Ezara 4 - Mawu a Mulluku

Ayuda oovaanyiha omakattho wa enyumba ya Mulluku

¹ Vano adani a Yuda ni Benjamini yiiwalliiwa wi athu yawiillewo wuukaporonaalle ahaamba omakattho enyumba ya Apwiya Mulluku a Israele,

² yaawa wa Zerubabele ni wa oohoollella mabanja ellota wi, “Hankoni nimakellettho nimodda vawi ninnamullapella Mullukwaanyu moophwanaphwana ni mmo muneerelleenyu nave nookhalla nivelleellaka mikutho wa olliye waambeella enthawi ya Ezaradoni, mwene a o Asiriya oyo anipharelle wuno.”

³ Koma Zerubabele, Yeshuwa ni amodda oohoollella mabanja a Israele yaawaakhulla wi, “Yaanyu khayiivo wi ttuumakellattho nimodda enyumba ya Mullukwaahu. Koma weekhiihu nineerewaamakellattho Apwiya Mulluku a Israele moollikana ni mmo Kirusi mwene a o Persiya aanilamulelleehu.”

⁴ Vano athu a mwiillaponimmo yahaakukhumulla mwiilli Ayuda ni owoopopiha wi ehiye omakattho.

⁵ Nave yahinnya makobiri enduna ddimodda wi ddaakavihere waahiiha muttekooyo mu enthawi ya Kirusi mwene a o Persiya ophiyera enthawi ya Dariusi mwene a o Persiya.

Athu oovaanyiha omakiwattho wa Yerusalemu

⁶ Vawaamba va olamulello wa mwene Ahasuwero, adani a Yuda ni Yerusalemu yaalemba ddoovaanyihana ni alliwa.

⁷ Mu enthawi ya Aritakisereksesi mwene a o Persiya, Bishilamu, Metiredati, Tabiyele ni akhwiiwa amodda yaalembattho ddoovaanyihana ddooya wa Aritakisereksesi. Ddoovanyihannddo ddalembiwe mu Earamu nave vaweerengani yaanattaphullella.

⁸ Nave Rehumu, oolamulella muullupalli ni Shimishai namalembella a echigaweeyo yaamulemba kalata ooya wa mwene Aritakisereksesi owaavaanyiha athu a o Yerusalemu mwawi ddiidda,

⁹ “Ovenyera wa Rehumu enduna, Shimishai namalembella ni akhwiiwa amodda monga aweeruza, enduna ddimodda, attekweene, Apersiya, athu a o Ereki, Ababiloni, athu a o Susa ayo yaari Aelamu

¹⁰ ni mitundu ddimodda nnddo Osinapara muthu muullupalli oovuwoolle additthaamihalleeye ni oddikeraatthiha o mizinda dda Samariya ni mu ezigawo ddimodda ddoohalla vakhopella va muhinje.”

¹¹ Mawu a mu kalata yamurumihalliiwooyo yaari awi, “Wa mwene Aritakisereksesi, hiyaano oorumeyellaanyu a o echigawo ya vakhopella va muhinje ninuuvahani mooni.

¹² “Nyu amwene dduwellani wi Ayuda ayo yawiille wuno ovenyera wa nyuwaano ekelle o Yerusalemu. Enimamakattho muzinda woowukila ni woonanaroolle. Enimamalliha esiri ni matthipello a muzinda nave enimapotokosa matthipellwiiwa.

¹³ Vano amwene edduwelle wi muzindoolla wamakiwattho ni esiri ddiwa ddamallihiwa khekhomaka musonkho naari ovelleella kasitomu apaalle okhoma musonkho wa erive ello nave yoophura ya amwene eneeroyevihiwa.

¹⁴ Vano ekaamba yawi mwiinywaahu onavenyera wa mwene, kheddikhalla phaama wi nikhulleke moona oweha amwene enyaambusiwaka. Vano sika ekaambiiwa ninaalleelleehu amwene

¹⁵ wi yaashaashe mu nibukhu na epilli ya makhollwaanyu. Nave muneerophwanyamo epilli nave muneerodduwella wi muzindoolla tti woowukila, woohoosa mamwene ni enduna dda ezigawo navettho wi athu a m'muzindanimmo tti oovaanyiha waambeella khalle. Sika ekaambiiwa muzindoolla watthattusiwiiwa ntepe.

¹⁶ Vano ninapaalla nuulleelleni amwene wi muzindoolla wamakiwattho ni omallihiwa esiri ddiwa, nyuwaano khemukhallanattho olamulello o echigawo eyo eri vakhopella va muhinje.”

¹⁷ Vano mwenooyo ahaakhulla voomurumihani kalata wi, “Wa Rehumu enduna, Shimishai namalembella ni akhwiiwa amodda ookhalla mu Samariya ni mu echigawo ya vakhopella va muhinje kinuuvahani mooni.

¹⁸ “Kalata mwanirumihelleenyu oheerengiwa ni ottaphullelliwa vamiitthoni vaka.

¹⁹ Nave kaalamula wi yaashaashiwe. Vano ddoheereya nave woophwanyeya wi muzinda yoolla waambeella khalle wookhalla waawukilaka mamwene navettho wi ddoowukila ni ddoovaanyiha ddookhalla ddeereyaka mwemmo.

²⁰ Nave mamwene amasiva yaakhalla elamulellaka mu Yerusalemu ni echigawo ettheene ya vakhopella wa muhinje yaakhellaka kasitomu, musonkho ni erive ello.

²¹ Sika mupange lamulo nowaahiiha athwaalla wi ehimakettho muzindooyo ophiyera miyaano kilamulalle.

²² Nave muhisellihe ddenndda. Ethiyo kaambiiwa tini kinaakhullelleemi wi ddenndda ddivirellelle ophiyera owoononga amwene?”

²³ Vano kalata a mwene Aritakisereksesi eerengiwe vamiitthoni va Rehumu, Shimishai namalembella ni akhwiiwa yaaya mwawaakuva wa Ayuda o Yerusalemu nave yahaahiiha mowaawatihera ni mwamasiva.

Waambeyattho wa omakattho enyumba ya Mulluku

²⁴ Vano mutteko wa enyumba ya Mulluku mu Yerusalemu wahiimella ophiyera muyakha waneepiilli wa olamulello wa Dariusi, mwene a o Persiya.