Ezara 8 - Mawu a Mulluku

Oohoollella ayo yahokollowille ni Ezara

¹ Nna sika ntthopoollo na manddina a oohoollella a mabanja ayo yahokollowille ni miyaano ovenyera o Babiloni mu enthawi ya olamulello wa mwene Aritakisereksesi.

² Gereshomo edduullu ya Finehasi, Daniele edduullu ya Itamara,

³ Hatushi mwaana a Shekaniya edduullu ya Davide, Zekariya edduullu ya Paroshi ni allopwana amodda 150 ayo yalembiwe vamodda ni olliye.

⁴ Eliehoenai mwaana a Zerahiya edduullu ya Pahatimowabu ni allopwana amodda 200.

⁵ Shekaniya mwaana a Yahaziele edduullu ya Zatu ni allopwana amodda 300.

⁶ Ebedi mwaana a Yonatani edduullu ya Adini nave ni allopwana amodda 50,

⁷ Yeshaya mwaana Ataliya edduullu ya Elamu nave ni allopwana amodda 70.

⁸ Zebadiya mwaana a Mikaele edduullu ya Shefatiya ni allopwana amodda 80.

⁹ Obadiya mwaana a Yehiyele edduullu ya Yowabu ni allopwana amodda 218.

¹⁰ Shelomiti mwaana a Yosifiya edduullu ya Bani ni allopwana amodda 160.

¹¹ Zekariya mwaana a Bebai edduullu ya Bebai nave ni allopwana amodda 28.

¹² Yohanani mwaana a Hakatani edduullu ya Azigadi ni allopwana amodda 110.

¹³ Oohoollella a edduullu ya Adonikamu ayo yawiille mutulli mwiwa, manddiniiwa yaari Elifeleti, Yeuwele ni Shemaya ni allopwana amodda 60.

¹⁴ Oohoollella a edduullu ya Bigivai yaari Utai ni Zakuri ni allopwana amodda 70.

Ezara anawiithana Alevi a o enyumba ya Mulluku

¹⁵ Kahaatthukumaniha o muhinje oyo oneeta oya o Ahava nave naatthipellawo misasa ddahu nikhallawo mallapo mararu. Kawoonilleemi athu ni allupa mukutho, kaphwanyille wi Alevi kheyaarivo.

¹⁶ Vano kaawiithana oohoollella monga Eliyezere, Ariyele, Shemaya, Elinatani, Yaribu, Elinatani, Natani, Zekariya ni Meshulamu vamodda ni ahuddihi eelli Yoyaribu ni Elinatani.

¹⁷ Vano kahaarumiha wa Ido ni wa oohoollella muullupalli a nipuro nooromolliwa Kasifiya kaalleella yawi yallote wa Ido ni abalaaye allupa mutteko a mu enyumba ya Mulluku o Kasifiya wi enirumihelle athu oorumeyella o enyumba ya Mullukwaahu.

¹⁸ Nave ekaamba yawi nnatta naphaama na Mullukwaahu naari va hiyaano, yaawaana muthu eezeru a mu nibanja na Mahili oyo aari Mulevi, Muisraele nnddina naye Sherebiya vamodda ni anaaye ni abalaaye nave attheene yaari allopwana 18.

¹⁹ Nave yaamurumihattho Hashabiya ni Yeshaiya a nibanja na Merari ni abalaaye ni aniiwa nave attheene yaari allopwana 20.

²⁰ Woonjerera va athwaalle, vaakhallattho allopwana 220 allupa mutteko a mu enyumba ya Mulluku ayo Davide ni enduna ddaye yaapatulalliiwa wi yaakavihereke Alevi. Attheenaalla yalembiwe moollikana ni manddiniiwa.

Ezara anaahoollella athu ohalla ocha ni ovekella

²¹ Vano o muhinje wa Ahava kaalamula wi nihalle ocha ni wiiyeviha vamiitthoni va Mullukwaahu ovekella wi anihoollelle va olendwaahu ni oniteteza hiyaano, aniihu ni katundwaahu.

²² Vawi kaawulliwa muru wi kaaveke amwene wi enivahe mulloko wa akhoto ni athu oowella va akavalo wi eniteteze wa adanaahu va olendwaahu vawi naamulleella mwene wi, “Nnatta naphaama na Mullukwaahu ninnaadalisa attheene enamwaasha olliye nave masiva a ollutuwa waye onnaamorella ayo enamuhiya.”

²³ Sika ekaamba ya yeella, naahalla ocha* nave naavekella wa Mullukwaahu nave ahiiwa ovekella wahu.

Emphaso dda o enyumba ya Mulluku

²⁴ Vano mwa oohoollella a allupa mukutho kahaatthoolla khumi ni eelli monga Sherebiya, Hashabiya ni amodda khumi.

²⁵ Nave kahaalingella siliva, golide ni eziwiya, nnddo ddavelleelliwe ni mwene, alangiziiwa, enduna ddiwa ni Aisraele attheene o enyumba ya Mulluku.

²⁶ Kaaddilinga nave kaawinnya m'mattani mwiwa mataani 22 a siliva, eziwiya dda siliva 100 dda makilogaramu 70, makilogaramu a golide 3,400,

²⁷ embale ddagolide 20 dda makilogaramu vakhuviru matthanu ni araru ni hafu ni eziwiya piilli dda mukuwa ddoonyezimella phaama ddoowallamella mutengo wonanko wa golide.

²⁸ Nave kahaalleella wi, “Nyu tti oopatulelliwa wa Apwiya navettho eziwiya ddittheddene dda siliva ni golide ddoovelleelliwa mwa opaalla. Nave siliva ni golide tti ddoovelleelliwa moohiwatiheriwa wa Apwiya Mulluku a makhollwaanyu.

²⁹ Muddiwehere nave muddisunge phaama ophiyera muddilinge vamiitthoni va oohoollella a allupa mukutho, Alevi ni oohoollella a mabanja a Aisraele mu ezipinda dda mu enyumba ya Apwiya o Yerusalemu.”

³⁰ Sika allupa mukutho ni Alevi yaakusa olamulello wa ollemella wa siliva, golide ni eziwiya wi eweena o Yerusalemu o enyumba ya Mullukwaahu.

Olendo wa o Yerusalemu

³¹ Vano va nllapo naneekhumi ni piilli na mweeri wawaamba naavenyawo o muhinje wa Ahava oya o Yerusalemu. Nnatta na Mullukwaahu naari va hiyaano nave aaniteteza m'mattani mwa adanaahu ni mwa athu ooniipitthella.

³² Naaphiya o Yerusalemu nave nahiithuuwa mallapo mararu.

³³ Va nllapo naneesese, mu enyumba mwa Mullukwaahu mwemmo, siliva, golide ni eziwiyanndde ddaalingiwa nave ddaavelleelliwa m'mattani mwa Meremoti mullupa mukutho mwaana a Uriya. Nave vamodda ni olliye vaari Eleazara mwaana a Finehasi ni Alevi monga Yozabadi mwaana a Yeshuwa ni Nowadiya mwaana a Binuyi.

³⁴ Ddittheddene ddaheerengiwa ni olingiwa nave ollemella wa erive ello waalembiwa.

³⁵ Enthawi yeeyo ayo yahokollowille wuukaporoni yaavelleella mikutho ddooshellelliha wa Mulluku a Israele. Yahaavelleellella Aisraele attheene anankhoro a eng'ombe khumi ni eelli navettho anankhoro a enkhosa 96, asaana a enkhosa 77 ni anankhoro a epuri khumi ni eelli wonanko mukutho woopepesella machimo. Ddittheddenenndda waari mikutho ddooshellelliha ddoovelleelliwa wa Apwiya.

³⁶ Yaavelleellattho kalata a amwene wa enduna ni alangizi a mwene a o echigawo ya vakhopella va muhinje ayo yaakavihera athu navettho enyumba ya Mulluku.