Ezara 6 - Mawu a Mulluku

Ophwanyeyattho wa lamulo na Kirusi

¹ Vano mwene Dariusi aalamula wi yaashaashe mu mabukhu a epilli mu enyumba yoomwene o Babiloni.

² Vano o Ekibatana muzinda muullupalli oyo ori mu echigawo ya Mediya waaphwanyeya nibukhu mmo mwalembiwe mawu awi, “Yawuupusella.

³ Mu muyakha wawaamba wa omwene wa Kirusi, aapanga lamulo nootthopoolla dda enyumba ya Mulluku o Yerusalemu. Nave aalamula wi enyumbeeyo emakiwettho wi nikhalle nipuro noovelleellawo mikutho ddooshellelliha ni mikutho ddimodda nave matthipellwiiwa emakiwettho vantepeni viwa. Wunnuwa wiwa onaakhalle mamita 27 oya muddullu navettho mamita 27 oramballalla wiwa.

⁴ Esiri ddiwa ddimakiwettho ni malluku muullupalli mizere miraru ni muzere mmodda wa matabwa. Makobiri oollivella vamuttekonooyo enaavenyere mu nthumba na mwene.

⁵ Nave akhullellani eziwiya ddagolide ni ddasiliva dda o enyumba ya Mulluku nnddo Nebukadinezara addivenyihalleeyemo o Yerusalemu ayaana o Babiloni wi ddihokolloselliwe o enyumbeeyo mu Yerusalemu. Erive ello ekhalle vanipuroni viwa mu enyumba ya Mulluku.”

Dariusi analamula wi mutteko ovirellelle

⁶ Vano Dariusi aamurumiha kalata awaakhulla wi, “Tatanai enduna ya vakhopella va muhinje, Shetari Bozenai vamodda ni akhwaawo muvenyewo wenko.

⁷ Nave wuhiyeni mutteko woomakattho enyumba ya Mulluku ovirellelle. Yihiyeni enduna ya Ayuda ni oohoollella a Ayuda emakettho enyumba ya Mulluku vantepeni viwa.

⁸ Woonjerera vaavo kinalamula nnddo munaaweerelleenyu oohoollella a Ayudaalla voomakanittho enyumba ya Mulluku. Mwaallivelle athwaalla makobiriiwa mattheene nave muhaasellihe ovenyera mu nthumba na mwene na misonkho dda echigawo ya vakhopella va muhinje.

⁹ Nave erive ello yoopaalleya monga anankhoro a asaanaang'ombe, anankhoro a asaanaankhosa apaalle enkhosa dda mikutho ddooshellelliha wa Mulluku a oddullu, tirigu, mwiinyu, vinyo ni makhura moollikana ni mmo allupa mukutho o Yerusalemu enaapaallelliiwa mwaavaheke nllapo ni nllapo moohikukureya

¹⁰ wi evelleelleke mikutho ddoomuddivella Mulluku a oddullu ni ovekella okumi wa mwene ni anaaye.

¹¹ Nave kinalamulattho wi oyo ahinawiiwellelle, mugomba wa enyumbaaye oneerotthomolliwa nave aneerokhomelliwa vaavo nave enyumbaaye eneerotthattusiwa nddalla.

¹² Mulluku oyo atthoollille Yerusalemu wi akhalle nipuro noomullapellawo amugonjihe arive mwene apaalle orive mutundu oyo onaasinthe ddenndda apaalle woononga enyumba ya Mulluku mu Yerusalemu. Miyaano Dariusi kookeraatthiha lamulonna nave arive muthu iiwellelle ni murima muttheene.”

Opatuliwa wa enyumba ya Mulluku

¹³ Vano moollikana ni mawu arumihalle mwene Dariusi, Tatanai enduna ya vakhopella va muhinje, Shetari Bozenai ni akhwiiwa yaheera nnddo mwene Dariusi alamulalleeye.

¹⁴ Nave oohoollella a Ayuda yaavirellella omakattho nave ddaaneeta phaama mookaviheriwa ni ollotella wa Hagai namallotella ni Zekariya mwaana a Ido. Yaamalliha muttekwiiwa woomakattho moollikana ni Mulluku a Israele ni olamula wa mamwene a o Persiya Kirusi, Dariusi ni Aritakisereksesi.

¹⁵ Nave yaamalliha omakattho enyumbeella va nllapo naneeraru na mweeri wa Adara m'muyakha waneetthanu ni mmodda wa omwene wa Dariusi.

¹⁶ Vano athu a o Israele monga allupa mukutho, Alevi ni athu attheene yahokollowille wuukaporoni yaahakallallella opatuliwa wa enyumba ya Mulluku.

¹⁷ Voopatulani enyumba ya Mullukweella, athu yaavelleella anankhoro a eng'ombe 100, anankhoro ankhosa 200 ni asaanaankhosa 400. Yaavelleellattho anankhoro a epuri khumi ni eelli okhalla mukutho woopepesella machimo wa Aisraele attheene moollikana ni echiwerengero ya malloko a Israele.

¹⁸ Vano yahaakeraatthiha allupa mukutho ni Alevi mu milloko ddiwa wi emurumeyelleke mu enyumba o Yerusalemu moollikana ni mmo ddalembelliwiiwa mu nibukhu na Mose.

Ehakallallo ya Paska

¹⁹ Aisraele yahokollowille wuukaporoni yaahakallallella Paska va nllapo na 14 na mweeri wawaamba.

²⁰ Vawi allupa mukutho ni Alevi yaaddeelliha weekhiiwa, attheenaayo yaari aweella. Sika yaamwiipha musaana a enkhosa va Paska waahakallallella athu oohokollowa wuukaporoni, allupa mukutho akhwiiwa ni weekhiiwa.

²¹ Nave aachiwa ni Aisraele ayo yahokollowille wuukaporoni navettho ni arive muthu aattakanyihereyena ni oddeelliha yeekha wa ddoonanara dda athu amwiillaponimmo wi yaallapelle Apwiya Mulluku a Israele.

²² Nave yaahakallallella Ehakallallo ya Buledi Oohikhalla ni Yisiti wa mallapo matthanu ni meelli. Vawi Apwiya yaaweeriha wi ehakallalle nave aarukunusa murima wa mwene a o Asiriya mwawi aaweerella echifundo nave ahaakavihera va mutteko woomakattho enyumba ya Mulluku, Mulluku a Israele.