Ezara 3 - Mawu a Mulluku

Omakiwattho wa nikuwa

¹ Mweeri waneetthanu ni piilli waphiyalliiwa nave Aisraele eri mumapuroni mwiwa athu yaatthukumana mu Yerusalemu ni yoolinga emodda.

² Vano aavenya Yeshuwa mwaana a Yozadaki ni allupa mukutho akhwaaye ni Zerubabele mwaana a Shealatiele ni abalaaye yaamba omakattho nikuwa na Mulluku a Aisraele wi evelleellekevo mikutho ddooshellelliha moollikana ni mmo ddilembelliwiiwa mu malamulo a Mose, muthu a Mulluku.

³ Yaamakattho nikuwa vanipuroni viwa vakhalle naari yawoovaka athu yakhalla mwiillaponimmo. Nave yaavelleella mikutho ddooshellelliha wa Apwiya ohinase ni misikuwa.

⁴ Nave yaheera Ehakallallo ya Misasa moollikana ni mmo ddalembelliwiiwa nave yaavelleella mikutho ddooshellelliha ddoopaalleya va nllapo ni nllapo moollikana ni mmo ddalembelliwiiwa.

⁵ Vatulli viwa, yaanavirellella ovelleella mikutho ddooshellelliha mwa enthawi ddittheddene ddoovelleella dda Ehakallallo ya Wooneya wa Mweeri ni dda mallapo mattheene a machellello a Apwiya yakeraatthihiwe navettho ddoovelleella dda arive muthu wa Apwiya mwa opaalla waye.

⁶ Sika ovenyera vaavo yahaamba ovelleella mikutho ddooshellelliha wa Apwiya nllapo nawaamba na mweeri waneetthanu ni piilli. Koma matthipello a enyumba ya Apwiya yaari ehinamakiweve.

Omakiwattho wa enyumba ya Mulluku

⁷ Athu yaavelleella makobiri wa athu eeruso yoosema malluku ni oopala matabwa. Yaarumiha ddoocha, ddoowirya ni makhura wa Asidoni ni Atiro wi eweena miteekho ddamukunguza ovenyera o Lebanoni oyaana o enyanja, o Yopa moollikana ni waakhullelliwa wiwa ni Kirusi mwene a o Persiya.

⁸ Vano m'muyakha waneepiilli ephiyalle onipuroni na enyumba ya Mulluku o Yerusalemu mu mweeri waneepiilli, Zerubabele mwaana a Shealatiele ni Yeshuwa mwaana a Yozadaki yahaamba mutteko vamodda ni abaliiwa amodda, allupa mukutho, Alevi ni athu attheene yawiille o Yerusalemu ovenyera wuukaporoni. Yahaatthoolla Alevi awaambeella miyakha 20 oya muhoollo wi ewehereke mutteko woomakattho enyumba ya Apwiya.

⁹ Yeshuwa, anaaye ni abalaaye owaakattho Kadimiyele ni anaaye, edduullu dda Yuda ddittheddene owoonjereravo anamwani a Henadadi, aniiwa ni abaliiwa sika wi Alevi attheene yaakhalla ni odindo wowaawehera athu ayo yaphara mutteko woomakattho enyumba ya Mulluku.

¹⁰ Vano oomakattho enyumba yamakilliiwa matthipello a enyumba ya Apwiya, allupa mukutho yaaphiya yiipaka mapallapatiiwa ewarille ddoowara ddamukutho. Nave Alevi a mu nibanja na Asafu yaaphiya yiipaka misangwa mowaatitimiha Apwiya voothwarani malangizo a Davide mwene a Aisraele.

¹¹ Nave yaaniipa moohimaana, mowaatitimiha ni mowaathokoza Apwiya. “Apwiya tti aphaama, echikondiiwa yoohisintha eri va Israele.” Nave athu attheene yaakhuwa wunchichi yaatitimihiiwa Apwiya ekaamba yawi matthipello a enyumba ya Apwiya yaamakiwattho.

¹² Koma anchichi a allupa mukutho, Alevi, oohoollella a mabanja navettho attekweene ayo yoonille enyumba wawaamba yahinlla mookhuwa yoonilliiwa matthipello a enyumba emakiwakattho naarive anchichi yakhuwaka moohakallalla.

¹³ Sika wi athu kheyaaworille ohiyaniha okhuwa wa ehakallallo ni wa winlla wa athwaalle vawi yaakhuwa wunchichi nave okhuwanko wahiiweya wuuteete.