Estere 3 - Mawu a Mulluku

Hamani anakeraatthiha dda owoononga Ayuda

¹ Ddiviralle nndda, mwene Ahasuwero aamuwelliha odindo mullopwana ooromolliwa wi Hamani Mwagagi, mwaana a Hamedata. Aamunnuwiha ni omuvaha mpando wa vaddullu, okhwaranya enduna ddittheddene ddaari ni olliye.

² Sika allupa mutteko attheene a mwene yaphara mutteko o enyumba yoomwene yaanamuvaha olemu voomukokhorella Hamanooyo vawi mwene sika alamulalle ddenndda. Koma Mordekai khaamukokhorella apaalle omuwaramella.

³ Allupa mutteko amoddaalle yaamukoha Mordekai wi, “Ethiyo kaambiiwa tini ohiniiwellelleewe lamulo na mwene?”

⁴ Vawi Mordekai ahaalleella wi olliye tti Muyuda, alliwa yaanallota ni olliye nllapo ni nllapo koma khaawiiwellella. Sika yaamulleella Hamani ddenndda wi apaalle Mordekai ttuusintha.

⁵ Hamani oonilleeye wi Mordekai khaamukokhorella apaalle omuweramella, aasha murima wunchichi.

⁶ Koma olliye khaapaallille omwiipha Mordekaive. Vawi aari iiwalle dda athu nlloko na Mordekai, Hamani aallipa murima wi awoononge Ayuda attheene, mu omwene muttheene wa Ahasuwero.

⁷ Va mweeri wawaamba, mweeri wa Nisani, muyakha wa khumi ni piilli wa omwene wa Ahasuwero, athu yahoombesa nikhanga nooromolliwa Puri vamiitthoni va Hamani. Vaweerani nndda yapaalla edduwelle nllapo ni mweeri woophwanellella. Sika nikhanganno naatthoolla mweeri wa khumi ni miilli, mweeri wa Adara.

⁸ Vano Hamani aamulleella mwene Ahasuwero wi, “Vookhalla nlloko nimodda na athu nno nimwareyelle mwiillaponi ettheeneella nave ninaphwanyeya mu erive echigawo eyo munalamulelleenyu. Malamulo a athu yaalla tti oohiyana ni malamulo a athu amodda attheene. Nave athu yaalla kheniiwellella malamulo a mwene, sika khe phaama wi mwene aahiyerere.

⁹ Dduuddivellani amwene, mulamule wi nlloko nittheenenno noonongiwe. Nave miyaano kineerovelleella mataani 375 a siliva m'mattani mwa athu oowehera mutteko wa mwene wi ehiye makobiraayo moosungellamo eyuuma ya mwene.”

¹⁰ Vaavo mwene aarulla emphete o nnatta waye, eyo yapharihiwa mutteko woodinda malamulo a mwene. Nave ayivelleella empheteeyo wa Hamani Mwagagi, mwaana a Hamedata, mudani a Ayuda.

¹¹ Sika mwene aamulleella Hamani wi, “Woovahiwa makobiri ni athu ayo wi weere nnddo ddinuuddivella.”

¹² Vano alembi a mwene yahiithaniwa va nllapo na khumi ni naneeraru na mweeri wawaamba nave yaamulemba kalata oollota ddittheddene nnddo Hamani alamulalleeye. Yaamurumiha wa attekweene ni allupa mutteko a mwene ni enduna dda mu ezigawo ddittheddene, o erive echigawo moollikana ni mmo enalembelliiwa navettho wa nirive nlloko mu ellotellwiiwa. Kalatooyo alembiwe mu nnddina na mwene Ahasuwero nave aadindiwa ni emphetaaye.

¹³ Kalatooyo arumihiwe ni amithenga o ezigawo ddittheddene dda omwene wi ewoononge, owiipha ni waatthollosa Ayuda attheene, athu eesombwe ni awuulluvalla, atthiyana ni anamwaniine va nllapo nimodda, va nllapo na khumi ni naneeraru na mweeri wa Adara navettho wi emwaakhe katundwiiwa.

¹⁴ Mawu a mu kalatooyo yapaalleya edduwelliwe mu ezigawo ddittheddene wi tti lamulo. Vawi vapaalleye ollalleya mawaayo wa athu a malloko mattheene wi ekhozekelle va nllapo nenno.

¹⁵ Moolamuliwa ni mwene, amithengaalle yaaya mwawaakuva. Yaavelleellattho lamulo mu Susa, muzinda muullupalli wa omwene. Nave mwene ni Hamani yaakeraatthi vatthi enawirya koma athu a o Susa yaakhwa ni mullakallaka.