Ezekiele 1 - Mawu a Mulluku

Masomphenya a Ezekiele

¹ Nllapo naneetthanu na mweeri waneesese muyakha wa 30 kaari variyari va akaporo a o Yuda vakhuviru ni muhinje wa Kebara. Vano oddullu waahulleya nave kahoona masomphenya a Mulluku.

² Nna naari nllapo naneetthanu na mweeri, muyakha waneetthanu wa okaporo wa mwene Yehoyakini.

³ Othenga wa Apwiya waaphiya wa mullupa mukutho Ezekiele mwaana a Buzi museresere mwa muhinje wa Kebara ellapo ya Ababiloni. Wenko nnatta na Apwiya naari va olliye.

⁴ Kiwehaka kahoona ephevo yawoopiha evenyeraka ompoto. Vaakhalla murapo muullupalli woowala mukhwipi mwiwa nave munllo okhumaka ovenyera m'muraponimmo. Variyari va munllooyo vaanooneya wonanko mukoko woonyezimella.

⁵ Variyari viwa kahoona ddoophatusiwa ddookumi ddawooneya wonanko athu.

⁶ Koma erive yoophatusiwa yaakhalla ni ekhove ddisese ni muuphello masese.

⁷ Meto ddiwa ddaari ddawookowa nave manyallwiiwa yakhalla wonanko a nankhoro a eng'ombe. Manyallwaayo yawala wonanko mukoko woonyezimella.

⁸ Woonjerera va ekhove ddisese ni muuphello masese erive yoophatusiwa yaakhalla ni matta masese, nimodda va nirive nuuphello.

⁹ Muuphello meelli yaattannyana nave erive yoophatusiwa yaaweetaka aya muhoollo, kheyiivo yarukunuwa.

¹⁰ Erive ekhove kheyaaphwanaphwana ni ekhwiiwa. Muhoollo mwiwa mwaari ekhove ya muthu, o nnattanatta ekhove ya mukango, o nnatta noonyottho ekhove ya eng'ombe nave otulli wiwa ekhove ya mpungu.

¹¹ Ekhove ddiwa ddaari ddawi ddiidda. Muuphellwiiwa yaari oottaphuruwa wawi etthoka dda muuphello a ddoophatusiwannddo ddaattannyana. Muuphellwiiwa mamodda meelli yaakhuneellana mwiilliiwa.

¹² Ddoophatusiwannddo ddaanaweha embali ddittheddene ddisese sika ddaanaya nko ddapaalliwa moohirukunuwa.

¹³ Variyari va ddoophatusiwannddo vaakhalla ello yawooneya wonanko mankhalla ookhara, wonanko mitthiko ddookhara ddeeteeta variyari viwa. Munllooyo waanawala nave muwari mwiwa mwaanasherima.

¹⁴ Ddoophatusiwannddo ddaanathamakella nngu ni nngu wonanko osherima wa ettari.

¹⁵ Vano voowehani ddoophatusiwannddo kahoona vatthi viwa magudumu, nigudumu nimodda va erive yoophatusiwa.

¹⁶ Magudumwaayo yooneya wonanko malluku akrizoliti nave maseseenaayo yaari oophwanaphwana nave yaari oolluwanalluwana.

¹⁷ Sika vaweetani ddaanaya o embali ddittheddene ddisese nko ddapaalliwa moohirukunuwa.

¹⁸ Magudumwaayo yaakhalla ni marimu oorekama mwawoopiha. Marimwaayo yaakhalla ni miittho virive veko.

¹⁹ Ddoophatusiwannddo ddaaweetaka magudumwaayo yaaneetattho mukhwipimmu. Nave Ddaavavaka magudumwaayo yaanavavattho.

²⁰ Orive weko waya Munepa ddoophatusiwannddo ddaanaya wenko. Magudumu masesaalle yaanayattho wenko. Ekaamba yawi Munepa wa ddoophatusiwannddo sika weetiha magudumwaayo.

²¹ Ddoophatusiwannddo ddaaweetaka magudumu yaaneetattho. Ddiimella magudumu yaaniimellattho. Ddaavavaka magudumu yaanavavattho ekaamba yawi Munepa wa ddoophatusiwannddo sika waweetiha.

²² Vaddullu va miru dda ddoophatusiwa vaakhalla ello yawooneya wonanko eddullu yoowala wonanko nlluku noonyezimilla noowaanddellelliwa.

²³ Ddoophatusiwannddo ddaari muhito mwa eddullweeyo nave muuphellwiiwa yaanattannyana. Nave muuphello meelli yaakhuneellana mwiilli.

²⁴ Ddeetiiwa kaaniiwa onyakulla wa muuphellwiiwa wonanko wa maaddi manchichi, othuruma wa Mulluku apaalle onyakulla wa mulloko wa akhoto. Ddiimella ddaanamoriha muuphellwiiwa.

²⁵ Vano va eddullu ya vaddullu va miru ddiwa vaananyakulla ddoophatusiwannddo ddiimenlle nave ddimorihalle muuphellwiiwa.

²⁶ Vaddullu valle vaakhalla ello emodda yookhalla wonanko mpando woomwene woopangiwa ni nlluku na safiro. Vaddullu va mpandooyo vaakhalla ello yawooneya wonanko muthu.

²⁷ Muddullu mwa eyuunu ya yawooneyeeyo mwaakhalla mukoko moowala wonanko munllo. Muhito mwa eyuunweeyo mwaakhallattho munllo. Owala wuullupalli waayaapheella.

²⁸ Owalanko wooneya wonanko mwiisherima murimu aarupaka. Mmu sika ntitimiho na Apwiya nooneyelliiwa. Vano kawoonilleemi kahiivokhella vatthi kipopheya ekhove nave kahiiwa mawu ookillotiha.