Ezekiele 10 - Mawu a Mulluku

Ovenyavo wa ntitimiho na Apwiya mu enyumba ya Mulluku

¹ Kiwehille eddullu va miru dda akerubi* kahoona ello yookhalla wonanko mpando woomwene woopangiwa ni nlluku nasafiro.

² Vano Apwiya yaamulleella muthu awarille ddoowara ddabafuta wi, “Khawe o magudumu vatthi va akerubi, waddallihe mattaawo ni mankhalla amunllo ayo eri variyari va akerubi. Vano mankhallaayo waamwaramware mu muzinda.” Kaamoona ni miitthwaaka ayaakawo.

³ Vano akerubaayo yahiimella onnattanatta na enyumba ya Apwiya muthooyo avolloweeye. Nave murapo waaddalla mu nthato namuwari.

⁴ Ntitimiho na Apwiya naavenyavo mvo naariiwa, vaddullu va akerubi, naphiya vatthi va mullako wa enyumba ya Mulluku nave enyumbeeyo yaaddalla ni murapoolle. Vano ntitimiho noowala na Apwiya naaddalla va nthato.

⁵ Onyakulla wa muuphello a akerubi wahiiweya o nthato na otte wonanko mmo muniiweyella mawu a Mulluku Amasiva Mattheene aallotoka.

⁶ Vano Apwiya yaamulleella muthu oowara ddabafuta wi avalle munllo variyari va magudumu vatthi va akerubi. Muthooyo aavollowa iimella vakhwipi va nigudumu.

⁷ Vano mmodda mwa akerubi aattaphurusella nnatta naye va munllo variyari viwa. Aavalla munllooyo amwinnya muthu oowara ddabafutoolle. Olliye ahaakhella munllooyo akhuma.

⁸ Vatthi va muuphello a akerubi vaakhalla ello yawooneya wonanko nnatta na muthu.

⁹ Vatulli viwa kahoona magudumu masese vakhwipi va akerubi. Vakhwipi va arive kerubi vaakhalla nigudumu nimodda. Magudumwaayo yaanawala wonanko malluku Akrizoliti.

¹⁰ Mooneyello a magudumu yaari oophwanaphwana ni oolluwanalluwana.

¹¹ Sika vaweetani ddaanaya o embali ddittheddene ddisese nko ddapaalliwa moohirukunuwa. Nko yawehiiwa tti wenko yayiiwa moohirukunuwa.

¹² Miilli ddiwa, mitthana ddiwa, mattiiwa, muuphellwiiwa ni magudumwiiwa masese ddaakhalla ni miittho viriveveko.

¹³ Kahiiwa wi magudumwaayo yaromolliwa magudumu oolluwanalluwana.

¹⁴ Arive kerubi aakhalla ni ekhove ddisese. Ekhove yawaamba yaari ya kerubi, yaneepiilli ya muthu, yaneeraru ya mukango, yaneesese ya mpungu.

¹⁵ Vano akerubaalle yaavava. Akerubaalle yaari ddoophatusa nndde koonilleemi omuhinjeni wulle.

¹⁶ Akerubi yaaweetaka, magudumu yaaneetattho mukhwipi mwiwa nave yattaphurusa muuphello enavava, magudumu yakhalla mukhwipi mwiwa.

¹⁷ Ddoophatusiwa ddiimella, magudumu yaaniimellattho. Ddaavavaka, magudumu yaanathaanana vawi Munepa wa ddoophatusiwa sika weetiha.

¹⁸ Vano ntitimiho na Apwiya naavenyavo vatthi va mullako wa enyumbiiwa oya vaddullu va akerubi.

¹⁹ Akerubi yaattaphurusa muuphellwiiwa evava. Kaawoona ekhwaranyaka, magudumu yaari vakhwipi viwa. Ahiimella va mullako woovollowa nndduwa wa enyumba ya Apwiya. Nave ntitimiho na Mulluku a Israele waari vaddullu viwa.

²⁰ Ddenndda tti ddoophatusiwa ddookumi kaddoonilleemi o muhinje wa Kebara vatthi va mpando woomwene wa Mulluku a Aisraele. Vano kaadduwella wi ddoophatusiwannddo ddaari akerubi.

²¹ Arive kerubi aakhalla ni muuphello masese ni ekhove ddisese. Aakhallattho ni ello yawooneya wonanko nnatta na muthu vatthi va nirive nuuphello.

²² Ekhove ddiwa ddaari wonanko nndde koonilleemi o muhinje wa Kebara. Erive yoophatusiwa yaaneeta mooya muhoollo.