Ezara 5 - Mawu a Mulluku

¹ Vano anamallotella Hagai ni Zekariya mwaana a Ido yaallotella wa Ayuda ookhalla mu ellapo ya Yuda ni Yerusalemu vamiitthoni va Mulluku a Israele oyo aari va anamallotellaayo.

² Vano Zerubabele mwaana a Shealatiele ni Yeshuwa mwaana a Yozadaki yahaamba omakattho enyumba ya Mulluku mu Yerusalemu. Nave anamallotella a Mulluku yahaakavihera.

³ Enthawi yeeyo Tatanai enduna ya echigawo ya vakhopella va muhinje, Shetari Bozenai ni akhwiiwa amodda yaawa wa alliwa yaakoha wi, “Ethiyo ttaani uulamunleni wi mwaambeelle omakattho enyumbeelle ni omalliha esiri ddiwa?”

⁴ Yahaakohattho wi, “Ethiyo manddina a athu ayo enamakattho yeella ttaani?”

⁵ Koma Mulluku aanaawehera oohoollella a Ayuda sika athwaalla kheyaahiihalle omakattho ophiyera emulembenlle kalata mwene Dariusi nave kalatoolle aakhulliwe.

⁶ Olla sika kalata arumihiwe wa mwene Dariusi ovenyera wa Tatanai enduna ya echigawo ya vakhopella va muhinje, Shetari Bozenai ni akhwaaye, enduna ddimodda dda mu echigawo ya vakhopella va muhinje.

⁷ Yaamurumihella kalata oyo alembiwe wi, “Wa mwene Dariusi, murendelle okhalle ni nyuwaano!

⁸ “Nyu amwene, dduwellani wi naaya o echigawo ya Yuda, o enyumba ya Mulluku muullupalli. Enimamakiwattho ni malluku muullupalli nave matabwa enimatthattiwa musirini mwiwa. Muttekoolla ennawuphara mwawaakuva nave onnaweetella phaama.”

⁹ “Vano nahaakoha oohoollella wi, ‘Ethiyo ttaani uulamunleni wi mwaambeelle omakattho enyumbeelle ni omalliha esiri ddiwa?’

¹⁰ Nahaakohattho manddina a oohoollelliiwa wi naalembe nave nuulleelleni.

¹¹ “Nave yaanaakhulla wi, ‘Hiyaano tti oorumeyella a Mulluku ooddullu ni ellapo yavatthi nave nirina omakattho enyumba eyo yamakiwe miyakha ddinchichi ddivirallennddo eyo mwene muullupalli a o Israele ayimakilleeye ni oyimalliha.

¹² Koma ekaamba yawi makhollwaahu yaamushiha murima Mulluku ooddullu, ahaavelleella m'mattani mwa Nebukadinezara, Mukaldea mwene a o Babiloni oyo akumullalle enyumbeelle ni waaphara okaporo ni oyaana o Babiloni.

¹³ Koma mu muyakha wawaamba wa omwene wa Kirusi a o Babiloni aalamula wi enyumbeella emakiwettho.

¹⁴ Nave eziwiya ddagolide ni ddasiliva dda mu enyumba ya Mulluku nnddo Nebukadinezara addivenyihalleeyemo o Yerusalemu ni oyaana o enyumba ya milluku ya o Babiloni, mwene Kirusi aaddihokollosella wa muthu mmodda nnddina naye Sheshibazara oyo amutthoonlleeye wi akhalle enduna ya mu Yerusalemu.’

¹⁵ Nave aallota ni olliye wi, ‘Kusa eziwiyanndda waddihiye mu enyumba ya Mulluku mu Yerusalemu nave wayimakettho vantepeni viwa.’

¹⁶ Vano Sheshibazara aawa amakattho matthipello a enyumba ya Mulluku mu Yerusalemu nave waambeella enthawi yeeyo ophiyera ollello enimamakiwave nave khenamallihiwe.

¹⁷ “Sika ddaarimi dduuddivelleni nyu amwene, waashaasha weereye mu mabukhu a epilli mu enyumba yoomwene o Babiloni wi noone aarimi mwene Kirusi alamulalle wi enyumbeella emakiwettho mu Yerusalemu. Vano nyu amwene munilleelle maganizwaanyu va mwaha yoolla.”