Ezekiele 11 - Mawu a Mulluku

Ezekiele anaahumullulla oohoollella oonanara

¹ Munepa a Mulluku aakikusella o mullako wa wookhuma nndduwa wa enyumba ya Apwiya. Vamullakonimvo vaakhalla allopwana 25 nave variyari viwa kaawoonavo oohoollella, Yazaniya mwaana a Azuri ni Pelatiya mwaana a Benaya.

² Apwiya yaakilleella wi, “We mwaana a muthu, allopwana eellaalla tti ayo enapangana ddoonanara ni waalangiza athu ddoonanara m'muzindani.

³ Alliwa enallota wi, ‘Enthawi khenaphiye wi ttuumaka enyumba. Muzindoolla tti wonanko epalli eyo eri viikho nave hiyaano niri wonanko enama eyo eri mwiipallinimmo.’

⁴ Sika we mwaana a muthu ollotelle mowaahumullulla, ddawoona, llotella.”

⁵ Vano Munepoolle aakiphara akilleella wi, “Ollote wi Apwiya enaallota wi, ‘Nyu a munibanjani na Israele, kinnadduwella nnddo ddiri m'murimani mwanyu.

⁶ Mookhalla muwiiphaka athu anchichi m'muzindanimmu nave mooddalliha mitembo m'misewuni.’ ”

⁷ “Sika Apwiya Mulluku enallota wi, ‘Mitembo dda athu awiiphiwa nnddo muddihiyalleenyummo tti enama nave muzindoolla tti epalli. Koma kineerowiikarihani ovenyera m'muzindanimmo.

⁸ Munoova nsupada? Kineerewuumorihellani nsupada. Mi Apwiya Mulluku koollota.

⁹ Kineerowiikarani m'muzindanimmo nave kuneerewuuvelleellani wa alleto wi yuullakeni.

¹⁰ Nyuwaano muneerokhwa ni nsupada nave kineerewuullakani ophiyera m'malireni a Aisraele. Vano muneerodduwella wi mi tti Apwiya.

¹¹ Sika vano muzindooyo khokhallattho wonanko epalli yawuutetezani nave khamukhallattho wonanko enama ya mwiipallinimmo. Kineerewuullakani ophiyera m'malireni a Aisraele.

¹² Vano muneerodduwella wi mi tti Apwiya. Khamuthwarille malangizwaaka, khamwiiwellelle malamulwaaka. Koma mookhalla muthwaraka malamulo a mitundu dda athu oowaapheellani.’ ”

¹³ Killotellaka, Pelatiya mwaana a Benaya aakhwa. Vano kahiimoriha moopopheya ekhove vatthi kikhuwa wi, “Nyu Apwiya Mulluku, ethiyo munapaalla wi mwaamallihe Aisraele attheene oohalla?”

Mulluku analonjeza dda ohokollowa wuukaporoni

¹⁴ Vano mawu a Apwiya yaawa wa mi wi,

¹⁵ “We mwaana a muthu, asinno, abalaawo, akaporo akhwaawo, enyumba ettheene ya Israele, athu ookhalla o Yerusalemu enaallota wi, ‘Attheene ayo yaphariwe okaporo aarekamellana ni Apwiya nave ellapweella tti yaahu.’ ”

¹⁶ “Sika alleelle akaporo akhwaawo wi mi Apwiya Mulluku kinallota wi kohaarumiha woorekamellana ni athu a mitundu ddimodda ni waapallallesella o ellapo ddimodda. Vano kinaasungave o ellapo nnddo yapharelliwiiwawo.”

¹⁷ “Sika waalleelle athu wi mi Apwiya Apwiya Mulluku kinallota wi, kineerewaatthukumaniha ovenyera wa mitundu ddimodda, o ellapo nnddo kaapallalleselleemiwo wi kaahokolloselle o ellapo ya Israele.

¹⁸ Yavollowa mwiillaponimmo eneerovenyihamo mafano mattheene oonanara.

¹⁹ Kineerewaavaha murima wanaanweene ni munepa musha. Kineerovenyiha murima wawumma wonanko nlluku nave kineerewaavaha muwari mwiwa murima wawoollowa wonanko muhehe.

²⁰ Vano eneerothwara malamulwaaka, eneerosunga ni wiiwellella malangizwaaka. Sika eneerokhalla athwaaka nave kineerokhalla Mullukwiiwa.

²¹ Koma ayo mirima ddiwa ddikeraattheyille mu mafano mattheene oonanara kineerewaallaka ekaamba ya ddittheddene nnddo eneeriiwa. Mi Apwiya Mulluku koollota.”

Ntitimiho na Apwiya ninavenya o Yerusalemu

²² Vano akerubaalle* yaattaphurusa muuphello magudumu eri mukhwipi mwiwa nave ntitimiho wa Mulluku a Aisraele naari vaddullu viwa.

²³ Ntitimiho na Mulluku naawella ohiya muzindooyo niimella vamwaangoni wa wookhuma nndduwa wa muzindooyo.

²⁴ Vatulli viwa Munepa a Mulluku aakitukhulla akiphiyiha wa akaporo a mu Babiloni. Ddittheddenenndda ddeereya m'masomphenya moollikana ni mmo Munepa a Mulluku akoonihelleeye. Vano ddeko nnddo kaddooneemi ddahaamba othiima.

²⁵ Sika kahaalleella akaporo ddittheddene nnddo Apwiya yakoonihelliiwa.