Ezara 1 - Mawu a Mulluku

Olamulello wa Kirusi

¹ M'muyakha wawaamba wa olamulello wa Kirusi mwene a o Persiya, mawu a Apwiya yallotiwe oweella mwa Yeremiya wi yaakwakhwanihiwa. Vano Apwiya yaamuvaha maganizo Kirusi wi allalleye mwiillaponi mutthemwene voollotani navettho voolembani wi,

² “Nndda sika mwene Kirusi a o Persiya analloteeye wi Apwiya Mulluku a oddullu aakivaha moomwene mattheene a va ellapo yavatthi nave aakilamula wi kaamakellettho enyumba o Yerusalemu a o Yuda.

³ Sika nyu attheene muri ayiwayiwa Mullukwaanyu akhalle ni nyuwaano. Nave muye o Yerusalemu a o Yuda wi mwamakettho enyumba ya Apwiya Mulluku a Israele, Mulluku oyo ari mu Yerusalemu.

⁴ Sika Aisraele oohalla ni okumi orive weko enakhalliiwa ekaviheriwe ni aneetthi a ellapweeyo. Yaavahe siliva, golide, katundu, eziweto ddoovelleella dda opaalla wiwa ddoomakellattho enyumba ya Mulluku o Yerusalemu.”

⁵ Vano oohoollella a mabanja a nlloko na Yuda ni Benjamini owaakattho allupa mukutho ni Alevi, arive muthu oyo Mulluku aamuvahilleeye maganizo aakhozeka aya woomakattho enyumba ya Apwiya o Yerusalemu.

⁶ Nave athu attheene yawaaphenlle yahaakavihera vawaavahani eziwiya ddasiliva, golide, katundu, eziweto navettho emphaso ddoowallamella mutengo.

⁷ Mwene Kirusi aakhumiha eziwiya dda enyumba ya Apwiya nnddo Nebukadinezara addivenyihalleeye o Yerusalemu addihiya mu enyumba dda milluku ddaye.

⁸ Kirusi mwene a o Persiya aaddikhumiha ddenndda addivelleella m'mattani mwa Metiredati, oosunga eyuuma addeerenga vamiitthoni va Sheshibazara, enduna ya o Yuda.

⁹ Echiwerengerwiiwa yaari mabeseni agolide 1,000, mabeseni asiliva 1,000, ddoothuwihella mwiisi 29,

¹⁰ makapu a golide 30, makapu a siliva 2,410 ni eziwiya ddimodda 1,000.

¹¹ Eziwiya ddagolide ni ddasiliva vamodda ddittheddene ddaakwakhwana 5,469. Ddittheddenenndda tti nnddo Sheshibazara awiilleeyena a okaporonaalle yahokollweelliiwa o Yerusalemu ovenyera o Babiloni.