Ezekiele 14 - Mawu a Mulluku

Ollakiwa wa oollapella mafano

¹ Vano amodda mwa attekweene a Aisraele yaawa ekeraatthi vamiitthoni vaka.

² Nave mawu a Apwiya yaawa wa miyaano wi,

³ We mwaana a muthu, athu yaalla aahiya murimiiwa va mafano nave miitthwiiwa va ddookwakwatulliha ni waachimwiha. Ethiyo alliwa enaganiza wi kineerowaakhulla yaveka ezeru wa weyaano?

⁴ “Vano alleelle wi mi Apwiya Mulluku Amasiva Mattheene kinallota wi, ‘Muisraele mmodda ahiya murimaaye va mafano ni miitthwaaye va ddookwakwatulliha ni waachimwiha, anaya wa anamallotella, mi Apwiya kineeromwaakhulla moollikana ni waata wa mafanwaaye.

⁵ Kineerewaakopa Aisraele ayo ekihiyalle ekaamba ya mafanwiiwa.’

⁶ “Sika alleelle Aisraele wi mi Apwiya Mulluku kinallota wi, ‘Rukunuwani murima wi muhiye mafanwaanyu. Mutathille ddoonanara ddanyu ddittheddene.’

⁷ “Arive Muisraele apaalle mulleto ookhalla variyari viwa aakikhoota, ahiya murimaaye muttheene va mafano nave ahiya miitthwaaye va ddookwakwatulliha ni waachimwiha, awa anakiveka ezeru oweella mwa namallotella, miyaano kineeromwaakhulla.

⁸ Kineerollipanana muthu yooyo, kineeromutthattusa echizindikiro ni yoottheelliha. Kineeromuvenyiha variyari va athwaaka, Vano muneerodduwella wi mi tti Apwiya.”

⁹ “Namallotella allekiwa anallotella, tti miyaano kimullekille. Sika kineeromoononga nave kineeromuvenyiha variyari va athwaaka Aisraele.

¹⁰ Ddawoona, kineerewaallaka. Ollakiwa wa namallotella ni muthu ooveka ezeru wa miyaano onaakhalle emoddamodda.

¹¹ Kinaaweere ddenndda wi Aisraele ehihollowe nave wi ehiye machimwiiwa. Eneerokhalla athwaaka nave miyaano kineerokhalla Mullukwiiwa. Mi Apwiya Mulluku koollota.”

Arive muthu anaakhwelle ddaaye

¹² “Mawu a Apwiya yaawa wa miyaano wi,

¹³ We mwaana a muthu, ellapo yakichimwella voohikiroromellani, kineeroyoononga nave kineeroyeviha yoochiiwa. Kineerorumiha ettalla mwiillaponimmo nave kineerowoononga athu ni enama.

¹⁴ Naari athu araru, Nowa, Daniele ni Yobu yaariki wenko yaavulluse okumiiwave ekaamba ya ororomelleya wiwa. Mi Apwiya Mulluku koollota.”

¹⁵ Mwaamodda kaarumihe enama ddawoopiha wi ddeete mwiillaponimmo ni owoononga athwiiwa ophiyera ellapweeyo etthattuwalle echipululu yawi khaavo muthu aavirekemo ekaamba ya enama ddawoopihannddo.

¹⁶ Kinallupella vamiitthoni vaka wi naari athu ararwaalle yaariki wenko akumi, alliwaalle kheyaawore waavullusa aniiwa. Yaavulluse okumiiwave koma ellapweeyo keeroyitthattusa echipululu.

¹⁷ Mwaamodda kaarumihe ekhoto o ellapo yeeyo ni olamula wi eye yawoononge athu ni enama mwiillaponimmo.

¹⁸ Kinallupella vamiitthoni vaka wi naari athu ararwaalle yaariki wenko akumi, alliwaalle kheyaawore waavullusa aniiwa. Yaavulluse okumiiwave.

¹⁹ “Mwaamodda kaarumihe mullilli o ellapo yeeyo ni wooniha owallaaka vawaakhumihani nikhame ni owoononga athu ni enama.

²⁰ Naari athu araru Nowa, Daniele ni Yobu yaariki wenko akumi kheyaawore waavullusa aniiwa. Yaavulluse okumiiwave ekaamba ya echilungamwiiwa.”

²¹ Mi Apwiya Mulluku kinallota wi, “Oneerokhalla ddawoopihesesa kamoriha va Yerusalemu ekhoto, ettalla, enama ddawoopiha ni mullilli wi kiwoononge athu ni enama.

²² Vakhalla amodda oovulluwa wi yaahoollelle anamwani aallopwana ni aatthiyana yawa wa nyuwaano mwaawehesese wi moone mmo enaakhallellekiiwa ni mmo enaawerellekiiwa. Mirima ddanyu ddineerokeraattheya muupuwella nnddo keerilleemi, ollaka otthewene killakilleemina muzindooyo.

²³ Mirima ddanyu ddineerokeraattheya moona mmo enaakhallellekiiwa nave enaawerellekiiwa sika muneerewiiwesesa wi ngimweerelle ddennddo Yerusalemu vihiri ekaamba. Mi Apwiya Mulluku koollota.”