Ezara 10 - Mawu a Mulluku

Athu enawulula machimwiiwa

¹ Ezara avekelleeye ni owulula machimo inllaka ni wuupuruwa vahoollo va enyumba ya Mulluku, mutthukumano muullupalli wa Aisraele, allopwana, atthiyana ni anamwani waawa wa olliye otte wa Israele nave yahinlla wunchichi.

² Vano Shekaniya mwaana a Yehiyele a nibanja na Elamu aamulleella Ezara wi, “Khaniroromelleyille wa Mullukwaahu nave nookhalla naatthellaka atthiyana eelleto oovenyera o mitundu dda athu a ellapo dda wuno. Koma vano naari ddiri ddiiddo vookhalla etiyerello wa Aisraele.

³ Vano hankoni nikeraatthihe echipangano Mullukwaahu wi nimwallanena atthiyanaalla vamodda ni aniiwa moollikana ni malangizo a nyu apwiyaaka ni a athu ayo eniiwellella malamulo a Mullukwaahu. Nave akhullellani wi ddenndda ddeereye moollikana ni malamulo.

⁴ Venyani vawi yoolla sika odindwaanyu nave niri ni nyuwaano. Llipani murima nave pharani mutteko.”

⁵ Sika Ezara aavenya nave ahaallupelliha oohoollella a allupa mukutho, Alevi ni Aisraele attheene wi yeere moollikana ni mmo ddallotelliwiiwa nave yaallupella.

⁶ Vano Ezara aavenyawo o enyumba ya Mulluku nave aaya o echipinda ya Yehohanani mwaana a Eliyashibu nko akonneeyewo mahiiyu mamodda oohimucha buledi apaalle owirya maaddi vawi aaminlla ekaamba ya ohiroromelleya wa ayo yahokollowille wuukaporoni.

⁷ Nave othenga waarumihiwa o Yuda ni o Yerusalemu otthewene wi athu attheene yahokollowille wuukaporoni etthukumane o Yerusalemu

⁸ woollota wi, “Arive muthu ahinaaphiye variyari va mallapo mararu moollikana ni lamulo na oohoollella ni na attekweene aneerewaakhiwa katundwaaye muttheene nave avenyihiwe m'mullokoni wa athu oohokollowa wuukaporoni.”

⁹ Sika athu attheene a Yuda ni Benjamini yaatthukumana o Yerusalemu variyari va mallapo mararu nave vaari va nllapo na 20 na mweeri waneetthanu ni sese. Nave athu attheene yaakeraatthi va nthato na enyumba ya Mulluku etthukumellaka ekaamba ya mwahoolla navettho ekaamba ya murimu munchichi.

¹⁰ Nave Ezara mullupa mukutho aavenya allota wi, “Mookhalla oohiroromelleya vawi mohaatthella atthiyana eelleto mwawi mohaanjerera machimo a Aisraele.

¹¹ Vano muwulule machimwaanyu wa Apwiya Mulluku a makhollwaanyu nave mweere nnddo enapaalliiwa. Mwiipatule wa athu a mwiillaponi navettho mwiipatule wa atthiyana eelleto.”

¹² Vano mullokoolle wahaakhulla mookhuwa wi, “Nineereweera moollikana ni mmo mullotilleenyu.

¹³ Koma athwaalla ahaata nave tti enthawi ya murimu nave khaniwora okhalla vaatte. Ello emoddattho tti yawi muttekoolla khohiyo wa nllapo nimodda apaalle mallapo meelli vawi noochimwa wunchichi.

¹⁴ Hankoni niwaakhullelle oohoollellaahu yiimellelle mulloko muttheene nave athu attheene a m'mapuronaahu ayo yaatthenlle atthiyana eelleto ewe mu enthawi nnddo nyuwaano munaalloteenyu. Nave ewe vamodda ni attekweene a nthato ni aweeruza a mapurwiiwa ophiyera woopiha wa osha murima wa Mullukwaahu va mwaha yoolla omalle.”

¹⁵ Yonatani mwaana a Asahele ni Yahazeiya mwaana a Tikiwa aavanyihanana ddenndda nave Meshulamu vamodda ni Mulevi Shabetayi yahaakhullella.

¹⁶ Vano athu yahokollowille wuukaporonaalle yaheera ddennddo. Ezara mullupa mukutho ahaatthoolla athu ovenyera o oohoollella a mabanja nave aamulemba nnddina arive muthu. Va nllapo nawaamba na mweeri waneekhumi, yahaamba weeruza mwahoolla.

¹⁷ Nave va nllapo nawaamba na mweeri wawaamba yaamalliha millatu dda allopwana attheene yaatthenlle atthiyana eelleto.

Athu ayo yaatthenlle atthiyana eelleto

¹⁸ Nave waaphwanyeya wi amodda mwa allupa mukutho yahaatthella atthiyana eelleto. Ovenyera o edduullu dda Yeshuwa mwaana a Yozadaki ni asinne waari Maaseiya, Eliyezere, Yaribu ni Gedaliya.

¹⁹ Alliwa yaalonjeza omwallana ni awariwa nave mukutho woopepesella machimwiiwa waari nankhoro a enkhosa.

²⁰ Ovenyera o edduullu dda Imara waari Hanani ni Zebadiya.

²¹ Ovenyera o edduullu dda Harimu waari Maaseiya, Eliya, Shemaya, Yehiyele ni Uziya.

²² Ovenyera o edduullu dda Pashuri waari Eliyoenai, Maaseiya, Ishmaele, Netanele, Yozabadi ni Eleasa.

²³ Ovenyera wa Alevi waari Yozabadi, Shimei, Kelaya (oyo aromolliwattho wi Kelita), Petahiya, Yuda ni Eliyezere.

²⁴ Ovenyera wa awiipa machipo waari Eliyashibu. Ovenyera wa alonda a va mullako wa enyumba ya Mulluku waari Shalumu, Telemu ni Uri.

²⁵ Nave ovenyera wa Aisraele edduullu dda Paroshi ddaari Ramiya, Iziya, Malikiya, Miyamini, Eleazara, Hashabiyani ni Benaya.

²⁶ Ovenyera o edduullu dda Elamu waari Mataniya, Zekariya, Yehiyele, Abidi, Yeremoti ni Eliya.

²⁷ Ovenyera o edduullu dda Zatu waari Eliyoenai, Eliyashibu, Mataniya, Yeremoti, Zabadi ni Aziza.

²⁸ Ovenyera o edduullu dda Bebai waari Yehohanani, Hananiya, Zabai ni Atilai.

²⁹ Ovenyera o edduullu dda Bani waari Meshulamu, Malaki, Adaya, Yashubu, Sheyala ni Yeremoti.

³⁰ Ovenyera o edduullu dda Pahatimowabu waari Adina, Kelali, Benaya, Maaseiya, Mataniya, Bezalele, Binuyi ni Manase.

³¹ Ovenyera o edduullu dda Harimu waari Eliyezere, Ishiya, Malikiya, Shemaya, Shimeoni,

³² Benjamini, Maluki ni Shemariya.

³³ Ovenyera o edduullu dda Hashumu waari Metenai, Matata, Zabadi, Elifeleti, Yeremai, Manase ni Shimei.

³⁴ Ovenyera o edduullu dda Bani waari Madai, Amuramu, Uwele,

³⁵ Benaya, Bedeiya, Keluhu,

³⁶ Vaniya, Meremoti, Eliyashibu,

³⁷ Mataniya, Metenai ni Yasu.

³⁸ Ovenyera o edduullu dda Binuyi waari Shimei,

³⁹ Shelemiya, Natani, Adaya,

⁴⁰ Makinadebai, Shashai, Sharai,

⁴¹ Azarele, Shelemiya, Shemariya,

⁴² Shalumu, Amariya ni Yosefe.

⁴³ Ovenyera o edduullu dda Nebo waari Yeiyele, Matitiya, Zabadi, Zebina, Yadai, Yowele ni Benaya.

⁴⁴ Attheenaalla yaatthenlle atthiyana eelleto nave yahaavelleella owaniwa vamodda ni aniiwa.