Estere 7 - Mawu a Mulluku

¹ Sika mwene ni Hamani yaaya o machellello akeraatthihalle mwaaramwene Estere.

² Va nllapo naneepiilli na machellello, voomuwiryani vinyo, mwene aamukohattho Estere wi, “Ethiyo onapaalla tini? Kineerewuuvaha. Nave ethiyo onaveka tini? Ddawoona Kineerewuuvaha naari eri hafu a omwenaaka.”

³ Mwaaramwene Estere ahaakhulla wi, “Mwaarimi mukeerelle echifundo ni miyaano navettho dduuddivellani nyu amwene, mukisungelle okumaaka komattho musunge okumi wa athu a nlloko naka. Yoovekaaka tti yeella.

⁴ Vawi aanikulliha, miyaano ni athu a nlloko naka wi noonongiwe, niiphiwe ni wi nitthollosiwe. Yanikullihalleke wi nikhalle akaporo, allopwana ni atthiyaneene, keereweera ellapo tuu oohillotavo ello vawi ohoosiwa wahu khewaaphiyere vawi nyu amwene mukatamihiwekena.”

⁵ Vano mwene Ahasuwero aamukoha Estere wi, “Ethiyo ttaani oyo anapaalla ddenndda? Nave ari wuuwi?”

⁶ Estere ahaakhulla wi, “Oonihoosa ni mudanihu, Hamani oonanara murimoolla!” Vaavo Hamani ahoova wunchichi vamiitthoni va mwene ni mwaaramwene.

⁷ Vano mwene aavenya moonanariwa nave aaya o nthato na enyumbaaye. Koma Hamani aahalla wi aveke wa mwaaramwene Estere wi avulluse okumaaye vawi aadduwella wi mwene aasimikiza omweerella yoonanara.

⁸ Mwene awiillewo o nthato na enyumbaaye, voovollowani mu echipinda ya machellello, amphwannye Hamani iikuhelle vabedini mvo vaari Estere, voopaallani oveka mahalla. Vano mwene aallota wi, “Ha! Muthoolla anapaalla wi ampharelle mwaaramwene mpa mwaka, koonaka ni miitthwaaka.” Mwene amalliheeye wene ollota, athu yaamukhuneella Hamani ekhove.

⁹ Vano Haribona, mmodda mwa allupa mutteko a amwene, aallota wi, “Woonjerera vaavo, Hamani aapotokosa muteekho wawiimakellellavo, woorekama mamita 23 wi emumakellellevo Mordekai, muthu oyo uuvullunseni nyuwaano mwene ni mawaaye.” Vano mwene aallota wi, “Mwamumakellelle vaavo olliyoolla.”

¹⁰ Sika athwaayo yaamumakellella Hamani vamuteekhoni wawiimakellellavo oyo apotokosihalleeye wi amumakellellevo Mordekai. Vatulli viwa murima wa mwene waakeraattheya.