Estere 9 - Mawu a Mulluku

Ayuda enawoononga adaniiwa

¹ Nllapo na khumi ni raru na mweeri wa Adara naakwakhwana, nllapo nno nakeraatthihiwe wi lamulo nawaambanne na mwene naambe ophara mutteko, nllapo nno adani a Ayuda yatiyerelliiwa waagonjiha Ayudaayo. Koma ddeko ddaarukunuwa vawi Ayuda sika yaagonjihalle adaniiwa nllapo nenno.

² Ayudaayo yaatthukumana mu mizinda ddiwa, mu ezigawo ddittheddene dda mwene Ahasuwero wi emoononge arive muthu oyo apaalla oweerella yoonanara. Khaarivo naari muthu mmodda aworille ollipanana vawi athu attheene yaanawoova wunchichi Ayudaayo.

³ Athu attheene oowehera mutteko wa mwene mu ezigawo, yaanaakavihera Ayuda ekaamba yawi yaanamoova wunchichi Mordekai.

⁴ Vawi Mordekai aari muthu muullupalli o enyumba yoomwene nave olliye aavuwa orive weko mu ezigawo ddittheddene, ekaamba yawi masiva a olamulellwaaye yaanoonjerereya nllapo ni nllapo.

⁵ Sika Ayuda yaawiipha adaniiwa attheene ni masupada. Yaawiipha ni owoononga nave yaweerana ayo yawiita moollikana ni mmo yapaallelliiwa.

⁶ Mu Susa, muzinda muullupalli, Ayuda yaawiipha ni owoononga athu 500.

⁷ Yaawiiphattho Parashadata, Dalifoni, Asipata,

⁸ Porata, Adaliya, Aridata,

⁹ Parisita, Arisai, Aridai ni Vaizata.

¹⁰ Alla yaari anamwani aallopwana khumi a Hamani, mwaana a Hamedata, mudani a Ayuda. Koma kheyaakhille ddeko dda adaniiwaayo.

¹¹ Nllapo nenno echiwerengero ya athu awiiphiwa mu muzinda wa Susa, yaarumihiwa wa mwene.

¹² Sika mwene aamulleella Estere wi, “Mu muzinda yoollave wa Susa, Ayuda ewiiphallemo athu 500, vamoddattho ni anamwani aallopwana khumi a Hamani. Khaya weereyille ddawiidde mu ezigawo ddittheddene ddaka ddittheddene! Ethiyo onapaalla tini? Oneerovahiwa. Ethiyo onaveka tini? Yoovekaawo kineerewuuvaha.”

¹³ Vano Estere aamwaakhulla mwene wi, “Ddaarimi dduuddivenlleni nyu amwene, mwaakhullelle wi Ayuda ookhalla mu muzinda wa Susa yaakhullelliwe wi osiisello yeerettho nnddo yeerilliiwa ollello. Navettho anamwani aallopwana khumi a Hamanaalle mitembo ddiwa ddimakellelliwe vamuteekhoni.”

¹⁴ Sika mwene aalamula wi ddenndda ddeereye. Lamulo naavelleelliwa mu muzinda wa Susa. Nave mitembo dda anamwani aallopwana a Hamanaalle yaaddimakellella vamuteekhoni.

¹⁵ Nllapo na khumi ni sese na mweeri wa Adara, Ayuda ookhalla o Susa yaatthukumanattho vamodda. Sika yaawiipha athu amoddattho 300 o Susanko koma kheyaakhille ddeko ddiwa.

¹⁶ Navettho Ayuda ookhalla mu ezigawo ddimodda dda mwene yaatthukumana wi yiiteteze. Yahiittaphulla ovenyera wa adaniiwa nave yaawiipha athu 75,000 koma kheyaakhille ddeko dda adaniiwaayo.

¹⁷ Ddenndda ddeereyille nllapo na khumi ni raru na mweeri wa Adara. Nllapo na khumi ni sese na mweeri wa Adara yahiithuuwa nave yaanitthattusa nllapo na ehakallallo ni na machellello.

¹⁸ Koma Ayuda ookhalla o Susa ayo yatthukumanille nllapo na khumi ni raru ni nllapo na khumi ni sese, yahiithuuwa nllapo na khumi ni tthanu. Nave nllapo nna yaanitthattusa na ehakallallo ni na machellello.

¹⁹ Koma Ayuda a m'mizi, ookhalla m'mizindani ddoohikhalla ni mipanda ddawiitetezella wa adani, ennasunga nllapo na khumi ni sese na mweeri wa Adara okhalla nllapo noohakallalla, na machellello ni nawiithuuwa. Nave va nllapo nna ennarumihellana emphaso.

Ehakallallo ya Purimu

²⁰ Mordekai aalemba ddaweereyanndda munibukhuni nave aarumiha makalata wa Ayuda attheene ookhalla mu ezigawo ddittheddene dda mwene Ahasuwero, vakhuviru ni woorekama wene.

²¹ Ahaalleella wi esungeke nllapo na khumi ni sese na mweeri wa Adara navettho nllapo na khumi ni tthanu na mweeri yooyo muyakha ni muyakha,

²² vawi yaari mallapo ayo Ayuda yiittaphullalliiwa ovenyera wa adaniiwa. Sika mweeri wa Adara waari mweeri oyo ethakaraka ni winlla ddatthattuwalliiwa ohakallalla. Mordekai ahaalleellattho wi mallapo yaalla ekhalleke a ehakallallo ni a machellello voorumihellana ddoocha ddaphaama navettho waavaha emphaso athu oohoowa.

²³ Sika Ayuda yahaamba othwara muyakha ni muyakha nnddo Mordekai aalangizalleeye mukalatani.

²⁴ Hamani, Mwagagoolle, mwaana a Hamedata, mudani a Ayuda attheene, aari akeraatthihalle ddoowoononga Ayuda vawi ahoombesa nikhanga nooromolliwa Puri wi awoononge ni waatthollosa Ayudaayo.

²⁵ Koma Estere aphiyalleeye vamiitthoni va mwene, mwenooyo aalamula voolembani wi ddoopaalla owoononga Ayuda nnddo ekeraatthihalle Hamani, ddimmorelle yeekha nave wi Hamanooyo ni anaaye aallopwana emakellelliwe vamuteekhoni.

²⁶ Ella sika ekaambiiwa mallapwaayo enaromolliwiiwa wi Purimu voothwarani mawu awi Puri. Nave ekaamba ya kalata a Mordekai ni ekaamba ya ddittheddene nnddo ddaweereyelle,

²⁷ Ayudaayo yahiikeraatthihella weekhiiwa mutethoolla nave yaasimikiza wi alliwaayo, edduullu ddiwa ni athu amodda ookhalla variyari viwa wi ehitiwalleke osunga mallapo meellaalla, voothwarani nnddo ddalembiwe navettho ni enthawiine yaweerella ddenndda muyakha ni muyakha.

²⁸ Mallapo alla ewuupuwelleke ni waasunga mu mibado ddittheddene, mu mabanja mattheene, mu ezigawo ddittheddene navettho mu mizinda ddittheddene. Mallapo alla, ooromolliwa Purimu, ehitiwalliweke variyari va Ayuda nave edduullu ddiwa ddihihiye waasunge.

²⁹ Sika mwaaramwene Estere, mwaana a Abihaili ni Muyudooyo Mordekai, yaamulemba kalata mmodda ni olamulello muttheene wi esimikizelle mu kalata aneepilloolla dda mutetho wa Purimu.

³⁰ Makalata yaarumihiwa wa Ayuda attheene ookhalla o ezigawo ddittheddenenndde 127 dda mwene Ahasuwero. Makalataayo yaari oollota dda murendelle ni dda echitetezo,

³¹ wi mallapo yaalla a Purimu esungiweke mu enthawi yookeraatthihiwa, voothwarani nnddo mwaaramwene Estere ni Muyudooyo Mordekai yaalamulalliiwa Ayuda. Yaasungekettho mallapwaalla voothwarani malamulo ayo Ayudaayo yiikeraatthihelliiwa ni edduullu ddiwa, oollota ddoohalla ocha* ni winlla wiwa.

³² Lamulo na mwaaramwene Estere sika nakeraatthihalle ddoophwanella weera enthawi ya Purimu nave naalembiwa mu nibukhu.