Estere 5 - Mawu a Mulluku

Estere anamwiithaniha mwene ni Hamani o machellello

¹ Va nllapo naneeraru na ohalla ocha,* Estere aawara mukanjwaaye woomwene nave aaya iimella munthatoni na muwari na mwene, voowehana ni echipinda yuullupalli ya mwene. Va enthawi ella mwene aari akeraatthille va mpandwaaye woomwene muwari mwa echipindeeyo, moowehana ni mullako woovollowella muchipindanimmo.

² Vano voomoonani mwaaramwene Estere iimellille munthatonimmo, mwenooyo aahakallallana, sika aamutthoonya ni ekopwaaye ya golide eyo yaari m'mattani mwaye. Sika Estere ahaatamella vakhuviru nave aattannya etthoka ya ekopweeyo.

³ Mwene aamukoha wi, “Ethiyo yeereyille tti tini, weyaano mwaaramwene Estere? Ethiyo onaveka tini? Kineerewuuvaha naari eri hafu a omwenaaka.”

⁴ Estere ahaakhulla wi, “Ddaarimi dduuddivenlleni amwene, nyuwaano muwe ni Hamani ollello vaava o machellello ayo kuukeraatthihelleemini nyu amwene.”

⁵ Vano mwene aallota wi, “Mumuweena naanweene vaava Hamanooyo wi neere nnddo anapaalla Estere.” Sika mwene ni Hamani yaaya o machellello ayo akeraatthihalle Estere.

⁶ Yamuwiryiiwa vinyo, mwene aamukoha Estere wi, “Ethiyo onapaalla tini? Kineerewuuvaha. Nave ethiyo onaveka tini?” Kineerewuuvaha ddawoona, naari eri hafu a omwenaaka.

⁷ Sika Estere ahaakhulla wi, “Kineerewuulleellani yoovekaaka navettho eyo kinapaalleemi.

⁸ Nyu amwene, mwaarimi mukeerenlle echifundo nave dduuddivellani wi mukivahe nnddo kivenkeemi ni okinnya ddawoona, eyo kinapaalleemi, muwe osiisello nyuwaano ni Hamani va machellello ayo kineereemi kuukeraatthihelleni. Sika va enthawi yeeyo kineerewuutthopoollellani nnddo kinapaalleemi.”

Hamani anakeraatthiha dda omoononga Mordekai

⁹ Nllapo nenno Hamani ayaawo moohakallalla ni mwaweelliwa murima. Koma ari mu enyumba mwa mwene vawoonani wi Mordekai khaamukokhorella ni omutthukumellella vamiitthoni vaye, aamushella murima wunchichi Mordekayooyo.

¹⁰ Naari ddaari ddiiddo komave Hamani aaphara murima nave voophiyani owaniwa aawiithaniha akhwaaye ni mwaariye Zereshi.

¹¹ Vano Hamani ahiitukhulla ekaamba ya waata eyuumaaye, waata wa anaaye aallopwana ni olemu oyo mwene amuvahilleeye navettho ni wi mwene aamunnuwiha waakhwaranya attekweene attheene ni allupa mutteko attheene amwene.

¹² Aavirellellattho ollota wi, “Mwaaramwene Estere khaakhullenlle wi arive muthu aye ni mwene o machellello akeraatthihalleeye koma miyaano. Osiisello Esterooyo ookiithanattho miyaano ni mwene.

¹³ Komave ddittheddenenndda khaddinakikwakhwana miyaano, kaamoonaka Muyudoolla Mordekai, anaphara mutteko o enyumba yoomwene.”

¹⁴ Vano mwaariye Zereshi ni akhwaaye attheene yaamulleella wi, “Mupotokose muteekho wawiimakellellavo woorekama mamita 23. Ohinase mumulleelle mwene wi amumakellelle vamuteekhonimvo Mordekai. Sika muyeewo moohakallalla omachellelloni ni mwene.” Malangizwaalla yaamuddivella Hamani, sika aapotokosiha muteekho wawiimakellellavooyo.