Ezekiele 12 - Mawu a Mulluku

Yoophwanaphwanihella yookaporo

¹ Mawu a Apwiya yaawa wa miyaano wi,

² “We mwaana a muthu, onakhalla variyari va athu oowukila. Alliwa aakhallana miittho awoonella koma khenoona. Aakhallana maaru awiiwella koma kheniiwa.

³ Vano we mwaana a muthu, mukuse katundwaawo okhalle wonanko muthu anaya wuukaporoni. Nave otimulle otthaana oya o nipuro nimodda alliwa ewoonaka. Apaalle ttuuwiiwa naari eri oowukila.

⁴ Omukhumihe otthaana katundwaawo alliwa yoonaka. Nave misikuwa ovenye owaninyu wonanko onaya wuukaporoni.

⁵ Ophovolle mulliha vasirini nave okhumelle vaavo alliwa yoonaka

⁶ Wiireye katundwaawo vanthurini alliwa yoonaka nave oye otte wiipiphini. Okhuneelle owiitthoni wi ohooneke nko onayeewe ekaamba yawi kohuutthattusa echizindikiro yowaachenjeza athu a mu nibanja na Aisraele.”

⁷ Kaheera moollikana ni mmo yakilleellelliiwa. Kaamukhumiha katundwaaka otthaana kimumaka wonanko ooyaana wuukaporoni. Misikuwa kaaphovolla esiri ni matta. Waripiiwa kaamutukhulla katundwaaka vanthurini kikhumana alliwa ekoonaka.

⁸ Osaka mawu a Apwiya yaawa wa miyaano wi,

⁹ “We mwaana a muthu, ethiyo Aisraele, athu oowukilaalla, kheyuukohille wi oneera tini?

¹⁰ Waalleelle wi mi Apwiya Mulluku kinallota wi, ‘Othengoolla onallota dda oohoollella a o Yerusalemu navettho dda Aisraele attheene ookhalla wenko.’

¹¹ Waalleelle wi weyaano tti echizindikiro yowaachenjeza. Nnddo ddinaweereyella weyaano ddineeroweereyellattho alliwa. Eneeromakiwa ni opharelliwa wuukaporoni.

¹² Oohoollelliiwa aneerewiireya katundwaaye vanthurini waripa nave aneerotimulla. Aneerokhumella vasirini mvo athu yaphovollilliiwa akhuneelle owiitthoni wiwa wi ehoone nko enayiiwa.

¹³ Koma kineeromureya nthavi nno ninaamukole. Kineeromukusella o Babiloni ellapo ya Akaldeya koma khoonaka nave anaakhwelle wenko.

¹⁴ Athu attheene omwaatamella, oomukavihera ni akhotwaaye, kineerewaapallallesella embali ddittheddene ddisese dda ellapo yavatthi nave kineerowiikariha ni nsupada.

¹⁵ Sika eneerodduwella wi mi tti Apwiya nave kineerewaamwaramwara variyari va athu a mitundu ddeelleto ni waapallallesella o ellapo ddinchichi.

¹⁶ Koma kineerewaahiya athu aweerengeya wi evulluwe o ekhoto, ettalla ni mullilli wi yatthopoolle ddaweera ddiwa ddittheddene ddoonanara variyari va athu nko enayiiwawo. Sika eneerodduwella wi mi tti Apwiya.”

Echizindikiro ya namallotella ootthukumella

¹⁷ Vatulli viwa mawu a Apwiya yaawa wa miyaano wi,

¹⁸ “We mwaana a muthu, waachaka otthukumelleke, waawiryaka otthukumelleke mwawoova.

¹⁹ Alleelle a mwiillaponimmo wi kinallota mi Apwiya Mulluku dda athu ookhalla o Yerusalemu navettho mu Israele tti ddawi, Athwaayo Eneerekoocha mootthukumella ni owirya mwawoova vawi ellapwiiwa eneerewaakhiwa erive ello ekaamba ya echiwawa ya athu ookhalla mwemmo.

²⁰ Mizinda dda athu ddineerewoonongiwa nave ellapo eneerotthattuwa ntepe. Sika muneerodduwella wi mi tti Apwiya.”

Mwambi ni ottaphullella wiwa

²¹ Mawu a Apwiya yaawa wa miyaano wi,

²² “We mwaana a muthu, ethiyo mwambi oniiweya mu ellapo ya Israeleella onattaphullella tini? Mwambooyo tti wawi, ‘Mallapo ennaata koma dduupullulliwe m'masomphenya khaddineereya.’

²³ Vano waalleelle athu wi mi Apwiya Mulluku kinallota wi, kineerowumalliha mwambi yoolla, khowa wiiweyattho mu Israele. Koma enthawi eri vakhuviru wi ddittheddene kuupullullalleemi m'masomphenya ddeereye.

²⁴ Enthawi yeeyo khokhallattho ddawooneya m'masomphenya awoottha. Khokhallattho woombesa wowaahollosa Aisraele.

²⁵ Mi Apwiya kineerollota nnddo kinaapaalleemi nave ddineereweereya. Khavikhalla ddooselliha koma mu mallapwaanyu yaalla, kineeroddeera, nyu athu oowukila. Mi tti Apwiya Mulluku.”

²⁶ Mawu a Apwiya yaawa wa miyaano wi,

²⁷ “We mwaana a muthu, Aisraele attheene enaganiza wi ddeko onaddooneewe m'masomphenya ni ollotella wawo khaddeereya naanweene vaava.

²⁸ Vano waalleelle wi, Apwiya Mulluku kinallota wi, ‘Ddoollota ddaka khaddiwa ddiselliwattho kineereweera erive ello killotilleemi. Mi Apwiya Mulluku koollota.’ ”