Estere 4 - Mawu a Mulluku

Mordekai anaveka nikavihero wa Estere

¹ Mordekai iiwalleeye ddittheddene ddeereyillennddo, ahaahulla ddoowara ddaye, awara nthumba ni wiihella ntuura ekaamba ya ethakaraka. Aaya avollowa muwari mwa muzinda, inllaka mookhuwa ni moovoreyiwa murima wunchichi.

² Olliye iimellille vakhuviru ni mullako wa mwene vawi khaarivo muthu naari mmodda oyo aakhullelliwa ovollowa va mullako wa mwene awarille nthumba.

³ Nave o erive echigawo nko waphiyalle lamulo na mwene waari winlla wunchichi variyari va Ayuda. Yaanahalla ocha* ni winlla nave yaanakhupanya moomoriha ethakaraka. Anchichi mwa Ayudaayo yaanawara mathumba ni wiihella ntuura.

⁴ Vano anamwalli ni allupa mutteko amodda a Estere yawiilliiwa wi emulleelle dda Mordekai, mwaaramwenooyo aakhumuwa wunchichi. Estere aarumiha ddoowara wi Mordekai aware ni orulla nthumba naye koma olliye aakhoota waakhullella ddennddo.

⁵ Sika Estere aamwiithana Hataki, mmodda a allupa mutteko oohulliwa* a mwene ayo yahiyiwe wi emukavihereke. Aamulamula aye wa Mordekai wi iiwe nnddo ddeereyille navettho wi ddeereyille ekaambeene tini.

⁶ Hataki aaya wa Mordekai va nthato na muzinda, vahoollo va mullako wa mwene.

⁷ Mordekai aamulleella ddittheddene nnddo ddeereyille. Aamulleellattho waata wa makobiri ayo Hamani alonjezilleeye wi aavelleella moosungellamo eyuuma ya mwene wi Ayuda attheene yoonongiwe.

⁸ Mordekai aamwinnyattho kalata oolamulo oovenyera o Susa ootthopoolla wi Ayuda attheene yoonongiwe. Aaveka wi Estere amoonihere kalatooyo ni omutthopoollella nave amulleelle wi aye wa mwene amuveke moomukhupanyella wi aweerelle echifundo Ayuda.

⁹ Hataki aamulleella Estere nnddo Mordekai allotilleeye.

¹⁰ Nave Estere aallota wa Hataki mawu oohokollosella wa Mordekai wi,

¹¹ “Allupa mutteko attheene ni athu attheene a muzigawo dda ellapo ya mwene ennadduwella wi arive mullopwana apaalle mutthiyana avollowa munthatoni na muwari na mwene ahiithaniwe, viri lamulo nimoddave. Lamulonno ninallota wi, attheenaayo enapaalleya wiiphiwa oohihiyaniha, vaavove muthu oyo mwene amutthoonyilleeye ni ekopwaaye yoomwene yagolide, awi akhalle ni okumi. Koma voomalla mweeri mwene ahikiithanille wi kiye woolliye.”

¹² Nave Hataki aamulleella Mordekai nnddo allotille Estere.

¹³ Mordekai aamulleella Hataki wi ahokolloselle mawu wa Estere wi, “Muhiganize wi o enyumba ya mwenenko nyuwaano muneerovulluwa waakhwaranya Ayuda amodda attheene.

¹⁴ Nyuwaano mwaaheeravo ello va enthawi ella, nikavihero ni ovullusiwa wa Ayuda ddinaavenyere waamodda koma nyuwaano ni nibanja na attiitthaanyu muneere woonongiwa. Apaalle anadduwella ttaani wi nyuwaano mwatthoolliwe okhalla mwaaramwene ekaamba ya enthawi wonanko yeella!”

¹⁵ Nave Estere aarumiha mawu wa Mordekai wi,

¹⁶ “Khaweni mwaatthukumanihe Ayuda attheene a o Susa. Nave yathute ocha ekaamba ya miyaano. Ehiye yacha apaalle owirya mallapo mararu otthaana ni mahiiyu. Miyaanottho ni anamwallaaka nineerothuta ocha moophwanaphwana ni nyuwaano. Vatulli viwa kineerooya wa mwene naari nngu tti ohiiwellella lamulo. Wakhalla okhwa, kikhwe.”

¹⁷ Sika Mordekai aaya eera ddittheddene nnddo Estere amulleelleye wi eere.