Ezekiele 13 - Mawu a Mulluku

Mawu owaahumullulla anamallotella awoottha

¹ Mawu a Apwiya yaawa wa miyaano wi,

² “We mwaana a muthu, ollotelle ddawaahumullulla Aisraele ayo enallotella dda m'muruni mwiwa nave waalleelle wi yiiwe mawu a mi Apwiya.

³ Mi Apwiya Mulluku kinallota wi, ‘Otulli anamallotella ookarangeya ayo enallotella dda m'muruni mwiwa, ehoonille erive ello yoovenyera wa miyaano.

⁴ Nyu Aisraele, anamallotellaanyu eri wonanko akhatwe am'matepeni.’

⁵ Khamuwenlle esiri wi mwapotokose mmo mwakumuwalle wi Aisraele eteteziwe moollipa vakhotoni nllapo na Apwiya.

⁶ Anamallotellaayo ennallotella ddawoottha nave ennoombesa ddawaahollosa. Ennallota wi, ‘Enallota tti Apwiya koma Apwiya ehimurumalle naari vang'ono.’ Koma enatiyera wi ddennddo ddineereweereya.

⁷ Munnoona m'masomphenya awoottha ni woombesa ddawaahollosa. Nave Munallota wi, ‘Enallota tti Apwiya,’ Naari kihillotille.

⁸ “Sika vano mi Apwiya Mulluku kinallota wi, ‘Kinnuuvaanyihani wi mawaanyu tti oohikhalla ni mutteko nave masomphenyaanyu tti awoottha.

⁹ Kineerewaallaka anamallotella ayo enoona m'masomphenya awoottha ni awoombesa moohollosa. Khekhallana va mutthukumano wa athwaaka. Kheyeerengelliwa nimodda ni Aisraele nave khehokollweella mu ellapo ya Israele. Sika muneerodduwella wi mi tti Apwiya Mulluku.’

¹⁰ “Ddawoona, anamallotella yaanaahollosa voollotani wi oneerokhalla murendelle koma ohiri murendelle nave athu yamaka esiri yoohillipa nave anamallotella yaanayireeriha ni otooto waweella.

¹¹ Waalleelle oomara otootwaayo wi esireeyo eneerokumuwa. Murimu aneerorupa mwamasiva, marallalla muullupalli eneeromora nave oneerewoopa ephevo yawoopiha.

¹² Sika esireeyo eneerokumuwa nave athu eneerewuukohani wi ‘Ethiyo esiri yoomara otootweelle eri wuuwi?’ ”

¹³ “Ella sika ekaambiiwa mi Apwiya Mulluku kinalloteemi wi, ‘Kineerorumiha ephevo yawoopiha moosha murima. Kineeromurupiha murimu amasiva moowalli Kineeromoriha marallalla muullupalli moovoriiha murima ophiyera esireeyo yoonongeyesese.

¹⁴ Kineerokumulla esireeyo ophiyera matthipello yooneyille. Sika eneerokumuwa nyuwaano muneerokhwella mwemmo.’ Vano muneerodduwella wi mi tti Apwiya.

¹⁵ Mmu sika kinaapharihelleemi mutteko osha murima waka va esireeyo owaaka va alle yamara otootwaalle. Sika kineerewuulleellani wi, ‘Esiri yookumuwa nave ooyimara otootwaalle yoonongeyelle nimodda.’ ”

¹⁶ “Eneerokhwattho anamallotella a o Israele ayo yallotella o Yerusalemu alle yallota wi ahoona masomphenya amurendelle koma murendelle ohiivo. Mi Apwiya Mulluku koollota.”

Anamallotella eetthiyana awoottha

¹⁷ “Vano we mwaana a muthu, llota wa atthiyana ayo eri variyari va athwaawo ayo ennallotella dda m'muruni mwiwa, sika waallotelle mowaahumullulla.”

¹⁸ “Waalleelle wi mi Apwiya Mulluku kinallota wi, ‘Otulli wa aatthiyana ayo enasowa ezitumwa dda m'muwononi ayottho enasowa ekuwo ddoomuruni ddoohiyanahiyana wi yaakopeke athu. Ethiyo munapaalla waakopa athwaaka koma nyuwaano muvulluwe?

¹⁹ Mookivenyihella olemu vamiitthoni va athwaaka voopaallani waakhella barele a m'mattani ni enyenyeri dda buledi. Munnawiipha athu oohiphwanella wiiphiwa nave munnaavullusa athu oohiphwanella ovullusiwa voowoottotthani athwaaka ayo eniiwellella ddawoottha ddanyu.’

²⁰ “Ekaamba ya yeella mi Apwiya Mulluku kineeroddikhoota ezitumwa m'miwononi, ddawaakopa athu wonanko muniipha epallame. Kineeroddikhoddolla m'miwononi mwanyu wi kaavulluse athu ayo mwaakopilleenyu wonanko epallame.

²¹ Kineeroddaahulla ekuwo ddanyu ddoomuruni nave kineerewaavullusa athwaaka m'mattani mwanyu. Khamukhallattho ni masiva owaakopella. Sika muneerodduwella wi mi tti Apwiya.

²² Woottha wanyu wahaatathilliha murima athwaaka oolungama ayo mi kihinapaalleemi wi etathille murima. Mwaawummiha murima athu oonanara wi ehihiye machimwiiwa wawi khewora ovullusa okumiiwa.”

²³ “Sika ekaamba ya yeella khamoonattho masomphenya awoottha nave khamoombesa mowaahollosa. Kineerewaavullusa athwaaka m'mattani mwanyu. Vano muneerodduwella wi mi tti Apwiya.”