Estere 6 - Mawu a Mulluku

Mwene anamuvaha Mordekai olemu

¹ Mahiiyu yaayo mwene khaaworille okona ekhove, sika aalamula wi eweena nibukhu na epilli yakhalle. Ewiillena, mullupa mutteko mmodda aaneerenga vamiitthoni va mwene.

² Vano mu nibukhunimmo yaaphwanyamo wi Mordekai ahuupullulla dda Bigitana ni Teresi, eelli mwa allupa mutteko oohulliwa* a mwene ayo yawehera va mullako woovollowella wa mwene vawi yahiiwanana wi emwiiphe mwene Ahasuwero.

³ Vano mwene aakoha wi, “Ethiyo Mordekai yamuvahille olemu mwawiidde ni omwinnya ottekweene mwawiidde va ddeko nndda?” Allupa mutteko a mwene yaallota wi, “Kheyaamweerelle erive ello.”

⁴ Mwene aakoha wi, “Ethiyo ttaani oyo ari muwari mwa nthato?” Enthawi yeeyo sika Hamani avollowille wene mu nthato na otte wa enyumba yoomwene wi amulleelle mwene dda omutthomeya Mordekai va muteekho ampotokoselleeyoolle.

⁵ Sika allupa mutteko a mwene yahaakhulla wi, “Tti Hamani oyo iimenlle munthatonimmo.” Mwenooyo aallota wi, “Muvollochiheni.”

⁶ Hamani avollowille, mwene aamukoha wi, “Ethiyo ttuumweerella tini muthu oyo mwene apaallilleeye omuvaha olemu?” Hamani aaganiza m'murimani mwaye wi, “Ethiyo ttaanittho oyo mwene anapaalleeye wi amuvahe olemu okikhwaranya miyaano?”

^7-8 Vano aamwaakhulla mwene wi, “Nndda sika ddoopaalleya omweerella muthu oyo nyu amwene munapaalleenyu wi mumuvahe olemu. Mwaarume athu eweena ddoowara ddoomwene ddawariwa ni amwene ni kavalo awelliwa ni amwene oyo ari ni echizindikiro yoomwene vamuru.

⁹ Ddoowarannddo ni kavalooyo muhiye m'mattani mwa mmodda mwa enduna ddoovuwesesa dda mwene. Vano olliyooyo amuwawarihe phaama muthu oyo mwene apaallilleeye omuvaha olemu nave amweetihe m'misewuni dda m'muzindani emuwellihalle va kavalo, nngu allalleyaka wi, ‘Ngoonani mmo eneerelliiwa ni muthu oyo mwene apaallilleeye omuvaha olemu.’ ”

¹⁰ Sika mwene aamulleella Hamani wi, “Akuva, wakuse ddoowarannddo ni kavalo wonanko mmo ollotelliiwa. Omweerelle ddennddo Mordekai, Muyudoolle, olle anaphara mutteko o enyumba yoomwene. Nave vihirame erive ello va ddittheddene oromonlleewenndda.”

¹¹ Sika Hamani aakusa ddoowarannddo ni kavalo nave aamuwariha Mordekai nave ahaamba weetana m'misewuni ddittheddene dda m'muzindanimmo amuwellinhe va kavalo, nngu allalleyaka wi, “Ngoonani mmo eneerelliiwa ni muthu oyo mwene apaallilleeye wi amuvahe olemu.”

¹² Vatulli viwa Mordekai aahokollweella o enyumba yoomwene. Koma Hamani aaya mwawaakuva o enyumba waye inllaka, iikhuneelle muru.

¹³ Wenko aamulleella mwaariye Zereshi ni akhwaaye attheene, ddittheddene nnddo ddamweereyelle. Sika akhwaaye eezeru ni mwaariye yamulleella wi, “Mohaambathi ogonja vamiitthoni va Mordekai. Vano vawi olliyoolle tti Muyuda, kheyiivo munaapambaneenyu. Moohikayika, muneerogonja ddawoona, vamiitthoni vaye.”

Wiiphiwa wa Hamani

¹⁴ Eri variyari voollotani ddenndda ni Hamani, allupa mutteko a mwene yaaphiya, emukusa Hamanoolle mwawaakuva, emuyaana o machellello ookeraatthihiwa ni Estere.