Ezara 7 - Mawu a Mulluku

Ophiya wa Ezara o Yerusalemu

¹ Vano ddimanlle ddenndda mu olamulello wa mwene Aritakisereksesi a o Persiya, vaakhalla muthu nnddina naye Ezara mwaana a Seraya, mwaana a Azariya, mwaana a Hilikiya,

² mwaana a Shalumu, mwaana a Zadoki, mwaana a Ahitubi,

³ mwaana a Amariya, mwaana a Azariya, mwaana Meraiyoti,

⁴ mwaana a Zerahiya, mwaana a Uzi, mwaana a Buki,

⁵ mwaana a Abishuwa, mwaana a Finehasi, mwaana a Eleazara, mwaana a Aroni, mullupa mukutho muullupalli.

⁶ Ezaroolla aawa ovenyera o Babiloni. Olliye aari muhuddihi eeruso a malamulo a Mose ayo Apwiya Mulluku a Israele aavelleelleeye. Nave amwene yaamwinnya ddittheddene avekilleeye ekaamba yawi nnatta na Mullukwaaye naari va olliye.

⁷ Nave aaya o Yerusalemu mu muyakha waneetthanu ni piilli wa omwene wa Aritakisereksesi vamodda ni Aisraele amodda, allupa mukutho amodda, Alevi, awiipa machipo, alonda a va mullako ni oophara mutteko mu enyumba ya Mulluku.

⁸ Nave aaphiya o Yerusalemu mweeri waneetthanu mu muyakha waneetthanu ni piilli wa amwene.

⁹ Vawi va nllapo nawaamba na mweeri wawaamba aavenyawo o Babiloni nave va nllapo nawaamba na mweeri waneetthanu aaphiya o Yerusalemu vawi nnatta naphaama na Mullukwaaye naari va olliye.

¹⁰ Vawi murima wa Ezara waari va mahuddero a malamulo a Apwiya ni owiiwellella navettho wi ahuddiheke malamulo ni malangizo mu Israele.

Kalata a mwene Aritakisereksesi

¹¹ Olla sika kalata oyo mwene Aritakisereksesi amwinnyalleeye Ezara mullupa mukutho, namalembella, muhuddihi eeruso a malamulo a Apwiya ni malangizwiiwa mu Israele.

¹² “Aritakisereksesi, mwene a mamwene, wa Ezara mullupa mukutho, muhuddihi eeruso a malamulo a Mulluku a oddullu, kinuuvahani mooni.

¹³ Koolamula wi arive Muisraele apaalle mullupa mukuthwiiwa apaalle Mulevi a mu omwenaaka ayo enapaalla oya o Yerusalemu ttuuthaanana ni weyaano.

¹⁴ Orumihiwe ni amwene owaaka alangiziiwa atthanu ni eelli wi woone dda athu a o Yuda ni Yerusalemu yaarimi ekhallaka moollikana ni malamulo a Mullukwaawo ayo eri m'mattani mwawo.

¹⁵ Navettho wi omukuse siliva ni golide nnddo amwene ni alangiziiwa evelleelliiwa wa Mulluku a Israele oyo enyumbaaye eri mu Yerusalemu.

¹⁶ Omukusettho siliva ni golide oyo oninyiweewe mu echigawo ettheene ya Babiloni navettho emphaso nnddo athu ni allupa mukutho enapaalliiwa ovelleella o enyumba ya Mullukwiiwa eyo eri mu Yerusalemu.

¹⁷ Vano ni makobiraalla okulle moororomelleya anankhoro a eng'ombe, anankhoro a enkhosa ni asaanaankhosa vamodda ni mikutho ddiwa dda othu ni dda vinyo. Nave oddivelleelle vanikuwani na o enyumba ya Mullukwaanyu eyo eri mu Yerusalemu.

¹⁸ Golide ni siliva ddinaahalle muddipharihe mutteko moollikana ni mmo onaapaallelle weyaano ni abalaawo navettho moollikana ni opaalla wa Mullukwaanyu.

¹⁹ Eziwiya winyiweewenndda ddoorumeyellana o enyumba ya Mullukwaanyu, mwaddivelleelle wa Mulluku o Yerusalemu.

²⁰ Nave erive ello enaapaalleye va enyumba ya Mullukwaanyu wi ovelleelle, ttuuvelleella koma ddikhume mu nthumba na amwene.

²¹ “Vano miyaano mwene Aritakisereksesi kohaalamula oosunga eyuuma attheene a mu echigawo ya vakhopella va muhinje wi ddittheddene nnddo Ezara mullupa mukutho, muhuddihi eeruso a malamulo a Mulluku ooddullu anaavekeeye wa nyuwaano ddeereye moororomelleya.

²² Naari yapaalleya makilogaramu 3,400 a siliva, makilogaramu 10,000 a tirigu, malita 2,000 a vinyo ni malita 2,000 a makhura navettho mwiinyu wawaata mwawiidde, ddittheddenennddo muddivelleelle moollikana ni mmo ddinapaalleyelliiwa.

²³ Ddittheddene ddinaalamuliwe ni Mulluku ooddullu, ddeereye moophwanellella va enyumba ya Mulluku ooddullu woova wi osha murima waye ttuuwaamorella amwene ni aniiwa.

²⁴ Kinimuulleellanittho wi tti wohaakhullelliwa waakhomiha musonkho apaalle waallivelliha kasitomu allupa mukutho, Alevi, awiipa machipo, alonda a va millako dda enyumba ya Mulluku apaalle allupa mutteko amodda a o enyumba ya Mulluku.

²⁵ “Vano weyaano Ezara moollikana ni ezeru dda Mullukwaawo nnddo ddiri m'mattani mwawo, waatthoolle aweeruza oohiyanahiyana va athu attheene mu echigawo ya vakhopella va muhinje nave athweene oodduwella malamulo a Mullukwaawo. Vano athu ayo ehinaadduwella oneerekewaahuddiha.

²⁶ Oyo ahinaawiiwellelleke malamulo a Mullukwaawo ni malamulo a amwene allakiwe wunchichi vawiiphiwani apaalle voovenyihiwani mu ellapweeyo apaalle voowaakhiwani katundwaaye apaalle voovokhiwani mu endende.”

Ezara anamutitimiha Mulluku

²⁷ “Etitimiheye Apwiya Mulluku a makhollwaahu ayo ehiyalle ello yawi ddiidda m'murimani mwa amwene oreeriha enyumba ya Apwiya o Yerusalemu.

²⁸ Nave tti ayottho yoonihalle echikondiiwa yoohisintheya wa miyaano vamiitthoni va amwene, alangiziiwa ni enduna ddiwa ddamasiva. Kaallipa murima vawi nnatta na Apwiya Mullukwaaka naari va miyaano nave kahaatthukumaniha athu oohoollella a Israele wi ethaanane ni miyaano.”