Estere 2 - Mawu a Mulluku

Estere anatthelliwa ni mwene

¹ Vatulli viwa, murima wa mwene okeraattheye munipuroni, aamuganizera Vasiti ni nnddo eerilleeye ni lamulo nno amukeraatthihelleeye.

² Vano allupa mutteko a mwene yaamulangiza wi, “Emutthukumanihelle mwene anamwalli ooreera.

³ Mwene aakeraatthihe akapitawo mu ezigawo ddittheddene dda omwenaaye. Akapitawaayo yaatthukumanihe anamwalli attheene ooreera o enyumba yawaasungellamo atthiyana o Susa, muzinda muullupalli. Mwaahiye anamwallaayo m'mattani mwa Hegai oyo ari mullupa mutteko oohulliwa* oowaawehera atthiyanaanyu. Nave evahiwe ddawiihella ddooreeriha.

⁴ Sika namwalli oyo anuuddivelleni mumukuse akhalle mwaaramwene oovollowa munipuroni na Vasiti.” Malangizwaalla yaamuhakallalliha mwene, sika aheera nnddo ddallotiwe.

⁵ Vano mu Susa mwaakhalla Muyuda nnddina naye Mordekai, mwaana a Yairi, edduullu ya Simei mwaana a Kishi, a nlloko na Benjamini.

⁶ Kishi aari mmodda mwa athu ayo mwene Nebukadinezara o Babiloni aapharilleeye okaporo ovenyera o Yerusalemu ni Yekoniya, mwene a o Yuda.

⁷ Mordekai aamulleella Estere apaalle Hadasa mu Eheberi, mwaana a attiitthinnya ang'onong'ono vawi khaarina amennya apaalle attiitthinnya. Estere aari namwalli oreera wunchichi. Sika attiitthinnya ni amennya yakhwilliiwa, Mordekai aamukusa anamullella wonanko mwanaye.

⁸ Vano mvo lamulo nanaanweene na mwene nallalleyiwiiwa navettho anamwalli anchichi yaatthukumanihiwiiwa o Susa, Estere aarina nimodda vamutthukumanooyo. Olliyettho aahiyiwa o enyumba yoomwene m'mattani mwa Hegai oyo aari mullupa mutteko oowaawehera atthiyana.

⁹ Estere aamuhakallalliha Hegai sika aamweerella echifundo namwallooyo nave ddeko ddaanamweetella phaama. Sika Hegai aamwinnya mwawaakuva Estere ddawiihella ni yoocha yaayeyaaye. Aamwinnyattho allupa mutteko aatthiyana atthanu ni eelli a o enyumba yoomwene wi emukavihereke. Estere ni allupa muttekwaayaayo yaahiyiwa munipuroni nooreeresesa mu enyumba yaatthiyaneeyo.

¹⁰ Vano vawiiwellella malangizo a Mordekai, Estere khaawululalle dda nlloko naye apaalle dda nibanja naye.

¹¹ Nllapo ni nllapo Mordekai aaneeteeta va nthato na enyumba yaatthiyaneelle wi adduwelleke dda okumi wa Estere ni mmo ddeko ddaye ddakhallelliiwa.

¹² Vano vaanakhalla enthawi yawi arive namwalli aye wa mwene Ahasuwero, amallihalle miyeri khumi ni miilli ari va mutetho waatthiyana wawiireeriha. Miyeri mitthanu ni mmodda ddawaamba ddaari ddawiihella makhura a mure.* Miyeri mitthanu ni mmodda ddoohallannddo ddaari ddawiihella ddawunkhella ddimodda.

¹³ Namwalli aayaaka o enyumba yoomwene yaanamuvaha erive ello eyo apaalleye okusa ovenyera o enyumba yaatthiyaneeyo wi ayeena o enyumba yoomwene.

¹⁴ Ayaawo misikuwa ni owaawo ohinase nave aanaya o enyumba yaatthiyana yaneepiilli eyo yaweheriwa ni Sasigazi mullupa mutteko oohulliwa a mwene oyo aawehera awara ang'onong'ono a mwene. Khaavo mutthiyana ayaawo wiilli wa mwene koma vaavove mwene aahakallalla ni mutthiyanooyo voomwiithanani mooromolla nnddina naye.

¹⁵ Yaakwakhwanilliiwa enthawi yoomuvollochiha Estere, mwaana a Abihaili, attiitthinnya ang'onong'ono a Mordekai oyo Mordekai amullellilleeye wonanko mwanaye, olliye khaavekille erive ello opatula ddennddove Hegai, mullupa mutteko a mwenooyo aawehera atthiyana, amulleelleeye. Nave attheene ayo yamoonille Estere yaamusilila.

¹⁶ Vano yaamukusa Estere emuyaana wa mwene Ahasuwero o enyumbaaye mweeri waneekhumi wa Tebeti muyakha waneetthanu ni piilli wa omwenaaye.

¹⁷ Mwene aamukonda Estere okhwaranya atthiyana attheene. Nave aamuhakallalliha mwene waakhwaranya anamwalli attheene. Sika mwene ammaka enduwira yoomwene, amutthattusa mwaaramwene ovollowa munipuroni na Vasiti.

¹⁸ Vano mwene aakeraatthiha machellello uullupalli a attekweenaaye attheene ni allupa muttekwaaye. Machellellwaalla yaari oomuvaha olemu Estere. Mwene aawiithuuwihattho athu okhoma musonkho mu ezigawo ddaye ddittheddene navettho aavelleella emphaso mwa mahalla moollikana ni mwene.

Mordekai anavullusa okumi wa mwene

¹⁹ Mvo anamwalli yatthukumanihiwiiwa enthawi yaneepiilli, Mordekai aari apharaka mutteko o enyumba yoomwene.

²⁰ Vano Estere aari ahinawulule dda nlloko naye apaalle dda nibanja naye moollikana ni mmo Mordekai amulleellelleeye vawi Estere aanamwiiwellella Mordekai ovenyera enthawi elle amullelleeye.

²¹ Mallapo ayo Mordekai aphareeye mutteko o enyumba yoomwene, Bigitana ni Teresi, allupa mutteko eelli oohulliwa a mwene, ayo yawehera va mullako voovollowella wa mwene yaasha murima nave yahiiwanana ddoomwiipha mwene Ahasuwero.

²² Mordekai iiwalleeye dda onamasikitannddo aaya amulleella mwaaramwene Estere oyo akelle amulleella mwene munipuroni na Mordekai.

²³ Mvo mwahooyo wamolleelliwiiwa nave yaaphwanya wi tti ddawoona, allupa mutteko eelli attheenaayo yahiiphiwa vawaamakellella vamuteekhoni. Vano ddenndda ddoolembiwa mu nibukhu na epilli yakhalle voothwarani lamulo na mwene.