Ezara 9 - Mawu a Mulluku

Dda otthellana variyari va Ayuda ni athu a mitundu ddimodda

¹ Vano ddittheddenenndda ddeereyille, oohoollella amodda yaawa wa miyaano ellota wi, “Aisraele, allupa mukutho ni Alevi kheyiipatulalle wa athu a mwiillaponimmo ni ddoolakwa ddiwa ovenyera wa Akanani, Ahiti, Aperezi, Ayebusi, Aamoni, Amowabu, Aiguputo ni Aamori.

² Aisraele attheene ahaakusa anamwani amodda aatthiyana a ellapo ddenndda okhalla awariwa ni awariwa a aniiwa sika wi mutundu wa athu oopatuleya woottakanyiherana ni athu a mitundu ddimodda. Nave mu ohiroromelleyanngu, oohoollella ni attekweene sika enahoollella ddoonanara.

³ Kiiwalleemi ddenndda kahaahulla ddoowara ddaka ni mukanjwaaka ekaamba ya ethakaraka nave kaatulla meehi a m'muruni mwaka ni ereru ddaka kikeraatthi mootathilla murima.

⁴ Vano attheene yatthukumella ni mawu a Mulluku a Israele ekaamba ya ohiroromelleya wa athu oohokollowa wuukaporonaalle, yaatthukumana mookaapheella miyaano kikeraatthille mootathilla murima ophiyera enthawi ya mukutho wa misikuwa.

⁵ “Va enthawi ya mukutho wa misikuwa, kaavenya mvo kakeraatthilleemi moomoriha ethakaraka kiwarille ddoowara ddaka ni mukanjwaaka ddawaahuwanndde kikokhora nave kitukhullella mattaaka wa Apwiya Mullukwaaka,

⁶ killota wi, “Nyu Mullukwaaka, koowulliwa muru nave nginawora otukhullella ekhovaaka wa nyuwaano Mullukwaaka vawi machimwaahu aawella muddullu okhwaranya miru ddahu nave olakwa wahu woowella ophiyera oddullu.

⁷ Waambeella enthawi ya makhollwaahu ophiyera ollello nikhallelle ochimwa wunchichi. Vano ekaamba ya machimwaahwaayo, hiyaano, mamwene a ellapo ddimodda ni allupa mukuthwaahu noovelleelliwa m'mattani mwa mamwene a mwiillaponi wiiphiwa okhotoni, opharelliwa wuukaporoni, waakhiwa ddeko ni owullihiwa muru wonanko mmo ddikhallelliiwa ollello.

⁸ Koma vano wa enthawi yooyeva nyu Apwiya Mullukwaahu mooneerella echifundo voohinitthollosani wuukaporoni koma onivaha nipuro mu nipuro nanyu noopatuleya. Sika nyuwaano Mullukwaahu moonikhunuulla miittho ni onihihimulla wuukaporoni.

⁹ Vawi hiyaano naari akaporo koma Mullukwaahu khamwaanihiyalle mu okaporwaahu. Koma mwaanooniha echikondaanyu yoohisintheya vamiitthoni va mamwene a o Persiya, onihihimulla wi nimake enyumbaanyu, nipotokose matepiiwa navettho mooniteteza mu Yuda navettho mu Yerusalemu.

¹⁰ “Nave vano nyu Mullukwaahu, hiyaano ninaallote tini vatulli va yeella? Vawi khaniiwellelle malamulwaanyu,

¹¹ mwanilamulalleenyu oyeella mwa anamallotella oorumeyellaanyu ollota wi, ‘Ellapo munavollowaanyumweeyo wi mwaakha tti ellapo yooripihiwa ni ddoonanara dda athu a mwemmo nnddo ddiddallille ellapweeyo ovenyera o embali emodda ophiya o embali emoddattho.

¹² Sika muhaavelleelle aniinyu aatthiyana wa aniiwa aallopwana apaalle waakusa aniiwa aatthiyana ni waavelleella wa aniinyu aallopwana. Nave muhaashe murendelliiwa apaalle eyuumiiwa wi mukhalle amasiva ni ocha ddaphaama dda mwiillaponimmo ni waahiyera aniinyu wi ekhalle yayiwayayiwa enthawi yoohimalla.’

¹³ Nave ddittheddenenndda ddinimorelle ekaamba ya machimwaahu muullupalli. Naarive ddiri ddiiddo, nyu Mullukwaahu munillakille vang'ono moohillikana ni machimwaahu nave mooneeriha wi nihalle wonanko ddikhallelliiwammu.

¹⁴ Ethiyo hiyaano ttuuweera phudda ohiiwellella malamulwaanyu ni otthellana ni athu a mitundu ddimodda ayo eneera ddoonanaranndda? Ethiyo khemunishella murima ni onitthollosa ohikhallavottho naari muthu mmodda oohalla apaalle othawa?

¹⁵ Nyu Apwiya Mulluku a Israele tti a echilungamo komave noohalla ophiyera ollello. Ngoonani niri vamiitthoni vanyu nidduwellakave ddoochimwa ddahu mwawi khaavo naari muthu mmodda aniimelle vamiitthoni vanyu ekaamba ya yeella.”