirellella oraruwa ni Ababiloni, athu a ellapo ddooddivelliwa malonda. Koma khewaakholliwe.”

³⁰ Apwiya Mulluku enallota wi, “Murimaawo tti woofooka wunchichi ekaamba yawi vaweerani ddenndda wonanko mutthiyana ooraruwa oohiwulliwa muru.

³¹ Waamaka mapurwaawo ooraruwa va orive musewu nave nipuro noollapellamo va nirive nthato. Koma we khaweera wonanko eneerella ooraruwa amodda vawi khawaapaalla ollivelliwa.

³² We mutthiyana ooraruwa, waanakonda allopwana eelleto okhwaranya mamuno.

³³ Allopwana ennavelleella makobiri wa atthiyana attheene ooraruwa. Koma ooraruwa ni weyaano onnaavaha emphaso wi waakope ovenyera o erive embali nave wi ekoneke ni weyaano.

³⁴ We tti oohiyana ni atthiyana amodda va oraruwa vawi khaavo uukohera wi oraruwena.”

Yerusalemu anallakiwa ni Mulluku

³⁵ “Vano we mutthiyana ooraruwa, ngiiwa mawu a Apwiya.

³⁶ Apwiya Mulluku enallota wi, ‘Waarulla moohiwulliwa muru wahooniha epwillimwinddi vooraruwani ni ookondanaawo nave ni mafanwaawo, vawaavelleellani anaawo wi yiiphiwe wonanko mukutho woovelleelliwa o mafano.’

³⁷ Vano kineerewaatthukumaniha ookondanaawo ayo yahakallalla ni weyaano, attheene ayo waakondeewe ni ayo wawiiteewe. Kineerewaatthukumaniha ovenyera embali ddittheddene nave kineerewuurulla vamiitthoni viwa wi yoone epwillimwinddaawo.

³⁸ Kineeroweeruza wonanko aneeruzelliwa mutthiyana ooraruwa ni awiipha. Ekaamba ya ehachaaka kineerewuukhumiha nikhame moosha murima wunchichi.

³⁹ Kineerewuuhiya m'mattani mwa awuukonda. Eneerewoononga mapurwaawo ooraruwamo nave eneerokumulla mapuro oollapellamwaawo. Eneerewuurulla ddoowara ddawo nave eneerokhonyongolla ddawiireerihella ddawo ddaphaama. Sika eneerewuuhiya ori epwillimwinddive nave oosiwa.

⁴⁰ Eneeroruma mulloko wa athu wi wuuvokhe malluku ni wuuphaddaphadda ni masupadiiwa.

⁴¹ Eneerohella munllo enyumba ddawo nave eneerewuullaka vaweella atthiyana anchichi yoonaka. Oraruwa wawo onaamallelle vaavo nave khowa waallivellattho awuukondaawo.

⁴² Vano kineerohiya, owallaaka oneeromalla nave ngiwa kiweerellattho ehache. Kineereweera ellapo tuu, ngoopattho owalli.

⁴³ Weyaano waatiwalla mallapo eenamwanaawo nave waakishiha murima ni ddeko nnddo weenreewe. Sika ekaambiiwa miyaano kuuhokolloselleemi ddoonanara ekaamba ya nnddo weerilleewe. Vallethi waahoonjerera oraruwa va ddoonanara ddawo ddimodda. Mi Apwiya Mulluku koollota.”

Mwaana anaallata amennya

⁴⁴ “We Yerusalemu, attekweene eneerowuullotella mwambi wawi, ‘Mwaana aamutthiyana aallante amennya.’

⁴⁵ Weyaano tti mwaana a amaayo ayo yiitanne ni amamuniwa owaaka aniiwa, Weyaano tti mwanamunniwa a asinno ayo yiitanne ni amamuniwa ni aniiwa. Amaayo yaari Muhiti nave attiittho yaari Muamori.

⁴⁶ Muullupallaawo tti Samariya oyo akhalla ompoto ni mizi ddaye. Mung'onong'onwaawo tti Sodomu oyo akhalla omwera ni mizi ddaye.

⁴⁷ Weyaano khewaawiiwananne ni ettilla ddiwa navettho ddaweera ddiwa ddoonanara. Koma viviralle enthawi yooyeva waheera yoonanara waakhwaranya alliwa.

⁴⁸ Kinimallupella vamiitthoni va mi Apwiya Mulluku, muullupallaawo Sodomu ni mizi ddaye khaaweerille mmo weerille weyaano ni mizi ddawo. Mi Apwiya Mulluku koollota.

⁴⁹ Ochimwa wa Sodomu ni mizi ddaye waari wawi aaniitukhulla ni eyuumaaye yinchichi nave khaapwatha oohoowa ni oopaneya.

⁵⁰ Aaniitukhulla wunchichi aneera ddoonanara vamiitthoni vaka. Sika ekaambiiwa kawoonongilleemi koonille.

⁵¹ “Samariya kheerille naari hafu a machimo weerilleewe. Weyaano waheera ddoonanara ddinchichi waakhwaranya asinno eellaalla wawi alliwa yooneya wonanko oohichimwa ophwanaphwaniha ni weyaano.

⁵² Vano weyaano woonihe owulliwe muru nave ovevuwe. Ochimwa wawo tti woonanara wunchichi waakhwaranya asinno wawi alliwa ahooneya Vano weyaano woonihe owulliwe muru nave ovevuwe. Vano we wooneyille wonanko oohichimwa, owulliwe muru nave ovevuwe.”

Sodomu ni Samariya eneerohokolloselliwa mwakhalle

⁵³ “Koma kineeromuhokollosella ddaphaama Sodomu ni mizi ddaye. Kineereweera emoddamoddave yeeyo ni Samariya ni mizi ddaye. Va enthawi yeeyo naweenettho Yerusalemu kineerewuuhokollosella ddaphaama.

⁵⁴ Sika owulliwe muru nave ovevuwe ekaamba yawi waawooniha asinno wonanko oohichimwa.

⁵⁵ Koma mung'onong'onwaawo Sodomu ni mizi ddaye aahokolloselliwaka mwakhalle nave muullupallaawo Samariya ni mizi ddaye aahokolloselliwaka mwakhalle weyaano oneerohokolloselliwattho mwakhalle.

⁵⁶ Ethiyo khewaamunyaambusa mung'onong'onwaawo Sodomu enthawi wiitukhulleseewe

⁵⁷ onanara wawo ohinadduwanyeye. Vanothi munnaphwanaphwana vootthattuwani yoonyaambuseya wa a Edomu ni wa attheene owaatamanana navettho wa Afilisti ni oowaapheella attheenaayo ennuuvevulla.

⁵⁸ Weyaano onaphwanella ollakiwa ekaamba ya oraruwa wawo ni makhallellwaawo oonanara. Mi Apwiya Mulluku koollota.”

Echipangano yeenthawi yoohimalla

⁵⁹ “Mi Apwiya Mulluku kinallota wi, ‘Kineerewuullaka ekaamba ya ddoonanara nnddo weerilleewe. Weyaano waavevulla ollupella wawo vootathillani echipangano.

⁶⁰ Koma kineerewuupuwella echipangano kakeraatthihalleemi ni weyaano ovenyera enamwanaawo. Kineereweera echipangano emodda, echipangano yoohimalla.

⁶¹ Vano oneerekewuupuwella meetellwaawo akhalle. Oneerowulliwa muru voowaakhellani asinno, muullupallaawo ni mung'onong'onwaawo. Kineerewaarumiha wa weyaano wi ekhalle wonanko anaawo aatthiyana naari alliwaayo ehiri mu echipanganwaaka ni weyaano.’

⁶² Kineerokeraatthiha echipangano ni weyaano nave oneerodduwella wi mi tti Apwiya.

⁶³ Kuukhululukella ddoonanara ddawo ddittheddene nnddo weerilleewe, oneerodduupuwella nave khokhalla ni yoollota ekaamba ya owulliwa muru wawo. Mi Apwiya Mulluku koollota.”